jyotishi banne ke yog  

prashna: jyotishi banne ke kya-kya yog hain? yadi inka vargikaran vyavsay aur shodh ke adhar par kiya jaye to inka jyotishiya adhar kya hoga? safal bhavishyavaktaon v jyotishiyon ki kundliyan lagnabal evan grahabal pradhan hoti hain. prathmtah lagn evan lagnesh donon balvan hone chahie. lagnabal ki pariksha ansh bal evan navmansh kundli se hoti hai. lagnesh ka bal bhi anshon se hi napa jata hai. lagnesh svagrihi, uchchasth, mulatrikon rashi men kendra ya trikon men hona chahie. ismen dvitiya bhav, dvitiyesh (vani sthan) ka shaktishali hona avashyak hai tabhi vani safal hogi. vani ki saflta ke lie sarasvati upasna, gayatri ki sadhna anivarya hai. lagnesh ke anusar hi jyotishi ki ruchiyan hoti hain, acharan hota hai vyavhar hota hai. jatak tatva ke anusar jyotishi hone ke yog 1. yadi budh v shukra dvitiya v tritiya sthanon men hon to manushya shreshth jyotishi hota hai. kisi bhi sthiti men hone par arthat donon sath hon ya ek-ek bhav men ek-ek grah ho to ukt fal hota hai. 2. dhan sthan ka svami balvan ho v budh kendra ya trikon ya ekadash sthanon men ho to manushya shreshth jyotishi hota hai. 3. dhan sthan men brihaspati apni uchch rashi ka ho to jatak uttam jyotishi hota hai. 4. buddhi karak grah budh ya brihaspati kendra ya trikon sthanon men sthit hon tatha vahan par shubh grahon ki drishti ho to jatak bhavishyavakta hota hai. 5. brihaspati apne navansh men ya mridu shashthayansh men ho to jatak bhut, vartaman v bhavishya ko janne vala trikalagya hota hai. brihaspati gopuransh men yadi shubh grahon se drisht ho to bhi jatak trikalagya hota hai. jyotishi banne ke kuch grah yog gahan shodh ke uprant prapt hue sutron dvara grahan kiya gaya hai. 1. dvitiya (vani ke sthan) bhav men yadi panchmesh ya budh athva brihaspati ashtamesh ke sath yuti karen to manushya gudh vidya evan purvajanmakrit baton ko batane vala bhavishyavakta hota hai. 2. pancham sthan men lagnesh, dvitiyesh, dashmesh evan budh v brihaspati ki yuti ho evan ye sabhi ashtamesh drisht hon to manushya jyotishi banakar dhanarjan karta hai. 3. shukla paksh ki panchmi tithi se lekar krishn paksh ki panchmi tithi tak ka chandra purn balvan hokar surya, budh v brihaspati se sanbandh banae evan in par dashmesh ev ekadshesh ki drishti ho to bhi manushya jyotish ke madhyam se apna jivan yapan karta hai. 4. ashtamesh panchmesh ke sath lagn men sthit hokar dvitiyesh evan ekadshesh ka yadi grahon se drishti ya anya sanbandh ho to bhi manushya jyotish ke kshetra men saflta prapt karta hai. 5. ashtamesh ka yadi chandra ya shani se drishti ya yuti sanbandh banta ho ya ashtamesh v panchmesh ki yuti ho to bhi manushya jyotishiya karya men ruchi rakhta hai. 6. buddhi v gyankarak grah brihaspati balvan hokar chandra ke sath gajkesri yog, lagn, pancham ashtam ya navam bhavon men hokar rachna karta ho to manushya jyotishi v hastarekha visheshagya hota hai. 7.agar kshin chandra par shani ki drishti ho ya chandra-budh ki yuti ho aur us par shani ki drishti ho ya shani chandra budh ki yuti ho sath hi brihaspati budh v shukra ke sath kisi bhi prakar ka sanbandh banata ho to manushya jyotish shastra men ruchi rakhta hai. 8. patrika men budh v brihaspati ka paraspar sthan parivartan ho to manushya ko jyotishiya gyan men ruchi lene ki sanbhavna nirmit hoti hai. iske sath hi panchmesh v navmesh in dona grahon se drishti ya yuti sanbandh rakhen to manushya safal bhavishyavakta hota hai. 9. yadi patrika men budh v brihaspati ki yuti ya drishti sanbandh hokar ashtam bhav se sanbandh ho jaye to manushya gudh vidyaon ka jyotishiya gyan rakhne vala ho sakta hai. 10. dasham bhav men lagnesh, panchmesh, ashtamesh, navmesh, budh v brihaspati ityadi jitne bhi adhik grah sthit honge manushya utna hi safal jyotishi ho sakta hai. 11. ketu ka budh evan brihaspati se sanbandh bhi manushya ko apni dasha-antardasha men jyotish ke kshetra men le jane men safal hota hai kyonki ketu bhi gudh vidyaon men parangat karne men sahayak hota hai. 12. sinh lagn ki patrika men yadi buddhi evan vani ke dvitiya sthan men brihaspati panchmesh v