brihaspati: devtaon ka guru khagoliya, pauranik evan jyotishiya drishtikon acharya avinash sinh surya ki parikrama karne vale grahon men brihaspati ka panchvan sthan hai. surya se brihaspati ki duri 4,833 lakh mil hai. iska vishuvtiya vyas 88,000 mil se kuch jyada aur dhruviya vyas 84,000 mil se kuch kam hai. iska ghanatva prithvi ka 1240 guna aur dravyaman 300 guna hai. iski nakshatra parikrama avdhi 11.9 varsh aur sanyuti kal 398.9 din hai. prithvi se brihaspati ki adhikatam duri 2476 lakh mil aur nyunatam 483 lakh mil hai. brihaspati apni dhuri par 10 ghante men ek chakra pura karta hai. yah ast hone ke ek mas bad udit hota hai, uske sava char mas bad vakri aur punah char mas bad margi hota hai aur fir uske sava char mas bad ast hota hai. brihaspati surya ki apeksha prithvi se dur hai aur surya ke prakash se hi prakashit hota hai. fir bhi jyotish men surya ya chandra se adhik mahatvapurn hai. surya pap grah hai aur uski kiran se prakashit hone vale guru v shukra shubh grah hain. brihaspati ke 16 upagrah hain. iska binb pila dikhai parta hai jiske charon or badlon ka ghera hai. pauranik drishtikon pauranik drishtikon se dev guru pit varn brihaspati ke hain. unke sir par svarn mukut tatha gale men sundar mala hai. ve pit vastra dharan karte hain tatha kamal ke asan par virajman hain. unke char hathon men kramshah dand, rudraksh ki mala, patra aur varad mudra sushobhit hain. puranon men brihaspati ko maharshi angira ka putra tatha devtaon ka purohit bataya gaya hai, jo apne gyan se devtaon ko unka yagya-bhag prapt kara dete hain. asur yagya men vighn dalakar devtaon ko bhukhon mar dena chahte hain. aisi paristhiti men dev guru brihaspati rakshoghn mantron ka prayog kar devtaon ki raksha karte hain tatha daityon ko dur bhaga dete hain. skand puran ke anusar, brihaspati ne prabhas tirth jakar bhagvan shankar ki kathor tapasya ki. unki tapasya se prasann hokar bhagvan shankar ne unhen devguru ka pad tatha grahatva prapt karne ka var diya. rigved ke anusar brihaspati atyant sundar hain. inka avas svarn nirmit hai. yah vishva ke lie pujniya hain. yah apne bhakton par prasann hokar unhen sanpatti tatha buddhi se sanpann kar dete hain, unhen sanmarg par le jate hain aur vipatti men unki raksha bhi karte hain. sharnagat vatsalata ka gun brihaspati men kut-kut bhara hua hai. jaisa kar bataya gaya hai, dev guru brihaspati ka varn pila hai. inka vahan rath hai jo sone ka bana hai tatha atyant sukhakar aur surya ke saman hai. yah jo vayu ke saman veg vale pile rang ke ath ghorane se yut hai. rigved ke anusar brihaspati ka ayudh svarn nirmit hai. inki ek patni ka nam shubh aur dusri ka tara hai. shubh se sat kanyaen utpann huin. tara se sat putra tatha ek kanya hui. unki tisri patni mamta se bharadvaj aur kach namak do putra utpann hue. brihaspati ke adhidevta indra aur pratyadhi devta brahma hain. jyotishiya drishtikon jyotishiya drishtikon se brihaspati ek grah hai jo prithvi lok ke sabhi jivon tatha vanaspatiyon ko prabhavit karta hai. brihaspati se prabhavit jatak kad men lanbe, sharirik taur par kuch mote aur kaf pravriti ke hote hain. unki ankhen aur bal kuch bhure ya sunhri aur avaj bhari hoti hai. aise jatak purusharthi, satyavadi, darshanik, vibhinn vigyanon men ruchi rakhne vale, bhaktivadi aur dharmik hote hain. brihaspati ko gyan ka pratik mana gaya hai, islie use guru bhi kaha jata hai. brihaspati se prabhavit jatak buddhi -vivek se bharpur hota hai. jinki janmakundli ve brihaspati shubhasth hota hai, uchch padon par karyarat hote hain. mantri, pradhanmantri, ai.e.esadhikari, acharya, pracharya, nyayadhish, arthashastri, adhyapak, lekhak, kavi, vakta, vaidya, jari-butiyon ke jankar, dharmik siddh purush adi ki janmakundli men brihaspati shubhasth hota hai. janm kundli men brihaspati ko dvitiya, pancham, navam aur ekadash ka karak mana gaya hai. dvitiya bhav se dhan, jyoti, vakshakti, kutunb adi ka vichar kiya jata hai. pancham se vidya buddhi, putra santan, navam se dharm, kartavya, pita, bhagya adi ka aur ekadash bhav se labh, bari bahan, bhai adi ka vichar kiya jata hai. brihaspati dhanu aur min rashiyon ka svami hai. punarvasu, vishakha aur purva bhadrapad nakshatron ka svamitva bhi ise prapt hai. yah kark rashi ke 5 anshon par param uchch aur makar ke 5 anshon par param nich hota hai. dhanu rashi ke 0 se 10 anshon tak ise mul trikon aur dhanu rashi ke hi 10 se 30 anshon tak svagrihi mana jata hai. vakri aur margi sthiti men brihaspati surya se 11 ansh ki duri par ast aur udit hota hai. kundli men brihaspati se pancham, saptam aur navam bhavon par iski purn drishti hoti hai. jin bhavon par brihaspati ki drishti hoti hai, unke shubh fal jatak ko milte hain. jin bhavon men brihaspati avasthit ho falon ki hani karte hain. dhanu aur min lagn men yah yogkarak hota hai. yog karak brihaspati jis bhav men sthit hota hai aur jis par drishti deta hai, jatak ko un sabhi bhavon ke shubh fal milte hain. kanya aur mithun lagn ke lie brihaspati badhak hota hai, islie ukt lagn vale jatkon ke karyon men badha dalta hai. vrish, tula aur makar lagn men brihaspati akarak grah hota hai. yah shubh nahin hai, islie in lagnon men brihaspati shubh fal nahin deta hai. brihaspati ki sthiti, jigar ki garbri, jalodar, udr-vayu, motapa, pachan men garbri, gurde ka rog de sakta hai. brihaspati ke ashubh prabhavon se bachne ke lie pratyek amavasya tatha brihaspati var ko vrat karna aur pila pukhraj dharan karna chahie. brahmanon ko dan men pila vastra, sona, haldi, ghrit, pila ann, pukhraj, ashva, pustak, madhu, lavan, sharkara, bhumi tatha chatra dan men dena chahie. brihaspati ko shant karne ke lie bij mantra ¬ gran grin graun sah guruve namah’ tatha samanya mantra brin brihaspataye namah ka jap karna chahie.
Kya aapko lekh pasand aaya?
Subscribe