hamare samaj men kundli milan ki pratha itni vyapak ho gai hai ki achcha sanbandh milne par bhi melapak ke gunon athva manglik dosh ke karan bat atak jati hai. kundli milaen ya nahin, manglik dosh se kis prakar nipten, yahi is lekh ki charcha ka vishay hai, jo aj adhikansh mata-pitaon ka saradard bana hua hai. manglik dosh ki jyotishiya paribhasha par aen to lagn kundli men yadi mangal lagn men, chaithe, satven, athven athva barhven bhav men ho to manglik dosh kahlata hai.
is paribhasha ke adhar par to prati 10 men se char stri-purush manglik hone chahie. chandra rashi se bhi yadi mangal inhin sthanon men hota hai tab bhi kamovesh manglik dosh (chandra mangli) mana jata hai. inhin sthanon par yadi shani aur rahu hon ya dusre v tisre bhav men bhi ho to uska ashubh prabhav bhi vivahit jivan par parta hai. dusre bhav ke mangal, shani v rahu jatak ko krodhi v kutunb se virodh karne vala bana sakte hain, jabki ye tisre bhav men shasnik pravritti pradan karte hain, jo daftar v vyavsay men to labhkari ho sakti hai parantu parivarik jivan men nahin. is prakar yadi dekha jaye to manglik dosh har stri purush men nyunadhik rup men vidyaman rahta hai.
manglik dosh ke karan nimn parinam ho sakte hain:-
virah, viyog, algav, parasparik ashishnuta, vilanbit vivah, vivah vichched, ek se adhik sanbandh, vaidhavya adi. ramayan kal men avtrit shriram ki prachlit janmakundli men uchch ka mangal saptam (patni) bhav men manglik dosh ingit karta hai. shriram ka vivah is dosh ke karan uchch kul men to hua, parantu ve dampatya sukh se lagabhag vanchit rahe.
vivah ke pashchat vanvas hua aur fir sita haran ke karan virah viyog. lagn men uchch ke guru ki shubh drishti ke prabhav se nishkalankit sita mil to gai, parantu lav kush ke janm se purva hi sita ka nishkasan ho gaya, jiska ant sita ki prithvi samadhi ke sath hua aur shriram ant samay tak bina patni ke hi rahe. pak mangli dosh: jab manglik dosh ke sath hi kundli men nichasth pratham shatru kshetri mangal ka shani ya rahu se pap sanbandh ho jata hai to pak mangli dosh kaha jata hai, jabki shukra se sanbandh hone par anekanek sanbandh ingit hote hain.
pak mangli dosh ka ek udaharan prastut haiah kai varsh purva main apni barhti umra ki kunvari bhatiji ke lie var talash raha tha, tabhi ek tis varshiya vidhur ka vigyapan drishtigat hua, jinke ek putra tha. patra vyavhar karne par gyat hua ki unka vivah jis kanya se hua tha, vah ek putra ko janm dekar chal basi. sasural valon ne sali se vivah kar diya. uski bhi matyu ho gai ab putra ki khatir punah vivah karna chahte hain.
mainne unki janmkundli mangai aur unhen salah di ki pak mangli dosh ke karan ve vivah ka vichar hi tyag den. bat khatm hui, parantu kuch mahinon bad unka patra aya ki kya meri bhatiji ab tak avivahit hai aur kya ham vivah karna chahenge ? han unhonne spasht shabdon men svikar kiya ki unka ek sanbandh agra se tay hua tha, magar vivah ke ek din purva hi kanya ek sikh yuvak ke sath bhag gai.btaie, mera uttar kya raha hoga?
vilanbit vivah: manglik dosh ke karan vilanbit vivah ek am bat ho gai hai, jo mata-pitaon ko ati chinta grast rakhti hai. yadi meri manen to is vilanb ko sahi manakar svikar kar len. vilanb ke karan kai kusanbhavnaain tal jati hain, jaise, anmel vivah, sanbandh bhang, algav, kam ay se hone vala vaimanasya athva vaidhavya bhi. am taur par larke ki samuchit ay n hona ya dahej tatha sarvagun sanpann vadhu ki mang vilanb ka karan bante hain. adhik umra hone tak larka svavlanbi ho sakta hai
aur tab tak uski dahej v sarvagun sanpann vadhu ki mang bhi har man leti hai. larkiyon ke mamle men kanya ki apni pasand athva dahej ki mang bhi vilanb ka karan banti hai. meri pahchan vali ek karyashil sikh kanya gair sikh yuvak se hi vivah karna chahti thi, jo uske rurhivadi man bap ko svikar nahin tha. anttah lagabhag 30 varsh ki umra men uska vivah man-bap chaynit sikh yuvak se hi hua. ab vah ek putri ka man hai aur khush hai.
uska dvivivah ka manglik dosh bhi tal gaya. meri salah yah hai ki aisi sthiti men mata-pita ko chahie ki vah spasht kar den ki ve vivah ke lie taiyar to hain kintu turant vivah nahin kar payenge. jaise-jaise yah samay ka antral barhta jata hai vaise-vaise sanbandh ki pragarhta kshin hoti jati hai aur anttah dusre paksh ka dhairya bhi javab de baithta hai. is prakar manglik dosh bhi tal jata hai jo do sanbandhon ka suchak hota hai.
