vaivahik jivan ko sukhad rup se vyatit karne ke lie danpatya sukh aur santan sukh ke tathyon par vichar karna ati avashyak hai kyonki yah vaivahik jivan ka mul srot, stanbh hai. jivnsathi ke chayan men thori si satarkata se vaivahik jivan ke parmanand men duba ja sakta hai. vaivahik jivan ka bandhan kitna pak evan pavan hai tatha vivah ki dirgh avdhi nirbadh donon yugal purn karne men saksham hain ya nahin, in sabhi ke anuman ka gyan hona ati avashyak hai. yadi ap jyotish ke kuch sarvamanya siddhanton se purn rup se avagat ho jaen, to nishchay hi ap apne jivnsathi ka chunav tatha apne pranay sanbandh ko premi ya premika ke sath jivan paryant nirdharit kar sakte hain, anyatha lut jane ke bad, barbad ho jane ke bad, apmanit, tiraskrit, lajjit hone ke bad aur anttah mit jane ke alava, ap ke hath men kuch nahin hoga.
sarvapratham yah avashyak hai ki kisi vidvan jyotishi se kundli milan kara len. yah vaivahik jivan ki khushhali ke lie pratham kasauti hai. parantu matra gun milan hi achche jivan sathi ke chunav men sahayak nahin hai. pratyek jatak ke janmang men jyotishiya yog v kuyog hote hain. unki jankari nimnavat janhitarth prastut ki ja rahi hai, jise ap bhali-bhanti janch parakh kar apne jivan men anand pa sakte hain:
- saptamesh kendra athva trikon men sthit ho aur yadi svayan saptamesh ya dvitiyesh ki drishti par rahi ho to jatak apni patni tatha dhan ke purn sukh ka bhog karta hai.
- shukra kendra, trikon ya svarashi men ho aur dvitiyesh athva saptamesh chaturth bhav men ho to jatak adarsh danpatya sukh payega.
- sashakt shukra, kalatra bhav men budh se yut ya drisht ho, to jatak atyant kamuk hoga. prem dikhava hoga tatha vaivahik jivan asantulit hoga.
-shani evan rahu yadi shukra se sanbandh bana len to jatak ke prem men vasna ka mishran hoga tatha uske anek prem-sanbandh honge.
- yadi saptam ka svami shashth, ashtam ya dvadash men ho aur pancham ka svami kisi anya bhav men ho (saptamesh ke sath n ho) to nishchay hai ki prem vivah ya vivah ke bad jatak ka danpatya jivan kasht purn hoga.
- saptamesh pap grah yukt ho ya shukra aur saptamesh ek hi bhav men anya grahon visheshtah papi grah se yukt hon, to jatak ke ek se adhik pranay sanbandh hote hain. yahi sthiti saptamesh aur chaturthesh ke ek sath hone tatha pap grahon se yukt hone par hoti hai.
- yadi shukra dvitiya, shashth ya saptam bhav men pap grahon se yukt ho to jatak patni ke atirikt anya striyon se anaitik sanbandh rakhta hai.
- yadi saptamesh apni nich rashi men ho aur saptam men pap grah ho, to jatak ki do patniyan hone ki sanbhavna balvti hogi.
- yadi saptamesh shashth, ashtam ya dvadash men ho ya nirbal ho ya chaturth bhav men ho aur lagnesh ashtam ya dvadash men ho to patni ki mrityu shighra ho sakti hai athva bichoh nishchit hai.
- lagn se ya chandra lagn se saptam bhav par shani aur budh donon ki drishti ho to jatak ka patni se bichoh shighra hoga.
- saptam bhav par kisi vakri ya pap grah ki drishti ho, to jatak ka danpatya jivan kalah v kashtapurn hoga. - shukra nich rashi men ho, dasham ka svami nirbal hokar 6-8 ya 12 bhav men ho to patni ki mrityu vivah ke bad shiaghra sanbhavit hai.
- shani-mangal saptam bhav men ho aur saptamesh shani ki rashi men ho, to jivn-sathi ka acharan sandehajanak hoga, kintu yadi saptamesh shubh grah ho, to nishchint rahen, apki jivan sangini gunvti aur sadacharini patni ki bhumika ka nirvahan karegi. yadi guru saptam men ho aur lagnesh balshali ho, to bhi yahi fal hoga.
- janm ya vivah ke samay lagn, chandra aur shukra se mangal ki saptam aur ashtam men sthiti vaivahik jivan ke lie ashubh hai. yadi lagnesh, saptamesh aur us rashi ka svami jismen saptamesh sthit ho, sashakt ho aur un par koi kuprabhav n ho, to vaivahik jivan sukhpurn vyatit hota hai.
- danpatya sukh ke lie saptam bhav ke sath dvitiya bhav ka bhi balvan hona avashyak hai. saptam bhav men shubh grahon ki drishti shubhta ko barhati hai.
- saptam bhav, saptamesh v karak grah shukra (purush jatk) ke lie guru (stri jatak ke lie) par surya, shani, rahu ka prabhav ho, to talak hota hai. parantu yadi inke sath-sath nich grahon ka ya mangal ka krur prabhav ho, to talak n hokar jivnsathi ki mrityu hoti hai. iske atirikt yadi pati ya patni ke saptam bhav men vichchedi grahon ka krur prabhav ho, shukra v guru bhi vichchedi grah yukt ya drisht hon, to paraspar talak ho sakta hai.
- saptam bhav nich grah se prabhavit ho, shukra bhi nich rashi men ho, saptamesh ya karak bhi nich rashi ka ho, to kabhi bhi patni ka sukh nahin milta hai. patni bichoh sahan karna hi parega.
- saptam bhav, saptamesh tatha shukra tinon pirit v nirbal hane, shubh yuti ya drishti n ho, to jivn-sathi ka sukh nahin milta.
- lagnesh nich ka ho, lagnasth nich rashi ka grah ho, lagn par nich grah ki drishti ho, guru shatru grahon ke prabhav men ho, lagn men nirbal chandra ho, saptam bhav men nich grahon ki drishti ho to stri vidhva ho jati hai. jivnsathi ke chayan men jyotish ki bhumika sarvadhik hoti hai. vivah ke bandhan men bandhne se purva kisi yogya jyotishi se sanpark karna chahie.