masi bhadrapde'shtamyan nishithe krishnapakshake, shashanke vrishrashisthe rikshe rohini sangyake.. yoge'sminvasudevaddhi devki mamjijanat kevlopvasen tasminjanmadine mam saptajanmakritatpapanmuchyate natra sanshyah.. bhagvan krishn ka janm bhadrapad mas ki ashtami, budhvar, rohini nakshatra evan vrishrashi ke chandrama men hua tha. atah is din janmashtami vrat rakhne ka vidhan hai. is vrat ko bal, yuva, vriddh sabhi kar sakte hain. yah vrat bharat varsh ke kuch pranton men surya uday kalin ashtami tithi ko tatha kuch jaghon par tatkal vyapini arthat arddharatri men parne vali ashtami tithi ko kiya jata hai. siddhant rup se yah adhik manya hai. jinhonne vishesh vidhi vidhan ke sath vaishnav sanpraday ki diksha li ho, ve vaishnav kahlate hain. anya sabhi log smart hain. parantu iska yah arth nahin hai ki ve bhagvan vishnu ki upasna v bhakti nahin kar sakte.
sabhi log bhagvan vishnu ki bhakti sadhna kar sakte hain. lok vyavhar men vaishnav sanpraday ke sadhu-sant adi udykalin ekadshi tatha janmashtami adi ke din hi vrat karte hain. vrati vrat se pahle din alp bhojan karen tatha pratah kal uthakar snan evan dainik puja pathadi se nivritt hokar sankalp karen ki main bhagvan balkrishn ki apne upar vishesh anukanpa hetu vrat karunga, sarvaantaryami parmeshvar mere sabhi pap, shap, tapon ka nash karen. unhen brahmacharya ka palan bhi karna chahie. din aur rat bhar nirahar vrat karen. agar ismen kathinai ho to bich men falahar, dudh adi le sakte hain. pura din aur ratri bhagvan bal krishn ke dhyan, jap, puja, bhajan kirtan men bitaen. bhagvan ke divya svarup ka darshan karen, unki katha ka shravan karen. unke nimitt dan karen.
athva unke kirtan men, dhyan men prasannachitt hokar nritya adi karen. is utsav par sutika grih men devki ka sthapan karen. is pratima ko, suvarn, chandi, tanba, pital, mrittika, vriksh, mani ya anek rangon dvara nirmit kar, 8 prakar ke sab lakshanon se paripurn vastra se dhak kar, palang par rakhen. usi shayya par shayan karte hue shri krishn ai ki sthapna karen. sutika grih ko bhagvan shri krishn ke vibhinn charnon, jaise gaucharan, kaliya nag mardan, shesh, shri giriraj dharan, bakasur-adhasur-trinavart, putna adi ka mardan, gaj, mayur, vriksh, lata, pataka adi ki sundar aur divya chitrakritiyon se sajaen. venu tatha vina ke vinar (shabda) aur shringar prasadhan samagri se yukt kunbh hath men lie kinkron se sevyaman mata devki ki shodshopchar puja, bhagvan shri krishn ke bal rup sahit, karen.
devki mata, vasudev ji aur bal krishn lal ki jay-jaykar karen. devki ke pairon ke samip charnon ko dabati hui, kamal par baithi hui, devi shri ki ‘namo devyai shriye’ is mantra se puja karen. jat karm, nal chedan adi sanskaron ko sanpann karte hue chandrama ko bhi aghrya den. asatya bhashan n karen. is prakar se sabhi sharirik indriyon ke sanyam evan sadupyog se kiya gaya vrat avashya hi manovanchit fal pradan karne vala hota hai. matra ek indriya ka sanyam arthat ann ka tyag kar dene se tatha anya indriyon se sanyam n karne se kisi bhi vrat ka sanpurn fal prapt nahin hota hai. jahan tak sanbhav ho sanyam niyampurvak hi vrat karna chahie. jo log asvasth hon unhen vrat nahin karna chahie. ardharatri men bhagvan krishn ka janmotsav manana chahie.
tatha puri rat jagaran, bhajan, kirtan men vyatit karni chahie. tatpashchat agle din pratah ann grahan karna chahie. yadi koi purva men bhojan karna chahe to ardharatri men bhagvan ka janmotsav manakar prasad adi grahan karke bhojan karna chahie. yah krishn janmashtami ka vrat sanpurn papon ka nash karne vala hai. ise shraddha, niyam aur sanympurvak karne se ihlok tatha parlok men bhautik evan adhyatmik sukhon ki prapti hoti hai.