sammohan upchar  

sammohan upchar je. pi. malik is ank men fobiya vishay par uthaye gaye savalon ka javab diya gaya hai. fobiya ya asamanya dar shabd ka prayog bahut sare log ek samanya dar ya chinta ke lie bhi karte hain jo ki sahi nahin hai. dar hamare jivan ki ek bahut hi avashyak anubhuti hai. dar ka koi n koi karan hota hai. dar hamare jivan ki raksha ke lie avashyak hai. dar ki anubhuti hamen janm se hi hoti hai. janm ke bad bachcha girne se aur unchi avaj se darta hai. yah usko koi sikhata nahin hai. kuch log kahte hain ki dar samuhik avchetan ke madhyam se bachcha prapt karta hai. lekin jab dar samanya n ho to kya vah uchit hai? manovigyan men mapadand shunya se praranbh nahin hota hai balki ausat ya madhyam se shuru kiya jata hai. udaharan ke taur par jab yah kaha jaye ki vah buddhiman hai to iska arth hua ki vah vyakti ausat buddhiman vyakti se jyada buddhi man hai. jaise ham ap jindgi men kahte hain ki amuk vyakti lanba hai ya chota hai to bhi ham samajh sakte hain ki hamara mapadand ek samanya ankre ke adhar par ho raha hai. isi prakar asamanya dar bhi us dar ko kahenge jo samanyatah vyaktiyon ko nahin hona chahie. prashna: kya adhik dar ko fobiya kahte hain? uÿar: adhik dar ko fobiya nahin kahte balki fobiya vah dar hai jo ki asamanya to hai lekin tark ki kasauti par bhi khara nahin utrta hai. jaise koi kahe ki mujhe bachapan men kuÿo ne kat liya tha. us vakt se ab tak mujhe kuÿaon se behad jyada dar lagta hai. kuÿo se behad dar lagna bhi asamanya hai lekin tark ki kasauti par yah sahi utrta hai kyonki is dar ki vajah vyakti ko malum hai. atah yah dar kaha jaega, fobiya nahin. iske viprit ek vyakti sanp ya kachue ya chipkli ya anya jiv ko dekhakar akaran darta hai tatha dar ke mare uska vyavhar asamanya ho jata hai to is prakar ke dar ko fobiya kahte hain. apko jivan men aise bhi kai vyakti mile honge ya unke bare men suna hoga jo na bhir men ja sakte, darvaja band men nahin baith sakte ya sirhiyon par nahin charh sakte to ye sabhi dar fobiya kahlayenge. prashna: kya fobiya ka koi lakshan bhi hota hai? uÿar: fobiya ko pahchanna bahut asan hai. pahli bat to is dar ke karan ka vyakti ko pata nahin hota aur fir uska vyavhar behad asamanya ho jata hai jaise pasina ane lagta hai, chakkar ane lagte hain, kabhi-kabhi behosh bhi ho jata hai, ek dahashat jaisa vyavhar ho jata hai, dam ghutne lagta hai, sans lene men dikkat ho sakti hai, sharir kanpne lag sakta hai, chinta behad barh jati hai, avaj badal jati hai, hath, pair thande par sakte hain, mans peshiyan khich sakti hain, sir dard, pet dard, dast, ulti ityadi lakshan vyavhar men prakat hone lagte hain. yah avashyak nahin hai ki sare lakshan har rogi men dikhai den balki inmen se kuch lakshan avashya hi dikhai denge. fobiya vala vyakti yah bhali bhanti samjhta hai ki yah dar betuka hai lekin yah jante hue bhi vah is par kabu nahin rakh pata hai. vah aksar kahta hai ki mujhe aisa lagne lagta hai ki mere hriday ki gati rukne vali hai aur sans band hone vali hai. prashna: jab dar ka karan nahin hai to dar lagta kyon hai? uÿar: bina karan ke to kuch nahin hota yah to vigyan ka ek siddhant hai jo ki hajaron varsh purva shrikrishn ne karm men siddhant men samjhaya hai aur bhagvan buddh ne bhi kaha hai ki kasht akaran nahin hota hai. isi prakar fobiya bhi akaran nahin hota lekin uska karan vyakti bhul chuka hota hai. kuch log kahenge ki bahut choti-choti hanirhit chijon ya jivon se fobiya hona jaise kokroch se darna is ke piche ka itna bara karan ho sakta hai ki ek asamanya dar ke rup men ban jaye. ya kursi dekhakar chakkar ana jaise fobiya samajh v tark shakti se pare lagte hain. yah bilkul sahi bat hai kyonki tark to fobiya par lagu hota hi nahin. vyakti jis vastu, janavar ya paristhiti se asamanya rup se bina karan ke jab darta hai to nishchit bat hai ki vah karan ko bhul chuka hai. yah karan paroksh ya aproksh rup men ho sakta hai. paroksh karan jaise kisi ko ek sanp ne kata aur vah is bat ko bhul chuka hai. vah anubhav avchetan man men chal gaya hai lekin fir sanp dekhne se uska karan jagrit ho jata hai. lekin smriti nahin ati hai tatha vah ek daravna anubhav paida kar deta hai. sharir men asamanya anubhav hone lagte hain jaise dil baithna ityadi. lekin yah karan paroksh