bhartiya dharm evan sanskriti men anadi kal se hi vanya jiv sanrakshan ki samriddh parampara rahi hai. rishi-muniyon ke ashramon men anya prani svachchand vicharan karte rahe hain. ve rishi-muni vanya jivon ka poshan bhi apne parijnon ke rup men karte the. anek shikari rajaon ko dandit karne ke kisse rishi-muniyon ki gathaon men milte hain. bhartiya sanskriti men prakriti durga svarupini hai. vanya jivon ke sarankshan ko sakar rup dene ke lie unhen dharmik charitron, devi-devtaon ke pratik ke rup men athva devi-devtaon ka sahachar mana jata hai. shayad vanya jivon ke sanrakshan ko dhyan men rakhakar hi hathi ko ganesh ka, sinh, varah, machli aur kachchap adi ko bhagvan vishnu ka, vanar ko hanuman ji ka, mayur ko kartikey ka, bagh man durga ka, vrish, sanp adi ko bhagvan shiv ka pratik mana gaya hai taki log in jivon ko koi hani n pahunchaen. ye sabhi prani hamare jivan ko sukhi aur samriddh bana sakte hain. inki seva-puja se vibhinn prakar ke kashton, asadhya sharirik rogon, grahon ke anishtakar falon tatha makan ke vastu doshon se mukti mila sakti hai. inmen se kuch vanya praniyon ka ullekh yahan prastut hai jo grah shanti evan vastu dosh nivaran men sahayak ho sakte hain.
gay: bhartiya sanskriti evan dharm shastron men gau atyadhik pujniya hai evan janni ka sthan rakhti hain. 33 karor devi devtaon v sabhi tirthon ka vas batlaya gaya hai. dvapar yug men yaduvanshi shri krishn rupi narayan to svayan iske sevk-palak ke rup men vishvavikhyat hue hain. desh ke vibhinn pranton men hindu dharmavalambiyon dvara iski puja archana ki jati hai. ismen mukhyatya dev guru ka vas mana jata hai. grahon men guru ka sthan sarvochch hai aur sabhi uski puja karte hain. koi bhi krur grah guru ko shatru nahin manta. lagn kundli men yadi guru tritiya, shashtham, ashtam ya dvadash bhav men athva vrish, mithun, kanya, tula, makar ityadi nich evan shatru rashiyon men ho aur vyakti gau seva kare guru ki kupit drishti se bach sakta hai. mithun ya kanya rashi men brihaspati hone par vyakti guruvar 5, 9 ya 12 kilo kati hui hari ghas (chara) gur ki dali ke sath bahar kahin bhraman kar rahi kisi gay ko khilae to dosh ka shaman hota hai. gay palna atyant shubh hai. gay ki seva se sabhi prakar ke vastu doshon se mukti milti hai. gay ke gobar se nivas ke ishanya athva puja sthan ko lipne se bhagya vriddhi hoti hai. puja sthan athva baithak ke kamre ke ishan kon men chandi ki gay aur uska bachra rakhna bhagyavriddhikarak hota hai.