han, yadi larka larki manglik n hon to lagn ki paristhitiyon ko dekhte hue vivah ki svikriti de dena hi uchit hoga, anyatha avsad ki sthiti, atmahatya ka prayatn ya kort vivah bhi sanbhavit hai, jo dusre ya tisre bhav men papi grahon ki upasthiti ke karan ingit hota hai. meri apni rishtedari men ek manglik kanya ka vivah tay hua. vivah ki taiyariyan bhi ho gai thin, to meri salah ke anusar nesht samay gujrne ke bad hona tha.
vivah se kuch din purva hi ek kar durghatana men var ki mrityu ho gai, to mainne mata-pita ko santvana di ki vivah talne ka mera uddeshya yahi tha, kyonki uski kundli men vaidhavya yog tha, jo is prakar purn ho gaya. kanya ka uchit samay par vivah hua aur aj vah do svasth bachchon ki man hai. manglik dosh ka ek pahlu vivahit hokar bhi pati-patni ka ek sath n rahna bhi hota hai. jinke pati videsh men karyarat hote hain athva nevi ya sena men hote hain ve patniyan is dosh se grasit hoti hain.
mere pas paramarsh ke lie ane vale danpattiyon, visheshakar stri paksh se yah shikayat milti hai ki hamare to 28 ya 30 gun mil gaye the, fir bhi hammen banti nahin hai. jahan tak melapak se gun milane ka prashn hai, vah keval var-vadhu ke nakshatron par adharit hota hai, jo is bat ko darshata hai ki unke svabhav evan ruchiyon men virodhabhas to nahin hai tatha unki chandra rashiyan paraspar shatru to nahin hai. yah melapak var-vadhu ki janmakundliyon men vibhinn grahon ki sthiti aur unke prabhav se achuta rahta hai.
melapak dvara ek dusht purush aur ek sidhi sadi kanya ke bhi 30-30 gun mil sakte hain. han, parantu is bat ki purn sanbhavna rahti hai ki kanya pati ko usi rup men svikar kar le chahe ise paranprik sanskar kahie ya stri ki sanpurn samarpan bhavna. gunon aur kundli milan ke bad bhi ajakal anaban ki shikayten ati hai. iski vivechna ke lie hamen adi kal se lekar vartaman kal tak ke samajik parivesh ko drishtigochar karna hoga. aditya kal men purush ka dayitva shikar karke bhojya samagri jutana tatha stri ka santan palan aur grih prabandhan karna hota tha.
islie pati ka shasan chalta tha aur islie purush pradhan samaj ki srishti ho gai thi. vivah sanstha ka avirbhav bhi isi uddeshya se hua tha. vaidik kal men patni pati ke anushasan men rahe, islie ‘pati parmeshvar’ evan ‘pativrat dharma’ jaisi dharnaon ko mahima mandit kiya gaya tha. purush ko bahu vivah ke adhikar ke sath hi devdasiyon aur ganikaon ko bhi manyata mil gai thi. in sanskaron ke chalte striyan pati ki ‘charndasi’ to rahin, magar unki manglik pravritti dusre rup men prasfutit hoti rahi.
dhanik varg ki striyan paricharak paricharikaon par shasan kar sakti thin aur madhya varg ki striyan santan aur bahuon par apna varchasva sthapit kar leti thin. aj bhi yah ‘sas-bahu’ ka prakaran duradarshan ki chainlon ki ay ka srot ban gaya hai. vastutah dharm men astha aur puratan sanskaron se pratibaddh nari purush ko hi svamitva pradan karti rahi hai. yah sthiti bisvin sadi ke purvardh tak to chali hi, jab kundli milan ki avashyakta bhi nahin samjhi jati thi. bisvin sadi ke uttarardh men nari svatantrya ka yug aya, jiski shuruat pashchimi deshon se hui. sath ke dashak men mujhe uchch takniki prashikshan ke lie soviyat rus men rahna para tha.
soviyat rus un dinon mahashakti banne ki hor men tha, lihaja har pusht purush ko karkhanon men ya sena men rakh diya jata tha, jabki striyon ka varchasva dukanon, aspatal, hotal, baink, karyalyon, skul aur relve men upar se niche tak kavij tha. is nari svavlanbna ki parinti sansar ki sarvadhik talakadar men ho chuki thi. adhikatar vivah 20 varsh ki umra tak ho jate the. sanveg aur bhavnaon ke vashibhut hokar kie yah vivah mamuli anaban se hi talak men parivartit ho jate the, jo vahan ati saral kanuni prakriya thi. aj sabhi pashchimi deshon men yah sthiti ban chuki hai aur bharat ki chaikhat par bhi dastak de chuki hai.