ashtamesh hokar baithe, dashamasth ketu ki drishti brihaspati par evan brihaspati ki navam drishti gudh vidya ke karak ketu par ho tatha budh lagnesh ke sath yuti kar lokapriyata ke chaturth sthan men baithakar dasham sthan ke ketu par drishtipat kare to aisa manushya gudh vidyaon evan jyotish shastra ka gyan prapt kar janmanas men jyotish ka gyata jana jata hai. 13. yadi patrika men tritiyasth vani karak budh par vidya ghar ke svami mangal ki chaturth drishti ho aur yahi vidya ghar ka svami mangal budh ki rashi kanya men ho ( dekhen udaharan kundli kramank 2) ya yahi mangal gudh vidyaon ke karak ketu ke sath dvadash sthan men ho, ketu ki pancham drishti ashtamesh shukra ke sath baithe brihaspati ki chaturth sthan par ho, sath hi isi ketu ki navam drishti ashtam sthan par ho aur isi ashtam sthan par brihaspati ki pancham drishti evan navam drishti ketu-mangal yuti par ho to aisa manushya apne mul karm ke atirikt bhi jyotishiya gyan arjit karne ke lie lalayit rahta hai. 14. kanya lagn ki patrika men panchmesh shani v ashtamesh mangal lagn men ho, dvitiyesh v navmesh shukra svarashi ka hokar ashtam sthan par drishti rakhta ho, brihaspati svakshetri min rashi ka kendra men hokar lagn evan lagnesh budh par drishti rakhe evan ketu moksh ke dvadash sthan men sthit hokar gudh vidya ke ashtam sthan par drishti kare to aisa manushya apne mul karya ke alava gudh evan jyotish vidya men pravinta prapt karta hai. 15. lagnesh evan buddhikarak budh, brihaspati ki min rashi dasham sthan men ho, brihaspati gyan karak grah pancham bhav men panchmesh se drisht ho, ashtamesh-navmesh shani lagn men sthit hokar gudh vidyaon ke karak ketu par drishti rakhe tatha vani sthan ka svami chandra lagn men ho to aisa manushya jyotish ke kshetra men pravinta prapt kar apne gyan se pustak lekhan men safal hota hai. 16. vrishchik lagn ki patrika men gyan karak brihaspati svarashi ka hokar buddhi ke sthan dvitiya bhav men hokar ashtam bhav par drishti rakhe, ashtamesh ketu se drisht hokar pancham bhav men brihaspati ki min rashi men ho, dashmesh surya lokapriyata ke chaturth bhav men sthit hokar dasham bhav ko dekhe aur shani janta evan chaturth bhav ka svami hokar mitrasth rashi ka hokar saptamasth hokar bhagyesh chandra ko lagn men dekhe to aisa manushya apne jyotish gyan se bhavishyavaniyan kar lokapriyata prapt karta hai. 17. makar lagn ki patrika men buddhi evan vani sthan ka svami shani uchch ka hokar dasham sthan par ho, panchmesh budh lagn men yogkarak shukra ke sath sthit ho tatha brihaspati ketu ke sath budh ki mithun rashi men sthit hokar lagnesh shani par drishti rakhe tatha ashtamesh ashtam bhav ko dekhe to aisa manushya takniki yogyata ke sath jyotishiya gyan ka adhyayan kar is kshetra men prasiddhi prapt karta hai. 18. dhanu lagn ki patrika men panchmesh mangal lagn men aur lagnesh brihaspati parakram bhav men sthit hokar budh ki mithun rashi par pancham drishti karen, budh-ashtamesh chandra ke sath yuti kare, buddhi ka svami shani ketu jaise gudh vidyakarak grah ke sath budh ki kanya rashi men dasham bhav men ho to aisa manushya apne mul karyon ke atirikt dhyan yog v gudh vidyaon ko sikhne ki lalsa evan jyotish shastra men pravinta prapt karne men atyadhik ruchi rakhta hai. 19. kunbh lagn ki patrika men vanikarak brihaspati karm sthan men sthit ho, pancham, ashtam evan navam sthan ke svami budh evan shukra dashmesh ke sath saptam sthan men yuti sanbandh banakar lagn ko purn drishti se prabhavit kare tatha lagnesh shani uchcharashisth chandra ke sath yuti kare evan ketu bhi budh ki rashi ashtam sthan men sthit hokar gudh vidyaon hetu prerit kare to aisa manushya jyotish ke kshetra men desh-videsh men khyati arjit karta hai. jyotish shastra ke anusar lagn, pancham evan navam sthan men shubh grah sthit hon to manushya satvik devi-devtaon ki upasna karne vala evan safal bhavishyavakta hota hai tatha in sthanon par papagrahon ka samavesh ho to kshudra devi-devtaon jaise yakshini , bhut-pretadi ka upasak hota hai. agar ek se adhik pap grah hon ya papagrahon ki drishti ho to upasna virodhi hota hai.