sabhi jante hain ki brihaspati grah, samast grah pindon men sabse adhik bhari aur bhimkay hone ke karan, guru athva brihaspati ke nam se jana jata hai. yah prithvi ki kaksha men mangal ke bad sthit hai aur, surya ko chor kar, sabhi anya grahon se bara hai. ise surya ki ek parikrama karne men 12 varshon ka samay lagta hai. jyotish shastra ke adhar par brihaspati ka varn pila, parantu netra aur shir ke kesh kuch bhurapan lie hue hote hain. iski chati pusht aur sharir bara hai. yah kaf pradhan hai. iski buddhi uttam hoti hai. yah kark rashi men 5 ansh tak uchch ka hota hai aur makar rashi men 5 ansh tak nich ka hota hai. yah samast grahon men sarvadhik balshali evan atyant shubh mana jata hai. iski vritti komal hoti hai aur yah sanpatti tatha gyan ka pradata aur manvon ka kalyan karne vala mana gaya hai. ise devtaon ka guru bhi mana gaya hai. yah nyay, dharm evan niti ka pratik, mahan pandit, vrihat udar, gaur varn aur sthul sharir vala, chatur, satva gun pradhan, parmarthi, brahman jati, akash tatva vala dvipad grah hai. iska var brihaspati tatha bhagyank 3 hanai. mithe ras ka adhipti aur hemant ritu ka svami brihaspati hi hai.
brihaspati tin nakshatron-punarvasu, vishakha aur purvabhadrapad ka svami hai, jis karan kramshah mithun tatha kark, tula evan vrishchik aur kunbh, min rashi par iska adhipatya hota hai. mithun, tula evan kunbh rashi par punarvasu, vishakha evan purvabhadrapad ke pratham tin charnon ka aur shesh, arthat chaithe charan ka prabhav kramshah kark, vrishchik tatha min rashi par parta hai. isi karan in rashiyon ke jatkon men brihaspati ke gunon ka samavesh dekhne ko milta hai. brihaspati ke 12 bhavon men sthit hone ke bhinna-bhinn falon ko janne se purva yah bhi jan lena hoga ki brihaspati kin bhavon ka karak hai. brihaspati multah 5 bhavon, arthat dvitiya, pancham, navam, dasham tatha ekadash bhavon ka karak hai tatha brihaspati do rashiyon-dhanu evan min par apna adhipatya rakhta hai. dhanu rashi men yah mul trikon men hota hai. yah grah vivek, charitra, buddhi, svasthya evan ayu ka bhi karak hai. dhatuon men svarn aur kansya, ann men chane ki dal evan gehun, jau, ghi evan pit vastra ka adhipti guru hi hai. siddhantvadita, udarta, shanti evan saumyata, mantritva, purohitai aur rajniti se sanbandhit gun brihaspati se prabhavit jatkon men samanyatya dekhne ko milte hi hain. vibhinn sthitiyon ke anusar brihaspati jatak ko nitigya, kshama dan dene vala, sukhi, santanyukt, dani aur do prakar ke vyavsay se labh dene vala banata hai.
kamjor brihaspati ki kanudli men sthiti vyakti ko mandbuddhi, chintagrast, grihasth jivan men duahkhi, santanrhit aur asvasth banati hai. iske kuprabhav ko rokne ke lie brihaspati ke ratn pukhraj ko, svarn dhatu men, janm nakshatra ke dusre, chaithe, chathe, athven tatha naven nakshatra men, shukla paksh men, jis din chaithi, navin evan chaidhvin tithi n ho tatha shubh yog ho, tarjani ungli men dharan karna chahie. ab brihaspati ke kundli ke vibhinn bhavon men sthit hone ke prabhavon ki charcha karte hain. jis jatak ke lagn men brihaspati sthit hota hai, vah jatak divya deh se yukt, abhushndhari, buddhiman, lanbe sharir vala hota hai.
