vibhinn vishyon ke gyan ke lie jyotish gyan ki gambhir sujhbujh ke sath savdhanipurn sutron ke prayukt karne ka samyak gyan bhi hona avashyak hai. anubhav se kathan ko bal aur chintan ki pushti pradan hogi. yadi saptamesh ashubh sthan jaise shashth, ashtam ya dvadash bhavon men se kisi men bhi sansthit ho evan krur grah jaise mangal, shani, rahu ya ketu sadrish grahon se yukt athva drisht ho to patni ka svasthya chintajanak hota hai.
shashthesh, ashtamesh ya dvadshesh grahon ke nakshatron men kisi ek men yadi saptamesh sansthit ho to bhi patni ka svasthya chintajanak hota hai. yadi shani evan mangal lagn men sthit hon to patni asvasth hoti hai. parantu shani athva mangal men koi bhi yadi lagnesh ho to is ashubh fal men nyunta ati hai. yadi saptamesh ashtam bhavasth ho to patni vyadhigrast hogi. isi prakar yadi rahu athva ketu saptam bhavasth ho tatha lagn men budh sthit ho to bhi patni ka svasthya pratikul rahega. yadi tritiyesh shukra se sanyukt hokar shashth bhavagat ho to patni men ratikriya sambandhi samantaon ka abhav hoga.
yadi saptamesh aur tritiyesh sanyukt hokar shashth bhavagat ho tatha shukra papakrant ya ast ho tab bhi ratikriya men vishmtaen hoti hain jiske lie stri ka svasthya badhak hota hai. patni ke kis ang men vyadhi ya pira hogi iske lie saptam bhav ko patni ka lagn manakar vichar karna chahie. janmang men yadi ashtam bhav papakrant ho to saptam bhav se vah chaturth hone ke karan fefre, hriday ya sine men koi vyadhi hona sanbhav hai.
isi tarah se kal purush ke jin angon ka vichar jis bhav se kiya jata hai saptam bhav se usi tarah vichar karne par patni ki vyadhi kis ang se sambandhit hogi yah nirnay sugmta se kiya ja sakta hai. saptam bhav se shashth bhav dvadash bhav hota hai. atah dvadash bhav patni ki vyadhi batlata hai. isi tarah se saptam se ashtam arthat dvitiya bhav v saptam se dvadash arthat shashth bhav par vichar karke vyadhi ki pravritti, avdhi v ang adi ka gyan karna chahie. isi prakar jin bhavon men krur grah sthit ho, vah ang apekshakrit kamjor hota hai aur uske vyadhigrasit hone ki sanbhavna adhik hoti hai.
jo grah vyadhi ka karan hota hai, vyadhi usi grah ki prakriti aur jin angon ka vah grah karak hai, unhi angon se sambandhit hogi. yah vichar bahut savdhani purvak karna chahie, anyatha gambhir truti sanbhav hai. jo bhav shubh grahon ke prabhav men hai aur bali hai, patni ke sharir ke ve ang adhik pusht, sundar aur vyadhirhit honge. var kanya ke janmangon men mangli dosh ka nirastikaran sarvapratham yah nishchit karna bhi jyotish gyan ki ek prakriya hai ki var ya kanya ke janmang men kuj dosh vidyaman hai ya nahin.
yadi kuj dosh hai bhi to vah prabhavshali hai athva nahin. yadi kujdosh prabhavshali hai to uska prabhav kam hai, adhik hai ya atyadhik hai. yah nirnay hone ke uprant sanbhavit pati athva patni ke janmangon men bhi mangli dosh ke prabhav par vichar avashyak hai. tatpashchat yah nirnay karna chahie ki donon janmangon men tulnatmak drishti se mangli dosh ka parihar athva nirastikaran hua hai ya nahin. yadi donon janmangon men 25 pratishat kuj dosh ka prabhav ek dusre se kam ya adhik hai
to vivah ki sanstuti kar deni chahie. yadi aisa nahin hai aur kujdosh santulit nahin ho raha hai to vivah ki anumti nahin pradan karni chahie. punah ullekhniya hai ki mangli dosh matra mangal grah ke hi sanvednshil binduon par sansthit hone se nahin hota balki in sthalon par shani rahu ketu tatha surya jaise pap grah sthit hone se bhi mangli dosh utpann hota hai parantu mangal ya pap grahon ke nich rashigat hone par yadi kuj dosh 100 pratishat hai to uchch rashi men matra 50 pratishat.
yadi ek janmang men mangal 1,4,7,8 ya 12ven bhav men sansthit ho tatha dusre janmang men shani ya anya koi pap grah inhin bhavon men sthit ho, to mangli dosh nirast ho jata hai. mangli dosh ke parihar aur tulnatmak adhyayan karte samay nimnankit binduon par ganbhirta ke sath vichar karna chahie.
1. var aur kanya ke janmangon men saman rup se mangli dosh vidyaman hai athva nahin.
2. yadi var ya kanya men se koi ek mangli hai aur dusra mangli nahin hai parantu mangal shasit vrishchik athva mesh men sthit hua hai to pahle ke janmanag ke kujdosh ka nirastikaran svatah ho jaega.
3. mangli dosh ka parihar yadi dusre janmang men nahin hai aur uska nirastikaran bhi nahin ho raha hai to uski mrityu sambhav hai.
4. yadi mangli kisi janmanag men vidyaman ho parantu uska nirastikaran bhi ho raha ho to uska vivah amangli var athva kanya ke sath kiya jana chahie.
udaharan ke rup men yadi saptam bhav men uchch rashigat mangal var ke janmanag men ho to uska vivah amangli kanya se hone par bhi dampatya sukh santulit rahega.