bharat men pichle do dashak se stri-shiksha men asadharan pragti ke karan shahri mahilaon ko naukri se purushon ke samakaksh niji ay bhi hone lagi hai. dohri ay vale danpattiyon men kiska shasan chale, yah vivah vaivahik vighatan ka ek bara karan ban raha hai. stri ki manglik pravritti, jo sanskaron aur samajik bandhnon ke karan damit rahti thi, ab ujagar hone lagi hai. nimn varg aur gramin mahilaen abhi tak is bandhan ko puri tarah nahin tor pai hai. ek bahucharchit hindi film men sanbhrant parivar ki ek mahila, jo svayan pati se alag hone ke kagar par hai, apni naukrani se uske chehre ki chot ka karan puchti hai.
naukrani batati hai ki uske admi ne sharab pikar mara tha. mahila kahti hai to tu use chor kyon nahin deti ? uttar tha- kaise chor dun malkin, sat janmon ka bandhan hai. urdu v hindi ke prakhyat kathakar, krishan chandar ki ek kahani men chal men rahne vala purush apni stri ko mar raha tha. bachane ke lie aye logon ko stri ne yah kahakar jhirak diya - mera admi hai. mujhe mar raha hai. tum logon ko kya ? medikal vigyan ke anusar praurhavastha men stri men us harmon ki kami hone lagti hai jo nari sulabh gunon (lajja, shalinta, samarpan bhavna) ka jivan data hai
aur purushon men vah harmon kshin hone lagta hai, jo use shasan karne v svamitt jatane ki pravritti ka dendar hai. is avastha men stri santan ke shadi vyah, len den adi mamlon ko apne adhikar kshetra men lene ke lie prayatnashil ho jati hai jise adhikansh purush saharsh svikar kar lete hain. han, stri ki manglik hone ki sthiti men yah pravritti ati ugra ho jati hai. dahej ki mang ya bahu ko pratarit karna bhi isi pravritti ki den hai. yadi purush bhi manglik hua to sthiti aur bhi vikat ho sakti hai.
nav vivahiton men anaban ka karan patni ka saman adhikar ki mang karna hai. vaivahik vigyapnon men yuvkon ko vyavsay men prashikshit kanya chahie. yadi unki yah ichcha hai to unhen kuking kors bhi kar lena chahie. vastav men ve paranpragat pati seva ke hakdar nahin hai. yuvtiyon ko bhi chahie ki apne svatantra ay janit ahankar ko sanymit rakhen. hal ke ek lekh men mainne parha tha ki apki arthik svavlanbi kumariyon ko ‘pati’ nahin ‘patni’ chahie. jo yuvtiyan apni naukri, pati aur grih prabandhan men samanjasya bana leti hai, unka vaivahik jivan manochikitsak ya jyotishi se paramarsh karne ki apeksha nahin rakhta hai.
santan ke vivahechchuk mata-pita ko paramarsh ab main apne jyotish shastra ke adhyayan evan anubhav ke adhar par nimn paramarsh dena chahunga: har jatak ke 10-12 varshon ke dauran ek ya do varsh aise gujrte hain, jab shani v guru, donon prabhavshali grah ‘shubh’ gochar men hote hain. yah sthiti tab banti hai jab shani chandra rashi se tisre, chathe athva gyarhven sthan men aur guru dusre, panchven, satven, naven ya gyarhven sthan se sanchrit hote hain. yah varsh vivah ke lie ‘yog kark’ samay hote hain. in varshon men svatah hi sanbandh banne ki sthiti utpann ho jati hai
aur yadi kafi bhag daur ke bad bhi vivah nahin ho raha ho to bat banne ki anayas hi sanbhavna ho jati hai. is gochar sthiti men bina kundli milae hi vivah kar sakte hain kyonki gochar ke shubh prabhav se sarvadhik anukul sanbandh svatah hi ho jata hai. han, bhagya to apna apna hota hi hai. yah sthiti kam umra (20-25 varsha) men bhi banti ho aur var ki ay samuchit n ho ya kanya ka vidyadhyayan pura n bhi hua ho tab bhi vivah karne men sankoch n karen. han, pak mangli hone ki sthiti men 25 varsh ki umra ke bad hi is yog ki pratiksha karen. sada manglik hone ki sthiti (jab mangal svagrihi ya uchch ho aur pap grahon se drisht n ho) men kam umra men bhi vivah kiya ja sakta hai.
yun to manglik prabhav kundli milane se bhi nahin tala ja sakta hai. dusri kam anukul sthiti tab banti hai jab guru shubh gochar men ho parantu shani ‘ashubh’ gochar (sarhesati v dhaiya) men n ho. aisi sthiti men kundli milan ki rasm kar sakte hain, parantu 25 se kam gun milne ki sthiti men vivah tabhi karen jab tak larka larki ek dusre ko parakh n len. gochar ki us sthiti men vivah kadapi n karen jab shani aur guru donon ‘ashubh’ sanchar kar rahe hon. yah sthiti shani ki sarhesati aur dhaiya ke dauran tatha guru ke chathe, athven v barhven sthan men sanchar karne par banti hai.
is bhram ko n palen ki gunon ke milan aur manglik dosh ke nivaran ke bad sab kuch thik ho jata hai. is lekh men samajik parivesh v nar-nari manovigyan ke sandarbh men stri purush ki pravritti ki vivechna isi uddeshya se ki gai hai.