aisa vyakti dhanvan, pratishthavan tatha rajdrbar men man-samman pane vala hota hai. sharir kanti ke saman, gunvan, gaur varn, sundar vani se yukt, satoguni evan kaf prakriti vala hota hai. dirghayu, satkarmi, putravan evan sukhi banata hai lagn ka brihaspati. jis jatak ke dvitiya bhav men brihaspati hota hai, uski buddhi, uski svabhavik ruchi kavya-shastra ki or hoti hai. dvitiya bhav vani ka bhi hota hai. is karan jatak vachal hota hai. usmen aham ki matra barh jati hai. kyonki dvitiya bhav kutunb, vani evan dhan ka hota hai aur brihaspati is bhav ka karak bhi hai, is karan dvitiya bhav sthit brihaspati, kark: bhavon nashyati ke sutra ke anusar, is bhav ke shubh falon men kami hi karta dekha gaya hai. dhanarjan ke lie eri-choti ka jor lagana, vani ki pragalbhata, athva bahut kam bolna aur parivar men santulan banaye rakhne hetu use prayas karne parte hain. rajdrbar men vah dand dene ka adhikari hota hai. anya log iska man-samman karte hain. aisa jatak shatrurhit hota hai. ayurbhav par purn drishti hone ke karan vah dirghayu aur vidyavan hota hai.
pap grah se yukt hone par shiksha men rukavten ati hain tatha vah mithyabhashi ho jata hai. dushit guru se shubh falon men kami ati hai aur ghar ke baron se virodh karata hai. jis jatak ke tritiya bhav men brihaspati hota hai, vah mitron ke prati kritaghn aur sahodron ka kalyan karne vala hota hai. varah mihir ke anusar vah kripan hota hai. isi karan dhanvan ho kar bhi vah nirdhan ke saman parilakshit hota hai. parantu shubh grahon se yukt hone par use shubh fal prapt hote hain. purush rashi men hone par shiksha apurn rahti hai, parantu vidyavan pratit hota hai. is sthan men sthit guru ke jatak ke lie sarvottam vyavsay adhyapak ka hota hai. shikshak pratyek sthiti men ganbhir evan shant bane rahte hain tatha paristhitiyon ka kushltapurvak samna karte hain. jis jatak ke chaturth sthan men balvan brihaspati hota hai, vah devtaon aur brahmanon se priti rakhta hai, raja se sukh prapt karta hai, sukhi, yashasvi, bali, dhan-vahnadi se yukt hota hai aur pita ko sukhi banata hai. vah suhriday evan medhavi hota hai. is bhav men akela guru purvajon se sanpatti prapt karata hai. jis jatak ke pancham sthan men brihaspati hota hai, vah buddhiman, gunvan, tarkashil, shreshth evan vidvanon dvara pujit hota hai. dhanu evan min rashi men hone se uski kam santti hoti hai. kark men vah santtirhit bhi dekha gaya hai. sabha men tarkanukul uchit bolne vala, shuddhachit tatha vinamra hota hai. panchamasth guru ke karan santan sukh kam hota hai. santan kam hoti hai aur usse sukh bhi kam hi milta hai. ripu sthan, arthat janm lagn se chathe sthan men brihaspati hone par jatak shatrunashak, yuddhajaya hota hai evan mama se virodh karta hai.
svayan, mata evan mama ke svasthya men kami rahti hai. sangit vidya men abhiruchi hoti hai. pap grahon ki rashi men hone se shatruon se pirit bhi rahta hai. guru-chandra ka yog is sthan par dosh utpann karta hai. yadi guru shani ke ghar rahu ke sath sthit ho, to rogon ka prakop bana rahta hai. is bhav ka guru vaidya, daktar aur adhivaktaon hetu ashubh hai. is bhav ke guru ke jatak ke bare men log sandigdh aur sanshyatma rahte hain. purush rashi men guru hone par jua, sharab aur veshya se prem hota hai. inhen madhumeh, bahumutrata, harniya adi rog ho sakte hain. dhanesh hone par paitrik sanpatti se vanchit rahna par sakta hai. jis jatak ke janm lagn se saptam bhav men brihaspati ho, to aisa jatak, buddhiman, sarvagunsanpann, adhik striyon men asakt rahne vala, dhani, sabha men bhashan dene men kushal, santoshi, dhairyavan, vinamra aur apne pita se adhik aur uchch pad ko prapt karne vala hota hai.