matsya (machli evan kachue): machli evan kachue narayan shri hari vishnu ke avtar ke pratik svarup hain. samudra manthan se amrit, airavat, safed hathi evan vibhinn ratnon sahit lakshmi ki utpatti hui thi. narayan rupi kachue evan machli ko bhojan, ann ityadi khadya padarth khilane se krur grah rahu-ketu shant hokar shubh falon ki prapti karate hain. rahu ki mahadsha praranbh hone par vyakti ka tula dan (gehun ka ata gundh) kar machli aur kachuon ko khilaen to rahu mahadsha ke krur falon ka shaman ho jata hai. (not: tula dan men vyakti ka tula (taraju) ke ek palre men baithakar evan dusre palre (bhag) men ata rakhen, jab ata rakha hua palra us vyakti ke vajan se thora jyada jhuke to fir us ate ka vajan kar dukandar ko uska mulya den. aisa kadapi nahin karen ki us vyakti jiska tula dan hota hai uska vajan gyat hone par uske barabar ka ata kharid len.) nivas ki baithak athva puja ghar ke uttar evan vayavya kon men kisi dhatu ya kristal ke kachue ka pratik rakhne par vyakti dhan-dhanya se samriddh banta hai. dhyan rahe kachue ka mukh ghar ke andar ki or hona chahie n ki bahar ki or. nivas ke vayavya kon men athva puja sthan men kanch athva shishe ke kisi patra men ganga jal bhar kar usmen 2, 7, chandi ki 2, 7 ya 12 machliyan, mukta sachcha moti dalakar rakhen to vyakti ko dhan samriddhi ki prapti hogi. visheshakar jin vyaktiyon ki janm lagn men chandrama vrishchik (nich rashi) men sthit ho unke lie to yah prayog ashcharyajanak labh deta hai.
chinti: dharm shastron ke anusar chinti ko narayan shri hari vishnu ka pratik mana jata hai. satyug men narayan bhakt prahlad ke pita dvara uski narayan bhakti ki pariksha lene aur use marne hetu vibhinn prakaron se use sataya gaya tha use agni se tapt lauh stanbh ka alingan karne ke lie kaha gaya. balak ne apne aradhya shri vishnu ko chinti ke rup men tapt lauh stanbh par ghumte dekha to usne bhi khushi-khushi us lauh stanbh ka alingan kar liya. alingan karte hi vah tapt lauh stanbh bhi shital jal ke saman ho gaya. chinti rupi shri narayan ko bhojan karane se rahu evan shani ke kopon ka shaman hota hai. iske lie rahu, ketu evan shani ki mahadshaon, antardashaon, pratyantar dashaon ke kal men kasar (shuddh ghi se bhuna ata jismen shakkar mishrit ho) banakar jangal men chintiyon ke bilon par dalen athva kasar ko sukhe gole men bhar shanivar ki pratah jangal men pipal, baragad, pilakhan athva shami vriksh ki jar men dabaen. yah prayog visheshakar grishm athva varsha ritu men karen nishchit rup se krur grahon ki krur shaktiyon ka shaman hoga.
kabutr: dharm shastron ke anusar yah pakshi dev guru brihaspati ka pratik mana gaya hai. yah shanti dut ka pratik pakshi hai. dev sthan athva aranya men kabutar ko mukt karne se grah brihaspati shubh fal deta hai. jin vyaktiyon ki lagn kundli men guru chandrama se yukt ho gajkesri yog hone par bhi fal ki prapti nahin ho athva kark rashi men ho ya jinka bhagyesh chandrama ya brihaspati ho unhen kabutron ko chaval mishrit bajra dene se samaj men uchch sthan prapt hota hai. vayavya kon men chandi athva porsalin se nirmit kabutar ka jora rakhne se dampatya jivan sukhamay hota hai.
kutta: dharm shastron ke anusar rudravtar shri batuk bhairav ka vahan athva gan aur dharmaraj (yam) evan shani (donon hi surya putra) ka pratik mana jata hai. yah pitri shanti shraddh karm men di jane vali bhut bali ka bhakshan karne vala mukhya jiv hai. yah vibhinn prakar ki paralaukik shaktiyon ka sangyak evan suchak jiv bhi hai. yah vibhinn prakar ki ane vali vipattiyon ki purva suchna deta hai. ise bhojan karane se apmrityu jaisa kasht bhi tal jata hai.
kaua: dharmashastron ke anusar yah pakshi devtaon ke raja indra ke putra jayant ka rup evan yam aur shani ka pratik mana jata hai. kaua ek vilakshan, pratibhashali evan para shaktiyon ka suchak hota hai. iske dvara bole jane vale vibhinn prakar ke shabd ka vibhinn daivik apdaon sahit shubh suchnaon ka sanket dete hain. tantra shastra varnit ‘kauta tantra’ men to iski vibhinn pratibhaon ka vishad varnan kiya gaya hai. ise pratahkal ann ityadi dene se krur grahon shani, rahu, mangal ki krur yutiyon evan falon ka shaman hota hai.
