piliya  

piliya: yakrit koshikaon ki vikriti acharya avinash sinh mahangriya jivan men anyanya karnon se piliya ganbhir shakla le chuka hai jo kisi bhi ayu varg ke stri-purush ko samy-asamay grast kar leta hai. is lekh men prastut hai, is rog ke karan, lakshan tatha sahaj nivaran. pitt pittashay se nikalakar grahni men n jakar sidhe rakt men jae, to pitt samast sharir men fail jata hai aur pitt men maujud bilirubin namak ranjak padarth sukshm rakt vahiniyon se nikalakar tvacha, ankh aur vibhinn angon men failakar unhen pila rang deta hai, jisse samast sharir pila lagne lagta hai kyonki sharir ka pilapan is rog ka mukhya lakshan hain, islie is rog ka nam ‘‘piliya’’ hai. yakrit koshikaon men pitt ka nirman hota hai, jo pittashay men ekatrit hota hai. pitt ahar ke pachan men sahayak hota hai. jab ahar, amashay se gujrta hua grahni men pahunchta hai to usi samay pitt bhi pittashay se nikalakar grahni men ata hai aur ahar ke pachan men mahatvapurn bhumika nibhata hai. kintu jab rakt men bilirubin ki matra barh jati hai to gurde use chanakar rakt ko saf karne men sahayak nahin hote aur mutra ka rang pila ho jata hai. aise hi samast sharir ka rang pila hone lagta hai. piliya rog ke mukhya karn: pitt pranali ka vikaragrast hona, yakrit ki koshikaon ki kshati ya ismen sujan a jane ke karan jab yakrit bilirubin ko pitt men mishrit nahin kar pata hai, to yah bilirubin padarth sidhe rakt men milta hai. parinamtah sharir men piliya ke lakshan prakat hote chale jate hain. yakrit koshikaon ki vikriti ke bhi do karan hai. vishanu: piliyakarak vishanu dushit khan-pan ke dvara antra sthan men pahunch jata hai aur fir vahan se rakt sancharan dvara yakrit tak pahunch jata hai jisse yakrit koshikaen vikrit ho jati hai aur pitt men bilirubin padarth ko mishrit nahin hone deti aur piliya ho jata hai. aushdhi aur vishakt padarthajanya piliya: jab kisi vishesh rog ke karan lagatar lanbe samay tak aushdhiyon ka sevan kiya jata hai, to viprit prabhav se yakrit ki karyakshamata kam ho jati hai, jisse vishakt aur hanikarak vyarth padarth sharir men hi ekatrit hote chale jate hain. unhin vyarth padarthon men bilirubin bhi ek hai jiske karan piliya hota hai. pittashay evan grahni ke madhya pitt pranali men avrodh hone se piliya hota hai. ahar men vasa (kolestrael) ki matra adhik rahne, athva bar-bar bhari bhojan karte rahne se sharir men vasa ka sahi pachan nahin ho pata. parinamasvarup rakt men uski matra barhne lagti hai tatha rakt dhamniyon ki antrik bhittiyon ke upar jamne lagti hai, jisse unmen avrodh utpann hone lagta hai. is avrodh ke karan pitt grahni tak n pahunchakar sidhe rakt men milne lagta hai aur piliya ho jata hai. rog ke lakshana: rogi ka sara sharir, chehra, ankhe, nakhun, honth adi pile ho jate hain tatha mutra bhi gahre pile rang ka ane lagta hai. rogi ki pachan prakriya puri tarah bigar jati hai evan pyas barh jati hai. rogi ke munh ka svad bigar jata hai. bhukh mar jati hai. prayah kabj rahti hai. kabhi-kabhi dast bhi ane lag jate hain. rogi kamjori, alasya, thakavat tatha bechaini mahsus karta hai. piliya ke upay: muli ke patton ka ras chini ya mishri milakar pratahkal khali pet pien. yah piliya ke lie mahatvapurn aushdhi hai. do saptah tak ke sevan se piliya rog se rahat milti hai. ganne ka ras piliya rogi ke lie labhkari hota hai. bari harar aur chini dono barabr-barabar pisakar rogi ko rojana subh-sham pani ke sath-sath ek chammach den. kuch dinon men piliya dur ho jaega. sonth, giloy aur talmkhane ke bij tinon ko barabar matra men lekar pis len aur tis gram dudh men dal kar rat ko sone se pahle pratidin lene se do-tin saptah men piliya samapt ho jata hai. santre ka ras, kachche nariyal ka ras, fate dudh ka pani, dahi ki chach men namak aur kali mirch dalakar pina labhkari hai. kachche papite ke ras ki bundon ko batashe men dalakar do-tin saptah khane se piliya dur hota hai. ak ke patte aur mishri donon ko barabar matra men pis le aur choti-choti goliyan banakar rakh len. din men do-do goli tin bar pani ke sath len, labh hoga. mehandi ki pattiyan mitti ke bartan men pani dalakar chaibis ghante tak bhigo kar rakhen aur pratahkal khali pet pine se piliya rog dur hota jata hai. pudine ka ras nikalakar, chini milakar subah das din tak pine se piliya dur hota hai. liv-52 ki do-do goli din men tin bar lene se piliya men aram milta hai. nim ke patton ke ras men chini milakar pine se piliya men labh hota hai. shilajit, kesar aur chini milakar bakri ke dudh ke sath sevan karne se labh hota hai. trifla, chini aur ghi milakar pani ya dudh ke sath lene se piliya rog men labh hota hai. anvle ka ras ya anvle ke murabbe ko sevan piliya men labhkari hota hai.