iski patni pativrata hoti hai. mesh, sinh, mithun evan dhanu men guru ho, to shiksha ke lie shreshth hai, jis karan aisa vyakti vidvan, buddhiman, shikshak, pradhyapak aur nyayadhish ho sakta hai. jis vyakti ke ashtam bhav men brihaspati hota hai, vah pita ke ghar men adhik samay tak nahin rahta. vah krishkay aur dirghayu hota hai. dvitiya bhav par purn drishti hone ke karan dhani hota hai. vah kutunb se sneh rakhta hai. uski vani sanymit hoti hai. yadi shatru rashi men guru ho, to jatak shatruane se ghira hua, vivekhin, sevak, nimn karyon men lipt rahne vala aur alsi hota hai. svagrahi evan shubh rashi men hone par jatak gyanpurvak kisi uttam sthan par mrityu ko prapt karta hai. vah sukhi hota hai. bahya sanbandhon se labhanvit hota hai. stri rashi men hone ke karan ashubh fal aur purush rashi men hone se shubh fal prapt hote hain.
jis jatak ke navam sthan men brihaspati ho, uska ghar char manjil ka hota hai. dharm men uski astha sadaiv bani rahti hai. usapar rajkripa bani rahti hai, arthat jahan bhi naukri karega, svami ki kripa drishti usapar bani rahegi. vah uska sneh patra hoga. brihaspati uska dharm pita hoga. sahodron ke prati vah samarpit rahega aur aishvaryashali hoga. uska bhagyavan hona avashyanbhavi hai aur vah vidvan, putravan, sarvashastragya, rajmantri evan vidvanon ka adar karne vala hoga. jis jatak ke dasven bhav men brihaspati ho, uske ghar par dev dhvaja fahrati rahti hai. uska pratap apne pita-dada se kahin adhik hota hai.
usko santan sukh alp hota hai. vah dhani aur yashasvi, uttam acharan vala aur raja ka priya hota hai. ise mitron ka, stri ka, kutunb ka dhan aur vahan ka purn sukh prapt hota hai. dasham men ravi ho, to pita se, chandra ho, to mata se, budh ho, to mitra se, mangal ho, to shatru se, guru ho, to bhai se, shukra ho, to stri se evan shani ho, to sevkon se use dhan prapt hota hai. jis jatak ke ekadash bhav men brihaspati ho, uski dhanvan evan vidvan bhi sabha men striti karte hain. vah sona-chandi adi amulya padarthon ka svami hota hai. vah vidyavan, nirogi, chanchal, sundar evan nij stri premi hota hai.
parantu kark: bhavon nashyati, ke karan is bhav ke guru ke fal samanya hi drishtigochar hote hain, arthat inke shubhatva men kami ati hai. jis jatak ke dvadash bhav men brihaspati ho, to uska dravya achche karyon men vyay hone ke pashchat bhi, abhimani hone ke karan, use yash prapt nahin hota hai. nirdhan , bhagyahin, alp santti vala aur dusron ko kis prakar se thaga jae, sadaiv aisi chintaon men vah lipt rahta hai. vah rogi hota hai aur apne karmon ke dvara shatru adhik paida kar leta hai. uske anusar yagya adi karm vyarth aur nirarthak hain. ayu ka madhya tatha uttararddh achche hote hanai. is prakar yah anubhav men ata hai ki guru kitna hi shubh grah ho, lekin yadi ashubh sthiti men hai, to uske falon men shubhatva ki kami ho jati hai aur ashubh fal bhi prapt hote hain aur shubh sthiti men hone par guru kalyankari hota hai.