tota: dharm evan jyotish shastron ke anusar yah pakshi shukra evan budh grah ka dyotak mana gaya hai. janm lagn men bhagyesh budh athva shukra hone par athva unke nichasth hone par vyakti ka bhagya ast ho jata hai. aise vyakti ko chahie ki vah bahelie se pinjra sahit 3, 6 ya 7, toton ko kharidakar budh athva shukra ke din pratah kal unhen aranya men mukt kar de aur pinjre ko bhali bhanti tor maror kar kisi agyat sthan men dal de athva jamin daba de. yah prayog shukla paksh men 3, 6, athva 7 bar karna chahie. nishchit rup se grah anukul honge. dhyan rahe is pakshi ko kadapi kaid n karen athva ghar men n palen anyatha apki koi santti bandhya athva napunskta ko prapt hogi.
vanr: yah rudravtar hanuman ji ka pratik evan manav ka purvaj prani hai. hanuman, sugriv, angad ityadi vanar rupi devon nen manav rupi narayan ki sahayta ki thi. vastu shastra men vanar bal, buddhi v chaturya ka pratik mana jata hai. bandar ki lohe ki pratima (kale hanuman) dakshin-pashchim kon men rakhne se yah ghar par ai vipattiyon ko nasht karti hai. jin logon ki lagn kundli men shani shatru kshetri ho ya mesh, kark athva sinh rashi men ho aur shani ki mahadsha athva sarhesati hone ke karan jivan atyadhik ho unhen shukla paksh ke pratham shanivar ko shuddh ghi (gau ghrit) athva chameli ke tel men narangi sindur mila kar kisi pipal ke vriksh ke niche sthapit hanuman ji ki pratima ko shraddhabhav se lep karna chahie. fir lal rang ke vastra se bana langota hanuman ji ko bandhen iske bad sone ke vark (jaisa mishthan par chipkate hain), ko sone ke mukut ki bhavna kar lep lagi hanuman ji ki pratima ke mastak par chipkaen aur donon paira par chandi ka ek-ek vark (chandi ki kharaun mankr) chipkaen. fir gur aur besan ke bane 5, 7 ya 11 ladduon ka bhog lagaen. nishchit rup se shani ke krur prabhav ka shaman hoga. is prayog ke lie kisi mantra ki avashyakta nahin hai.
gaj (hathi): hathi parvati ke priya putra vighn vinashak shri ganesh ka pratik evan lakshmi (riddhi-siddhi) ka dyotak mana jata hai. samudra manthan ke samay vibhinn ratnon sahit airavat (safed hathi) ki utpatti hui thi. safed hathi atyadhik shubh evan ahinsa aur shanti ke dut bhagvan budh ka priya pratik mana jata hai. thailaind men to safed hathi keval raj parivar ki sampatti hota hai. ise anya vyaktiyon ko rakhne ka adhikar nahin hai. rajbhvnon men prachin bhartiya vastu shastra ke anusar hathi bandhne ka sthan pashchim-dakshin arthat nairritya kon men banaya jata hai. stanapayi praniyon men hathi sabse bhari evan buddhiman (manushya ko chorkr) prani hai. jo vyakti rahu se pirit aur jiski kundli men kalasarp, yam athva pash yog ho aur rahu sinh athva kark rashi men ho vah apne baithak ke kamre athva nivas ke nairritya kon men lakri athva dhatu ka hathi sthapit kare athva divar par hathi ka foto lagae. aisa karne se rahu ke krur falon ka shaman hota hai. uttar disha men sfatik athva safed patthar se bani hathi ki pratima rakhne par sukh samriddhi evan dhan lakshmi ki vriddhi hoti hai. sinh lagn ke kisi vyakti ke janm lagn mane chandrama se chaithe sthan par guru sthit ho athva gajkesri yog falit nahin ho raha ho, to use guru athva chandrama ki mahadsha ke antargat pratyek char mah par ek bar hathi ki savari avashya karni chahie. yah prakriya char bar karen to gajkesri yog falibhut hoga. gajkesri ka bhavarth samajh len gaj arthat hathi aur kesri arthat sinh tatparya yah ki gajkesri yog ke falibhut hone par vyakti hathi par baithe sinh ke saman samaj men pratishthat hota hai.
