sant ka kahna hai vahi- jo hai, jaisa; vaisa ka vaisa. patthar ko patthar, gulab ko gulab. jaisa hai vaisa. fir chot lage to lage, n lage to n lage. jise nahin lagegi chot, ya to vah bahra hai ya jag gaya. jise chot lagegi, use lagni hi chahie; kyonki chot hi jagaegi, nahin to vah jagega kaise ! main to vahi kahta hun jo hai. usmen rattibhar fark nahin karna chahta hun. mainne suna, ek ganv men ek mahatma ae. pravachan de rahe the to samne hi ek mahila apne bachche ko lie baithi thi, vah bachcha bari garabar kar raha tha. ab bachche ko to kuch matalab hi nahin mahatma se. kabhi kuch kahta. mahatma bhi pareshan ho rahe the. unka pravachan bhi thik se nahin chal pata tha, us bachche ke karan. vah mahila use bar-bar dantti-daptti, dabati; magar vah fir fir uthakar khara ho jata, kuch fir kahta. akhir mahatma ke bardasht ke bahar ho gai, jab bachche ne yah kaha ki mujhe peshab laga hai. man ne usko kaha- ‘chup rah !’ magar vah kahe ko chup rahe ! vah bola ki mujhe jor se peshab laga hai. bachche bhi hote hain, ve bhi apna rasta nikal lete hain ki ab tum unhen daba bhi nahin sakte.
abhi-abhi aisakrim mang raha tha thori der pahle to chalo samjha-bujha diya ki sham ko de denge, magar peshab laga to ab sham thore hi. usne bhi tarkib nikali. akhir bachche men buddhi to hai hi. usne bhi badha khari kar di. usne kaha- ab aisi chij lagi hai ki ab isi vakt hona chahie. akhir mahatma se nahin raha gaya. mahatma ne kaha ki sun devi, bachche men sanskar nahin hai. tu bare ghar ki hai, pratishthit kul tera, samriddh hai; bachche ko kuch sanskar de. satsang de, mandir men is tarah ke shabd bole jate hain ! peshab ! to mahila ne kaha - main ise aur kaun-sa shabd sikhaun? to unhonne kaha ki kuch bhi sikha de, koi bhi ek pratik shabd. samjho ki ise kah de ki ‘mujhe gana gana hai.’ jab bhi ise peshab lage, yah kah de ‘gana gana hai’. kisi ko pata bhi n chalega, tu apne le gai bahar. magar yah kya ki bich men khara hokar vah kah raha hai ! aur idhar brahma-chacha chal rahi hai aur ise peshab laga hai ! mahila ko bhi bat janchi. usne jakar bachche ko khub samjhaya-bujhaya. vah bachcha raji bhi ho gaya. ghar men bhi usse kaha- tu isi ka abhyas kar, nahin to ekadam se satsang men kaise abhyas karega ! to ghar men bhi vah isi ka abhyas karta.
kabhi bhi jata to kahta ‘gana gana hai’. fir tin mahine bad jhanjhat hui. sanyog ki bat ki mahatma fir ae ganv. usi mahila ke ghar mehman hue. rat ko, sanyog ki koi parosi bimar ho gaya bahut aur mahila ko jana para. vah bachcha akela sone ko raji nahin tha, to usne kaha ki mahatma ke pas so jao. to mahatmaji ke pas sula kar chali gai. rat ke koi do baje honge. mahatmaji ki bari tond layabaddh niche upar ho rahi thi aur unki nak se saton svar ek sath nikal rahe the. ve bare mast the apni nind men. tabhi us bachche ne unhen hilaya aur usne kaha ki mahatmaji, mahatmaji ! gana gana hai. mahatma ne kaha- had ho gai ! dhat tere ki ! adhi rat gana gana hai? yah bhi koi bat hui? so ja chupchap. mahatma ne jor se dabkaya use to vah theri der to para raha; lekin jab ‘gana gana hi hai’ to vah para bhi kaise rahe! usne fir thori der bad jab unka svar fir jamne laga aur tond hilne lagi aur avaj fir niklne lagi, bachche ne fir unhe hilaya aur kaha mahatmaji, gana gana hi parega. mahatma ne kaha- tu sone dega rat bhar ki nahin? yah kis tarah ka gana? din men gana ! chupchap se ja, nahin to do chapten laga dunga.
