karva chaith vrat kartik krishn paksh chaturthi ko kiya jata hai. vivahit striyon ke lie yah vrat akhand saubhagya ka karak hota hai. vivahit striyan is din apne pran ballabh ki dirghayu evan svasthya ki kamna karke bhagvan rajnish (chandrama) ko aghrya arpit kar vrat ko purn karti hain.
is vrat men ratri bela men shiv, parvati, svami kartikey, ganesh aur chandrama ke chitron evan suhag ki vastuon ki puja ka vidhan hai. is din nirjal vrat rakhakar chandra darshan aur chandrama ko aghrya arpan kar bhojan grahan karna chahie. pili mitti ki gauri bhi banayi jati hai.
kuch striyan paraspar chini ya mitti ka karva adan pradan karti hain. lokachar men kai striyan kali chikni mitti ke kachche karve men chini ki chasni banakar dal deti hain athva ate ko ghi men senkakar chini milakar laddu adi banati hain. puri-pua aur vibhinn prakar ke pakvan bhi is din banae jate hain.
nav vivahitaen vivah ke pahle varsh se hi yah vrat praranbh karti hain. chaith ka vrat chaith se hi praranbh karaya jata hai. iske bad hi anya mahinon ke vrat karne ki parampara hai. naivedya (bhog) men se kuch pakvan brahmanon ko dakshina sahit dan karen tatha apni sasu man ko 13 laddu, ek lota, ek vastra, kuch paise rakhakar ek karva charan chukar de den. shekhavati (rajasthan) men ek vishesh parampara hai.
vahan striyan kumharon ke yahan se karva lakar gehun ya bajra bhunakar sathiya karke ate ki bani hui 13 mithi tikkiyan, ek gur ki dali aur char ane ke paise ya shraddh anusar vivah ke sal tika chaval lagakar gehun ke 13 dane hath men lekar kahani sunti hain.
karva tatha pani ka lota roli pate par rakhti hain aur kahani sunakar karva apni sas ke pairon men arpit karti hain. sas n ho to mandir men charhati hain. udyapan karen to 13 suhagin striyon ko jimaven. 13 karva karen 13 jagah sira puri rakhakar hath feren. sabhi par rupya bhi rakhen.
bayna jimne vali striyon ko paros den. rupya apni sas ko de den. 13 karva 13 suhagin striyon ko bhojan karane ke bich de den. vastav men karva chaith ka vrat bhartiya sanskriti ke us pavitra bandhan ya pyar ka pratik hai jo pati patni ke bich hota hai.
bhartiya sanskriti men pati ko parmeshvar mana gaya hai. yah vrat pati patni donon ke lie nav pranay nivedan aur ek dusre ke prati harsh, prasannata, apar prem, tyag evan utsarg ki chetna lekar ata hai.
is din striyan nav vadhu ki bhanti purn shringar kar suhagin ke svarup men raman karti hui bhagvan rajnish se apne akhand suhag ki prarthana karti hain. striyan shringar karke ishvar ke samaksh vrat ke bad yah pran bhi karti hain ki ve man, vachan evan karm se pati ke prati purn samarpan ki bhavna rakhengi tatha dharm ke marg ka anusaran karti hui dharm, arth, kam aur moksh charon purusharthon ko prapt karengi.
kunari kanyaen is din gaura devi ka pujan karti hain. shiv parvati ke pujan ka vidhan islie bhi hai ki jis prakar shailputri parvati ne ghor tapasya karke bhagvan shankar ko prapt kar akhand saubhagya prapt kiya vaisa hi saubhagya unhen bhi prapt ho.
is sandarbh men ek prasiddh katha ke anusar pandvon ke banvas ke samay jab arjun tap karne indranil parvat ki or chale gae to bahut dinon tak unke vapas n lautne par draupdi ko chinta hui. shrikrishn ne akar draupdi ki chinta dur karte hue karva chaith ka vrat bataya tatha is sanbandh men jo katha shivji ne parvati ko sunai thi, vah bhi sunai. katha is prakar hai.
indraprasth nagri men ved sharma namak ek vidvan brahman ke sat putra tatha ek putri thi jiska nam viravti tha. uska vivah sudarshan namak ek brahman ke sath hua. brahman ke sabhi putra vivahit the. ek bar karva chaith ke vrat ke samay viravti ki bhabhiyon ne to purn vidhi se vrat kiya, kintu viravti sara din nirjal rahakar bhukh n sah saki tatha nidhal hokar baith gai.
bhaiyon ki chinta par bhabhiyon ne bataya ki viravti bhukh se pirit hai. karva chaith ka vrat chandrama dekhakar hi kholegi. yah sunakar bhaiyon ne bahar kheton men jakar ag jalai tatha upar kapra tanakar chandrama jaisa drishya bana diya aur jakar bahan se kaha ki chand nikal aya hai, aghrya de do. yah sunakar viravti ne aghrya dekar khana kha liya.
nakli chandrama ko aghrya dene se uska vrat khandit ho gaya tatha uska pati achanak bimar par gaya. vah thik n ho saka. ek bar indra ki patni indrani karva chaith ka vrat karne prithvi par ain. iska pata lagne par viravti ne jakar indrani se prarthana ki ki uske pati ke thik hone ka upay bataen.
indrani ne kaha ki tere pati ki yah dasha teri or se rakhe gae karva chaith vrat ke khandit ho jane ke karan hui hai. yadi tu karva chaith ka vrat purn vidhi-vidhan se bina khandit kie karegi to tera pati thik ho jaega. viravti ne karva chaith ka vrat purn vidhi se sanpann kiya jiske falasvarup uska pati bilkul thik ho gaya. karva chaith ka vrat usi samay se prachlit hai.
if you are facing any type of problems in your life you can consult with astrologer in delhi