varah (suar): yah jiv narayan shri hari vishnu ka pratik hai. bhagvan ne iske rup men bhi ek avtar liya tha. pauranik hindu dharm shastron ke anusar varah rupi narayan ne prithvi ko patal (narka) se nikala tha. narayan ka yah rup manushya ki vipattiyon se raksha karta hai. yadi kisi parivar men koi shishu masan (rikets rog, jismen bachcha bilkul kankal ki bhanti ho jata hai) rog se pirit ho athva parivar men masan rog ki paranpra chali a rahi ho aur un par koi aushdhi kam n karti ho to is dasha men dhatu se nirmit suar ki pratima, jiske mukh se do dant age nikle hue hon, bachchon ke sone ke kamre men dakshin disha athva nairritya kon men rakh dena chahie. aushdhi nishchit rup se fayda karegi v bachcha rogmukt hoga.
giddha: pauranik kal se hi yah pakshi manushya jati ka param mitra hai. lankesh ravan dvara aphrit mata sita ki raksha hetu inke purvaj giddharaj jatayu ne ravan se larte hue apne pranon ki bali de di thi. yah ek pauranik satya hai. vahin dusri or yah pakshi paryavaran ka sabse bara mitra. yah apmarjak (sari gali mrit avsheshon ko khakar safai karne vala) ke rup men manushya ki pradushan se raksha karta hai. is pakshi ki murti athva chitra nivas ke pashchim ya nairritya disha men lagane se grih svami athva nivas par ane vali vipattiyon ka shaman hota hai. chini vastu shastra feng shui men ise finiks aur hi chiyang kaha jata hai.
medhk: pauranik dharm shastron ke anusar yah prani devtaon ke raja indra, varun (jal) evan shukra (kam) ka pratik mana jata hai. shastron ke anusar jis kshetra men is prani ko mara athva khaya jata hai. us kshetra men varsha ki kami hoti hai. aisi sthiti men sukha evan akal parne par medhk-medhki ki shadi karane se varsha hoti hai. yah pratha kai deshon men prachlit ai. yah prani sukh samriddhi ka pratik bhi mana jata hai. ghar ke bhitar iske khule hue mukh ki pratima rakhne par gaya hua (jiske milne ki ummid n ho) dhan vapas a jata hai aur mukh band ya mukh men sikke dabae hue medhak ka pratik parivar men andar ki or mukh karke rakhne par dhan ki prapti hoti hai. medhak ke prati aisi manyata kai deshon men prachlit hai. shukra dosh se pirit jis vyakti ki lagn kundli men shukra shatru ya nich rashi mesh, kanya vrishchik ya sinh men sthit ho evan jiske parinamasvarup usse sanbandhit rog athva dosh utpann ho rahe hon aur shadi nahin ho pa rahi ho use chahie ki vah shukla paksh ke somvar ya shukravar ko bhat (ubla hua thanda chavl) medhak ke mukh men dalakar use nadi athva talab men chor de. yah prayog 12 bar karen, nishchit rup se labh hoga.
