jab koi tumhen tumhari adton se jagata hai to aur pira hoti hai. subah tum bari gahri nind men so rahe ho, bare maje ke sapne dekh rahe ho- aur koi hilane lagta hai ki utho! aur yah bhi ho sakta hai ki rat tum kahakar soe hoge ki mujhe utha dena, ki mujhe tren pakrni hai, ki mujhe kisi kam par jana hai. tumhare hi kahne ke karan koi admi tumhen subah utha raha ho, to bhi dushman malum parta hai, to bhi lagta hai ki yah dusht kahan se a gaya, ki ise jara bhi akal nahin hai, ki abhi ek karavat to aur le lene de ! tum khud kahte ho, to bhi jagane vala dushman malum parta hai. aur santon se to tumne kabhi kaha nahin ki jagao. aur yah tumhari nind bari purani hai aur ve tumhen jhakjhor dalte hain. ve tumhen hilate hain. ve kahte hain - utho ! ve tumhen chot karte hain. tum madhur sapna dekh rahe the. tum mahal dekh rahe the sone ka. tum dekh rahe the sundar striyan. tum dekh rahe the apsaraen. tum svarg men virajman the.
tum sinhasan par baithe the, devi-devta tumhare charon taraf nach rahe the aur tumhare yashogan kar rahe the. aur ye sajjan a gae aur tumhen hilane lage ki utho ki yah sab sapna hai, ki jago! sant se tum sada naraj hooge. jo sant se raji ho jae, vah sant ho gaya. ‘bhagat dekh raji hui, jagat dekh roi.’ mira kahti hai- bhagat dekh raji hui. bhagat dekh jo raji ho jae, vah bhagat. sant ko dekhakar jo raji ho jae, vah sant. sant bahut nahin hai. tumhen archnen hain. tum satya to janna hi nahin chahte, kyonki tum jite jhuth men ho. fraidrik nitshe ne kaha hai ki log mar jaenge, agar unke jhuth chin lie jaen. log jhuthon ke sahare jite hain. jhuthon se unki jindgi men chiknai bani rahti hai, lubrikent hai jhuth. koi stri tumse kah deti hai- ‘tumse sundar purush koi bhi nahin!’ ab yah sarasar jhuth hai.
itni bari prithvi par tumse sundar koi purush nahin! aur is stri ne n jane aise kitne purush hain, koi pariksha hui hai? koi olanpik hua hai? koi chunav hua hai, kahin tay hua hai ki kaun admi sabse jyada sundar hai? nahin, lekin tum bhi fikra nahin karte, halanki tum bhi jante ho ki yah sarasar jhuth hai. magar yah jhuth manne-jaisa lagta hai. tum kisi stri se kahte ho ki ‘tujhse mujhe jitna prem hai, kisi se n kabhi tha n kabhi hoga. aur janm-janam yah tikega, yah amar hai.’ yah jhuth islie hai ki yahi bat tum aur striyon se bhi pahle kah chuke ho. aur jhuth islie hai ki yahi bat bahut sanbhav hai ki tum aur striyon se age bhi kahoge. aur jhuth islie hai ki yahi bat aur purushon ne bhi is stri se pahle bhi kahi hai, tab bhi isne mana tha, aur jhuth islie hai ki kshanabhangur man se shashvat prem ho kaise sakega? man hi kshanabhangur hai. aj jo stri sundar lag rahi hai, kal ho sakta hai do kauri ki malum hone lage.
akasar aisa ho jata hai, stri mil jae to do kauri ki ho jati hai, n mile to prem kayam rahta hai. dhanyabhagi the majnu ki stri nahin mili, mil jati to sir forte. kahin baithe bajar men chana bechte hote. bal-bachche palte. nahin mili, to ‘laila-laila’ chilla rahe hain. ek admi ek paglkhane men gaya. usne ek kothri men ek admi ko sir pitte dekha. aur ek tasvir hath men lie chati se laga, ankhon se ansuon ki jaldhar bah rahi hai. to pucha us admi ne ki is pagal ko kya hua hai? usne kaha ki dekhte nahin vah tasvir! is stri ke piche divana tha. vah ise mili nahin. bat samajh men a gai ki ro raha hai, duahkhi ho raha hai. isi ke piche pagal ho gaya. uske samne ki kothri men ek dusra admi tha. vah apne kapre far raha tha aur divaron men ghunse mar raha tha aur sir patak raha tha jamin par aur bal noch raha tha.
pucha- ‘isko kya ho gaya?’ usne kaha- ‘ab iski mat pucho. jo stri usko nahin mili, vah isko mil gai. yah us stri ke milne ki vajah se pagal ho gaya.’ jo aj is kshan men lagta hai, vah ek kshan bad tikega? jo is kshan ki pratiti hai, vah is kshan ki pratiti hai, vah kal ke kshan men bhi hogi, pakka nahin hai. magar admi jhuth pasand karta hai. jhuth pyare lagte hain. jhuth men khushamad hai. jhuth fuslate hain. sach men chot hoti hai. yunan ke bahut bare vicharak pleto ne apne bhavishya ke rajya men kaviyon ko pravesh nahin diya hai. usne ayojna ki hai ki usne ripablik men, uska jo bhavishya ka kalpana ka rajya hai, uska jo ramrajya hai, usmen kaviyon ko koi jagah nahin hogi. kavi bare naraj the. aur logon ne pucha bhi pleto se ki yah bat kya hai? kaviyon se aisi kya narajgi hai? aur sab honge, kavi kyon nahin honge? to pleto ne kaha: kaviyon ke karan jhuth chalta hai.
aur mere rajya men jhuth nahin chahie, sach chahie. ab aur sapne nahin, ab yatharth chahie. lekin pleto ka rajya kabhi banega nahin! nitshe jyada sahi bat kah raha hai ki log jhuth men hi jite hain, log jhuth nahin chorte. jhuth hat jae to unki gari thahar jae. jhuth hat jae to jine-yogya karan hi n rah jae. koi is jhuth men jita hai ki dhan mil jaega to bara sukh hoga. yah jhuth hai. kisi ko kabhi dhan milne se sukh nahin hua. sari baten is paksh men gavahi deti hain ki kisi admi ko dhan milne se sukh nahin hua. magar fir bhi yah jhuth chalta hai ki dhan mil jaega to sukh hoga, pad mil jaega to sukh hoga. kisi ko kabhi nahin mila. manushya jati ka pura itihas nirpvad rup se siddh karta hai ki pad milne se kisi ko sukh nahin mila. anyatha buddh sinhasan chorakar kyon jate? nahin to mahavir rajamahal chor, janglon men kyon bhatkte?