vastu ka maulik rup evan manav jivan men iska mahatva pan. mahesh chandra bhatt vastu ek prachin vigyan hai. hamare rishi manishiyon ne hamare aspas ki srishti men vyapt anisht shaktiyon se hamari raksha ke uddeshya se is vigyan ka vikas kiya. vastu ka udbhav sthapatya ved se hua hai, jo atharvaved ka ang hai. is srishti ke sath-sath manav sharir bhi prithvi, jal, agni, vayu aur akash se bana hai aur vastu shastra ke anusar yahi tatva jivan tatha jagat ko prabhavit karne vale pramukh karak hain. bhavan nirman men bhukhand aur uske aspas ke sthanon ka mahatva bahut aham hota hai. bhukhand ki shubh-ashubh dasha ka anuman vastuvid aspas ki chijon ko dekhakar hi lagate hain. bhukhand ki kis disha ki or kya hai aur uska bhukhand par kaisa prabhav parega, iski jankari vastu shastra ke siddhanton ke adhyayan vishleshan se hi mil sakti hai. iske siddhanton ke anurup nirmit bhavan men rahne valon ke jivan ke sukhamay hone ki sanbhavna prabal ho jati hai. har manushya ki ichcha hoti hai ki uska ghar sundar aur sukhad ho, jahan sakaratmak urja ka vas ho, jahan rahne valon ka jivan sukhamay ho. iske lie avashyak hai ki ghar vastu siddhanton ke anurup ho aur yadi usmen koi vastu dosh ho, to uska vastusammat sudhar kiya jae. yadi makan ki dishaon men ya bhumi men dosh ho to us par kitni bhi lagat lagakar makan khara kiya jae, usmen rahne valon ki jivan sukhamay nahin hota. mugal kalin bhavnon, misra ke piramid adi ke nirman-karya men vastushastra ka sahara liya gaya hai. ghar ke vastu ka prabhav usmen rahne vale sabhi sadasyon par parta hai, chahe vah makan malik ho ya kirayedar. ajakal ke is mahangai ke daur men makan banana ek bahut bari samasya hai. log jaise-taise jor-tor karke apne rahne ke lie makan banane hetu bhukhand kharid lete hain. jaldabaji men athva sasti jamin ke chakkar men ve bina kisi shastriya parikshan ke bhumi kharid lete hain, aur is tarah kharidi gai jamin unke lie ashubh siddh hoti hai. us par bane makan men rahne vale pure parivar ka jivan kashtamay ho jata hai. aj flaiton ka chalan hai. ye flait aniyayimat akar ke bhukhandon par bane hote hain. ab ek chote se bhukhand par bhi ek boring, ek bhumigat pani ki tanki v septik taink banae jate hanai. lekin gyanabhav ke karan makan ke in angon ka nirman aksar galat sthanon par ho jata hai. faltah sanpurn parivar ka jivan dukhamay ho jata hai. bhautiktavad ke is yug men jahan sharirik sukh barhe hain, vahin logon ka jivan tanavagrast bhi hua hai. is tanav ke vaise to kai karan hote hain, parantu vastu siddhanton ke pratikul bana bhavan bhi iska ek pramukh karan hota hai. purane samay men sabhi ghar lagabhag aytakar hote the. gharon men am taur par boring, pani ki bhumigat tanki, septik taink ityadi nahin hote the. jamin samatal hua karti thi. yahi karan tha ki tab logon ka jivan is tarah tanavagrast nahin hua karta tha. vastu siddhant ke anurup nirmit bhavan evan usmen vastusammat dishaon men sahi sthanon par rakhi gai vastuon ke falasvarup usmen rahne vale logo ka jivan shantipurn aur sukhamay hota hai. islie uchit yah hai ki bhavan ka nirman kisi vastuvid se paramarsh lekar vastu siddhanton ke anurup hi karna chahie. is tarah, manushya ke jivan men vastu ka mahatva aham hota hai. iske anurup bhavan nirman se usmen sakaratmak urja ka vas hota hai. falasvarup usmen rahne valon ka jivan sukhamay hota hai. vahin, parivar ke sadasyon ko unke har karya men saflta milti hai.
Kya aapko lekh pasand aaya?
Subscribe