billi aur bagh: bagh athva billi shakti (man durga) ka pratik hai. bagh vipattiyon ka vinashak hai aur prakriti ke santulan ko banakar rakhta hai. shri vishnu ne narsinh avtar dharan kar daityon aur unki shaktiyon ka vinash kiya tha. bharat ke atirikt kai anya deshon men bhi iski vibhinn prakar se puja ki jati hai. iski athva iski mausi (is kul ke anya sadasya billi) ki hatya karne par uske pap nivaran evan pashchatap hetu son ki billi dan men dene ki baten bhi bujurgon dvara batlai jati hain. bagh athva billi ki pratima athva chitra nivas ke pashchim dakshin kon men lagane se ane vali vipattiyon ka shaman hota hai. gandmul (ashlesha, vishakha evan mul nakshatra) men utpann hue balak ke mul dosh ki shanti hetu bilav (nar bilav) ko dudh pilaen. yah kriya 27 bar karen.
ullu: yah shri hari vishnu ki priya lakshmi devi ka pratik evan alaukik shaktiyon ka svami nishachar pakshi hai. yah apratyaksh rup se manav ka mitra hai khadyannon v faslon ko nasht karne vale jivon jaise chuhe, khargosh ityadi ko mar kar yah prakritik santulan banata hai. tantron evan shastron men to ise asht disha bhedak arthat ath dishaa ka gyata mana gaya hai kyonki yah apni gardan charon or 170-180 digri tak ghuma leta hai. tantra shastra men ek prithak granth racha gaya hai jo ‘uluk tantra’ ke nam se prasiddh hai. is pakshi ki pratima athva chitra uttar disha men lagane se sukh samriddhi ati hai. ise uttar disha ke adhipti kuber ka pratik bhi mana jata hai.
hans: yah pakshi vidya ki adhishthatri devi man sarasvati ke atirikt maitri, shanti, parivarik samriddhi ka bhi pratik mana jata hai. is pakshi ki chandi athva safed sfatik athva porsalin se nirmit do akritiyon jinke gale apas men mile hon, athva aise do pakshiyon ke chitra jinke gale apas men sanyukt aur jal ke samip hon, ghar ke vayavya kon men lagane se ghar men shanti evan samriddhi ati hai. jis vadyarthi ki buddhi mand athva yaddasht kamjor ho aur parhai-likhai jaldi bhul jata ho, uske adhyayan sthan ke samne iska chitra athva pratima avashya lagaen, ashatit labh hoga.
mor: yah pakshi shiv putra svami kartik (kartikey, shadanan, murugan svami) ka vahan, shri krishn ka priya jiska pankh vah apne mukut men lagate the evan varun devta ka pratik mana jata hai. yah manav ka prakritik mitra bhi hai jo uske khet khalihanon ko nasht karne vale kit patangon ko marakar uski rakhvali karta hai. shastron men ise meghdut (varsha ko lane vala pakshi) bhi kaha gaya hai jiski karunamyi madhur avaj sun indradev varsha karte hain. vastu shastra ke anusar nivas ke pashchim evan agnikon men iski murti athva chitra lagana shubh hota hai. pati-patni ke bich nirantar hone vale kalah evan jhagron ko khatm kar madhur sanbandh banata hai.
sarpa: yah jiv bhartiya sanskriti men ek aham sthan rakhta hai. yah svayan ek devta ke rup men pujniya evan yam (kal) ka svarup aur devadhidev mahadev ka priya abhushan aur gan mana jata hai. pure vishva men is jiv ke bare men vibhinn prakar ki kinvadantiyan prachlit hain aur iski puja archana ki jati hai. samudra manthan ke samay is jiv ki bhumika mukhya thi, jismen vasuki namak mahasap ki rassi banakar daitya evan devtaon ne samudra ka manthan kiya tha. ise bhumi ka devta (bhumiya ji) evan pitri lok ka sandeshvahak jiv bhi mana jata hai. grih nirman ke samay ninv rakhne se purva iski chandi athva range se nirmit akriti bhitar dabane se bhavan nirman sucharu rup se hota hai. grih men rahu janit vastu dosh ka bhi shaman hota hai. jin vyaktiyon ki kundliyon men pash, yam athva kal sarp yog para ho unhen chahie ki ranga evan chandi dhatu se nirmit do sarp (nag evan nagin) yathavidhi nadi men pravahit karen.
