khargon ka shri navagrah mandir sanpurn bharatavarsh men apna aitihasik mahatva rakhta hai. is mandir men mata baglamukhi devi sthapit hain. yahan navagrahon ki shanti ke lie mata pitambara ki puja archana evan aradhna ki jati hai, islie yah pitambara grah shanti pith ke nam se vikhyat hai. navagrah devta ko nagar ke devta v svami ke rup men puja jata hai, islie khargon ko navagrahon ki nagri kahte hain. is aitihasik mandir men prativarsh navagrah mela lagta hai evan mele ke antim guruvar ko navagrah ki palki yatra nikali jati hai. khargon nagar madhyapradesh ka ati vikasshil jila hai.
yah indaur se 140 kimi, khandva se 88 kimi, onkareshvar se 87 kimi, sendhva se 67 kimi tatha bavngja se 96 kimi ki duri par sthit hai. shri navagrah mandir kunda nadi tat par sthit hai. mandir ki sthapna vartaman pujari ke adi purvaj shri sheshappa sukhavdhani vairagakar ne lagabhag 600 varsh purva ki. sheshappa ji ne kunda nadi ke tat par sarasvati kund, surya kund, vishnu kund, shiv kund evan sitaram kund ka nirman kiya aur inke samip tapasya karke mata pitambara ko prasann kar anek siddhiyan prapt kin. fir in kundon ke sammukh hi navagrah mandir ki sthapna ki. mandir ke rakhrkhav ka sanpurn prabandhan mandir ke sansthapak sheshappa ji ki chathi pirhi ke vanshaj pan. lokesh dattatray ki dekhrekh men chalta hai.
mandir men shri brahma ke rup men mata sarasvati, murari ke rup men bhagvan ram tatha tripurantkari ke rup men shri panchmukhi mahadev tatha garbhagrih men navagrah virajman hain. garbhagrih ke madhya men pitambara grahshanti pith v suryanarayan mandir tatha parikrama sthali men anya grahon ke darshan hote hain. pitambara grahshanti pith men mata baglamukhi devi v siddh brahmastra sthapit hain. suryanarayan mandir men sat ghoron ke rath par savar bhagvan suryanarayan evan siddh ashtadal suryayantra sthapit hain. parikrama sthali men purva disha men budh, shukra v chandra, dakshin men mangal, pashchim men ketu, shani v rahu aur uttar men guru grah virajman hain. sabhi grahon ki sthapna dakshin bhartiya paddhati v navagrah doshnashak yantra ke adhar par ki gai hai. sabhi grah apne-apne vahan v grahmandal sahit sthapit hain. surya narayan grahon ke raja hain, islie is mandir men surya grah ko pradhan rakha gaya hai. yah mandir sanpurn bharatavarsh men ekmatra suryapradhan navagrah mandir hai. yahan navagrahon ki shanti ke lie mata baglamukhi ki puja-archana v aradhna hoti hai.
navratra par yahan vishesh pujn-abhishek hota hai. pitambara grah shanti pith shri navagrah mandir ke garbhagrih ke madhya bhagvan shri suryadev virajman hain. suryadev ke piche mata baglamukhi devi virajman hain. shri baglamukhi devi ke dayen hath men gada aur bayen hath men bakasur rakshas ki jihva hai. unka bayan pair rakshas ke dayen pair par hai. mata ke is svarup ko dvibhuj vala svarup kaha jata hai. mata baglamukhi evan shri suryadev ke madhya shri brahmastra sthapit hai. yah brahmastra mata baglamukhi ke yantra ke rup men vritt, shatkon, ashtakon, chatushkon, trikon, bindu evan paridhi sahit patthar par ukera gaya hai.
jab mata baglamukhi ka avataran hua tabhi mata ke tej se samast jagat ko stanbhit karne vali brahmastra vidya utpann hui. isi tathya ko dhyan men rakhakar mandir men mata ki sthapna ke sath sath brahmastra ki sthapna bhi ki gai. shri baglamukhi devi ke sath brahmastra ekmatra isi mandir men dekhne ko milta hai. mata baglamukhi ke darbar men puja karne se navagrahon ki shanti hoti hai. shatruon se bachane vali mata pitanbri prachin tantra granthon men das mahavidyaen kramshah kali, tara, shodshi, bhuvneshvari, chinnamasta, tripurbhairvi, dhumavti, baglamukhi, matangi v kamla ullikhit hain. mata baglamukhi ashtam mahavidya hain. ye shatruon ka nash karne vali, yuddh, vad-mukdmon v pratiyogita men vijay dilane vali, prakritik apdaon se raksha karne vali, chunav men vijay dilane vali, vishva kalyan karne vali, vanchit sthan par sthanantaran karane vali tatha vishesh rup se navagrahon ke dushprabhav ko samapt karne vali devi hain. ye devi baglamukhi tantra ki adhishthatri devi hain.
inki sadhna se pratyek asanbhav karya ko sanbhav banaya ja sakta hai. mata baglamukhi ka pujn-archan brahmastra ki shakti ka karya karta hai. mata baglamukhi ki aradhna pitavarna hoene ke karan yah devi pitambara kahlati hain. mata ko arpit ki jane vale vastra, naivedya, fal adi samast samagri pile rang ki honi chahie. sadhak ko bhi pile vastra dharan kar hi mata ki aradhna manglvar ko karni chahie. navratra men yahan 9 dinon tak mata ka vishesh rup se abhishek v shringar evan maha arti ki jati hai.
bhaktagan navratra men mandir men sthapit mata ka pujn-archan v abhishek karte hain evan sarvatra yash, vijay, labh ka ashirvad prapt karte hain. grahshanti ke uddeshya se devi ke darshan hetu desh ke vibhinn bhagon se shraddhalugan ate hain.