ab mahatma ne chapton ki bat kahi to vah bechara fir chup rah gaya; lekin ab vah chup rahe bhi kaise, gana gana hi tha. fir usne mahatma ko hilaya. thori der bad usne kaha- mahatmaji subah tak ruk nahin sakta, abhi gaunga ! mahatma ne kaha- muhalle-paros ke logon ko bhi jaga dega. achchi jhanjhat teri man mere piche laga gai ! yah koi .... tu chupchap so ja . gana koi aisi chij thore hi hai ki abhi itti jaruri hogi ki abhi ho gae. bachche ne kaha - mahatmaji, ga lene do; nahin to gana bistar men hi nikal jaega. mahatma bahut ghabra gae ki gana bistar men nikal jae..... to unhonne kaha ki dekh, shorgul machega, pas-paros ke log .... kahan ka tera gana, kya tera gana ! tu mere kan men chupchap ga de aur fir so ja. bachche ne kaha- ‘fir mat kahna ap!’ usne ga diya. gun-guna gun-guna gana ! jab ga diya tab mahatma ko bodh aya. magar tab tak bahut der ho chuki thi. main, bat jaisi hai, use vaisi hi kah dena pasand karta hun. idhar gol-mol baten khojne men koi sar nahin hai; usse jhanjhten barhti hain. tumhare pas kafi jhuth vaise hi ikatthe ho gae hain. un jhuthon ko tor dalna hai. in sare jhuthon men sabse bara jhuth hai ki indriyon ko vash men rakhna anivarya hai dharm ke lie.
yah sabse bara buniyadi jhuth hai. parmatma indriyan deta hai aur mahatma sikhate hain ki indriyon ko nasht kaise karo ! jarj gurjief kahta tha ki mere anubhav men ek bat bari ajib ai hai ki mahatma parmatma ke viprit malum parte hain. yah bat vastav men bari mulyavan hai. parmatma indriyan deta hai aur mahatma kahte hain- indriyon ka daman karo. yah bat janchti nahin. yah dharmik nahin ho sakti. indriyon ko parishuddh karo, daman nahin. indriyon ka nikhar karo, parishkar karo. ankhon ko itna ujjval banao ki jahan bhi, jo bhi dikhai pare, parmatma hi anubhav ho. kanon ko itna shuddh karo ki jo bhi svar sunai pare, vah usi ke anhdnad ka ang ho. prem ko aisa paripurn karo ki jis par bhi prem dalo, vahi tumhara krishn ho jae. to main indriyon ke daman ke paksh men hi nahin hun. jo paksh men hain, ve dharmik nahin hain. lekin indriyon ke daman karne ki bat logon ko janchi. janchi islie, daman karne se ahankar ko maja ata hai. kisi ko bhi dabao to ahankar ko maja ata hai. dusre ko dabao to bhi maja ata hai. apne ko dabao to bhi maja ata hai. ahankar ko maja hi dabane men ata hai. kisi ki chati par baith jao to maja ata hai, apni hi chati par baith jao to bhi maja ata hai.
ahankar sangharsh se jita hai. to ya to dusron se laro aur dusron ko harao. magar dusre se larna hamesha sanbhav nahin hota aur mahangi bhi bat hai- to apne se hi laro, apne ko hi dabao. ya to dusron ko jito ya apne ko jito- magar jito jarur. jahan jit hai, vahan ahankar ko maja ata hai ki main kuch khas, main vishisht. to indriyon ko dabane ki bat ahankariyon ko khub jami. aur samaj ko bhi yah bat jami, kyonki jo indriyon ko dabane men lag jata hai, vah samaj ke lie sahyogi ho jata hai, vah dusron ko nahin dabata. nahin to vah dusron ko dabaega. dabane ka kahin use ras hai to dabane ka ras vah nikalega. agar apne ko dabane lage to samaj suvidha men ho jata hai. us admi se jhanjhat miti. vah ab kisi dusre ko nicha dikhana chahta hai. vah apne hi sath jujh raha hai. vah apne hi daen-baen hath ko lara raha hai. vah andhere men apni hi chaya se lar raha hai, vah jane, uska kam jane. samaj kahta hai- yah sajjan admi hai. ‘durja’ samaj use kahta hai, jo dusron ko dabata hai- dushta! jo apne ko dabata hai, usko kahta hai ‘sadhu’,. magar donon ke piche raj kya hai. bat to ek hi hai. dabane ka ras hi ahankar hai. aur jab tak dabana hai, tab tak tum samarpan n kar sakoge. kyonki dabana sankalp hai.