ghora: shakti ka pratik stanapayi yah chaipaya pashu adi kal se devtaon se lekar manav ke vahan ke rup men prayukt hota aya hai. iski samathrya shakti ke karan hi vidyut ityadi yantrik upkrnon ki mapak kshamata ko ashva shakti sangya pradan ki gai hai. yah shukra ka pratinidhi jiv hai. nirantar hani ke karan girte hue vyavsay se nirash logon ko chahie ki iski daurti hui avastha ki pratima athva chitra vayavya disha athva kon men lagaen ya rakhen. aisa karne se vyakti ka khoya hua sahas evan shakti laut ati hai aur vah unnati ke marg par is pashu ki bhanti daurne lagta hai.
gadha: yah jiv dhairya, sahnshilta, shakti ke sath-sath saral svabhav ka pratik bhi mana jata hai. hindu shastron ke anusar yah bhavgti kalratri ka vahan bhi hai. jin vyaktiyon ke shani, rahu evan ketu lagn kundli men nich athva shatru sthan men baithe hon aur unki mahadsha, antardasha athva pratyantardasha chal rahi ho unhen in se milne vale kashton ke nivaran hetu chokar (ate ki chans) mile hue bhuse ka tula dan kar is pashu ko khilana chahie jin vyaktiyon par kisi pret badha ya kisi tantra-mantra prayog ki ashanka ho unhen uske shaman hetu yah prayog karna chahie. yah anek bar ka anubhut prayog hai. yadi mritavatsa (jiske bachche hokar shighra mar jate hon athva mare hue utpann hote hon aisi stri) ka bhuse se tula dan kar gadhe ko khilaya jae to vah jivavatsa hoti hai. yah prayog krishn paksh ke pratham shanivar se praranbh kar ek varsh men sat bar karen, nishchit rup se labh hoga.
bhainsa: yah pashu mrityu ke devta yamraj ka vahan evan dyotak hota hai. jin logon ki kundli men shani evan mangal nich athva shatru rashi men sthit ho aur unki mahadshaen kashtadayak chal rahi hon athva jo bachche hast, svati ya shravan nakshatra ke nesht kal men utpann evan rogagrast hon unhen shanti kasht se mukti dilane ke lie, bhige hue deshi chane, jo ankurit hon, ke sath panch prakar ki mithaiyan, kamal ke ful sahit bhaisen ko khilaen. yah prayog shanivar ko rahu kal men karen. nishchit rup se krur grahon ke prabhav ka shaman hoga aur shanti milegi. gandmul (ashvini, ashlesha, magha, jyeshtha, mul evan revti) men utpann balak athva balika ka bhainse ke gobar se tula dan kar gobar ko kisi gande nale men dalen. yah prayog balak ke janm ke bad parne vale pahle shanivar se praranbh kar sat shanivar tak karen, nishchit rup se labh hoga.
bichchu: yah vrishchik rashi ka pratik jiv hai. ashtapad evan karkat arthat kainsar jaise asadhya rogon ka bhi dyotak mana jata hai jo manushya ke lie mrityutulya kashtakari hote hain. jin logon ki lagn kundli men chandra nich rashi arthat vrishchik men sthit ho to unhen uski shanti hetu tanbe se bane bichchu ko ath ratri apni shayya men rakh nauven din use kisi nirjan sthan men bhumi ke andar gaddha kar usmen lakri (kath) ke kuch koyle evan namak dal kar gar dena chahie. nishchit rup se vrishchik ke chandra ke dosh ka shaman hoga. dhyan rahe, gaddha jitna gahra hoga utna hi adhik labh hoga.