kamal ke janm ke avasar par surendra ji ke parivar men atyant khushiyan manai gain. uske dada dadi ki khushi ka paravar n tha. surendra ji apne mata-pita ki akeli santan the aur aj itne varsh bad kamal ka janm hua tha. surendra ji ek uchch sarkari pad par asin the aur unka sthanantaran kafi jaldi-jaldi hota rahta tha. islie kamal ko dada dadi ki mamta evan sneh prapt hua aur unhin ke ghar uski parvrish hui. kamal bachapan se hi honhar aur parhne likhne ka shaukin tha.
apne pratham prayas men hi usne apni si. e. ki pariksha uttirn kar li. atyant dhumdham se uska vivah madhuri se kiya gaya. madhuri ek sanbhrant parivar ki sundar aur sushil kanya thi. vivah ke kuch salon bad unke do putra hue aur parivar men atyant khushiyan manai gain. suranedra ji apni jindgi se behad santusht the. baki bachche bhi achchi tarah setal ho gae the. unke ghar men kuch nirman ka karya chal raha tha ek din kamal subh-subah chat par kam ka muayna karne gaya. bekhyali kahen ya bhagya ka khel chat, ka ek bhag jahan munder nahin thi, ekadam se niche gir para.
turant use aspatal le jaya gaya. kamal pure panch mahine tak batra aspatal men koma men raha aur use jivit rakhne ke lie ventiletar lagaya gaya. uske merudand ke 6 paeint par dabav ke karan uski nabhi ka hissa bilkul bekar ho gaya hai. mastishk ko karya karne men bhi lagabhag ek varsh laga lekin niche ka pura hissa sangyahin hone se mano uski jindgi khatm ho gai. is hadse ko bite 5 varsh ho chuke hain.
aj uska mastishk puri tarah sakriya hai, vah soch-samajh sakta hai, kintu uske sharir ka nichla bhag sangyashunya hai aur uske malmutra par bhi uska niyantran nahin hai. uski is kathin ghari men uske mata-pita, patni aur bachchon ko bhi uske sath barabar mansik tanav jhelna para. yadi kamal ke jivan ke drishtikon se sochen to uska jivan use nirarthak sa lagta hai jabki uske mata-pita aur patni ko yah santosh hai ki vah unke pas hai.
lekin iske lie unhen kitne kasht, kitni vedna sahni par rahi hai aur kitna sanyam rakhna par raha hai yah andaj lagana bahut mushkil hai. sanyam, vivek, tyag adi ki shiksha lena to bahut saral hai parantu svayan unhen lanbe samay tak nibha pana vastav men ek dushkar karya hai. madhuri ne kabhi svapn men bhi nahin socha tha ki uske jivan men is tarah ki ghatna ho sakti hai.
vivah ke kuch varsh bad ki is ghatna ne use buri tarah jhakjhor diya tha. kamal bhi bevajah apna gussa us par utarta rahta hai. vah khun ke ansu pi kar rah jati. jahan uska pati prem evan kartavya use kamal ki seva karne ko prerit karta vahin mastishk kuch aur sochta. ek andhera sannata mano uske jivan men cha gaya tha. uski vyatha sunne ke lie vahan koi nahin tha.
chunki madhuri ki sahi janm tithi nahin mil saki islie is durghatana ka akalan ham surendra ji, kamal aur uske putra ki kundliyon se karenge. kamal ke sath jo dardanak ghatna ghati uske jyotishiya karan ke atirikt uske parivar ke anya logon ki grah dasha bhi uske anurup hi hai. aie sarvapratham uski kundli par vichar karte hain. chathe bhav ka sanbandh sharirik angon ke hisab se nabhi ke niche ke angon se bhi hai. is bhav ka svami mangal apni nich rashi men sthit hai.
sath hi yah grah is bhav ka karak bhi hota hai. dusri or kundli ke shukra grah ke barhven evan satven bhavon ka svami hone se prabal markesh hai. vah bhi chathe bhav men sthit hai. 14 mai 2001 ko uske sath jab yah ghatna ghati, us par shani ki mahadsha chal rahi thi. shani grah 29 ansh par tatha mangal ke nakshatra men hone se kamjor hai. yah ghatna thik us samay ghati jab shani men shani ki antardasha evan shukra ki pratyantar dasha chal rahi thi. uske pita ki kundli men us samay shani men surya ki antardasha chal rahi thi.
unki kundli men shani grah tritiya bhav men ast hai, sath hi ashtamesh surya ke sath yut hone se ashubh ho raha hai. is shani ki santan bhav pancham sthan par purn drishti par rahi hai. lagn gochar men us samay surya evan shani chalit gochar ke anusar vrish rashi arthat unke santan bhav se gujar rahe the jiske falasvarup unka santan paksh sukhamay nahin raha. iske atirikt saptamansh kundli men, jisse santan sukh ka vishesh vichar kiya jata hai, lagnesh grah surya bhi ashtam sthan men sthit hai, atah santan ko bhayankar kasht hua.
uske bare putra ki kundli ke anusar pitri sthan ka svami shukra grah kendradhipatya dosh se yukt hai evan shukra par vyayesh chandrama ki drishti bhi par rahi hai, jisse pitri sukh ki kami evan pita ki or se dukh hone ka yog ban raha hai. uski kundli men bhi is ghatna ke samay pitri sthan men chalit gochar ke anusar shani evan surya ki ashubh yuti ban rahi thi jiske falasvarup use apne pita ki or se dukhi hona para. kamal ko is kasht se mukti dilane men sahayak pathkon ke vichar athva upay amantrit hain.