hai. aproksh karan kai prakar se ho sakte hain jaise upar vale udaharan men hi, vah ho sakta hai ki vyakti ek kokroch ko dekhta hai aur turant use ek nag kat leta hai. uska man is anubhav ko dusre rup men dekh sakta hai ki jab main kokroch ko dekhta hun to koi bari durghatana hoti hai. ab chahe vah kokroch ko dekhna aur sanp se kata jana donon baten bhul chuka hai arthat ye baten avchetan man men chali gai hai. lekin kokroch dekhne par avchetan man men darj durdhatana ka prabhav vyavhar men dikhai dene lagta hai jabki kokroch ne use kabhi kata bhi n tha. kuch log aisa bhi mante hain ki purva janm ke dukhad anubhav bhi is jivan men kisi vishesh paristhiti men vyavhar ko prabhavit kar sakte hain jinmen se fobiya ek pramukh lakshan hai. prashna: kya fobiya kisi vishesh prakar ke vyakti ko hi hota hai? uÿar: har vyakti vishesh ko hota hai. fobiya kisi ko bhi ho sakta hai. yah kisi vishesh ling, ayu, dharm, kshetra ya anya is prakar ke karnon se nahin jura hai. iska sanbandh to kisi vishesh ghatna se hota hai ya usse jure hue karnon se hota hai jo ki prabhav ko punah jagrit kar dete hain. jaise ham jab varshon bad kisi sthan par jate hain to purani us sthan se juri hui kuch baten yad a jati hai, kuch baton ka prabhav a jata hai. isi prakar fobiya bhi kisi purani juri hui ghatna ka prabhav hai jo ki ham ab bhul chuke hain. prashna: kya fobiya jivan ke dusre pahluon par bhi koi prabhav dalta hai? uÿar: han, fobiya ki vajah se hamare jivan ke kai anya pahlu bhi avashya prabhavit hote hain. main is sandarbh men ek udaharan deta hun. ek vyakti jiski ayu lagabhag 55 varsh thi vah kisi sarkari vibhag men adhikari tha tatha use unchai par charhne se ya unchai par jane se atyant dar lagta tha. vah ek sosayti men rahta tha jahan bahumjili imarten thin. vah pahli manjil se upar kabhi nahin ja sakta tha. us vyakti ki beti videsh men rahti thi. vah chahti thi ki uske pita ji bhi kabhi-kabhi uske pas ayen aur kuch din rahen. lekin vah to havai jahaj men baith hi nahin sakta tha. yah bat lagabhag 5 varsh pahle ki hai. usne apni samasya mujhe batai aur uska dil bhi bhar aya. dekho, yah kitna marmik lagta hai. bap bachche se milne men aise karan se majbur hai jo ki tarkasangat bhi nahin hai. khair, us vyakti ne hamse upchar karaya aur unka fobiya bhi thik ho gaya. isi prakar fobiya ki vajah se ham bahut sare jaruri karya nahin kar pate hain. prashna: fobiya ka upchar kis prakar sanbhav hai? uÿar: sammohan ke prayog se fobiya ka upchar karna sanbhav hai. fobiya ka sanbandh hamare avchetan man ki smritiyon se hain yah vyavhar ek samanya prakriya nahin hai. sammohan pirit vyakti ke vyavhar men uski kshamata barhakar tatha kasht ke prabhav ko kam karke fobiya ka upchar karta hai. man ki kshamata is prakar barhai jati hai taki vah vyakti fobiya paida karne vali vastu ya paristhiti ko bhi samanya rup se kar sake. kai vyakti yah seachakar upchar ke lie ate hain ki sammohan to ek jadu ki tarah hamare vyavhar men parivartan la sakta hai. chahe vah vyakti pichle 20-30 varsh se us fobiya se pirit ho lekin sammohan se ek din men thik hone ki mansa lekar ata hai. is prakar ki dharna tak bhrarmik mithya hai. man hamare vyavhar ko sanchalit karta hai tatha man ke kuch niyam hain jinko madde najar rakhakar upchar kiya jata hai. fobiya jaisi bimari kam se kam 4 ya 5 bar saishan karane se thik hoti hai. kabhi-kabhi isse adhik seshan bhi lag sakte hain. rogi ko ghar par karne ke lie kuch upchar bhi diye jate hain. prashna: kya fobiya fotograf ke adhar par thik kiya ja sakta hai uÿar: sammohan fotograf ya kisi vastu par nahin kiya ja sakta balki yah ek vyaktigat anubhav hai. upchar ke lie kuch sujhav diye jate hain aur prakriyaen karayi jati hain jo ki ek fotograf se sanbhav nahin hai. prashna: kya fobiya ka upchar karna sikha ja sakta hai? uÿar: fobiya ka upchar sikhne ke lie apko sammohan ana chahie. fobiya sammohan dvara upchar karne vali pramukh bimariyon men se ek hai tatha yah hamare karyakram ka ek hissa hai. har vidyarthi ko, jo ki sammohan upchar yani hipnothiraipi kors karta hai, yah vidhi sikhai jati hai. yah asan hai aur har samanya vyakti isko sikh sakta hai aur kar sakta hai. not: agle ank men napunshkta upchar se sanbandhit prashnon ke bare men jankari di jayegi.