dae. rakesh kumar sinha ‘ravi’ adi-anadi kal se dharmadhvaji bharat desh men sabhyata-sanskriti ki amit nishani v jivant yadgar ke rup men mandiron ka vishisht sthan raha hai. dharm, vidya, kalyan v jivn-marg ke kendra ke rup men in mandiron ko aranbh kal se hi samaj men uchchasan prapt hai.
yahi karan hai ki desh ke prayah harek kshetra men mandiron ka astitva aj bhi kayam hai jinke samajik, dharmik v sanskritik mahatva se inkar nahin kiya ja sakta. aisa hi ek khyatinam devalay hai dev ka surya mandir, jo apni banavat, adbhut kalakarita v pashchimmukhi dvar ke nam par desh-prasiddh hain. pu re desh men ‘dev’ nam se jure kitne hi tirth sthal hain yatha ‘devaghar, ‘devghat,’ ‘devkund, devpur, devpuram, devgrih, devdevesh, devrajpur, devpuri v devvanshpur. par in sabhi ke bich ‘dev’ ka apna alag mahatva hai jahan ke anagarh mul pattharon men apurva chandon ka jo prakash hua hai, atit ka vah mahakay darshakon ke man men agyat rahasya ki khyati paripusht karta hai.
bhartiya shilpakala v bhaskar ka apurva nidarshan dev ka surya mandir bihar rajya ke aurangabad jila mukhyalay se 18 kimi. dakshin purvi kon par avasthit hai jo pramandal mukhyalay gaya se 61 kimi. duri par hai. yahan patna, sasaram daltanaganj v varansi se ana sahaj hai. rashtriya rajmarg 2 par bane ‘‘dev surya dvar’’ se 5 kimi. andar mandir tak ane ke lie chote-bare vahan asani se mil jate hain.
is mandir ke bare men sahityik suchna milti hai ki barah lakh terah hajar treta yug bit jane ke bad magh shukla panchmi guruvar ko raja ila ke putra ail ne is mandir ka nirman shuru karvaya. is sandarbh men ek kivdanti hai ki raja ail shikar karte-karte apne sangi sathiyon se kafi age nikal gaye dev ke is aranya kshetra men a gae jahan pyas bujhane ke uddeshya se sainikon ke dvar pas ke kund se lae gae jal men jaise hi mukh prakshalan kiya ki unka varshon purana asadhya charm rog sada-sarvada ke lie jata raha.
usi rat dev devagya aditya nath ki kripa se unhen svapn men gyat hua ki usi kund men shri surya narayan ki tin pratima tatha udykal, madhyahn kal v sandhyakal gare pade hain. dusre hi din raja ne nem dharm ke sath un tinon vigrahon ko niklvaya aur tvarit rajkosh se ek vishal mandir banakar use pran-pratishthit kiya gaya. sath hi pas ke kund ka nav shrringar karvaya jise aj surya kund kaha jata hai. bihar pradesh ke sapt surya kundon men ek isi kund ke jal se yahan snan, pujapath v prasad nirman hota hai. janashruti hai ki brahmaji ke adesh se dev shilpi vishvakarma ji ne ek rat men magadh men jin tin mandiron ko banaya usmen dev ka surya mandir pratham hai. anya do devalay hain devkund ka dudheshvar nath mandir aur upga ka surya mandir. in tinon ki sthiti triryak ki hai aur sabhi jaghon par ek hi stail ki murti-mandir dekhi ja sakti hai.
itihas-sanskriti ke ye tinon sthal aurangabad jila men hi hai. gaya tirth ke saurya dham ke rup men pratishthit dev ka yah surya mandir apne bahya v antrik banavat ke lie dur-dur tak prasiddh hai. bad men dev rajvansh ke kitne hi rajaon men suraksha-sanraksha pradan kar apne rajya ke yash vaibhav ko surya narayan ki kripa se age barhaya. madhyakalin shilpakala se yukt dev ka vartaman mandir 600 varsh prachin hai. abhilekhiya vivaran spasht karte hain ki umga ke raja bhairvendra ne 1450 i. men is mandir ka nav sanskar karvaya. yahan ki prachin murtiyan palkalin hain.
is mandir men surya devta ke tin vigrah ka hona ‘aditya hriday stotram’ ke ekadam anurup hai jahan ullekhit hai. udye brahmanon rupan madhyahne tu maheshvarah. astamane svayan vishnu trimurtishch divakrah.. arthat yah vahi divakar hain jo uday kal men brahma ke rup men, madhya kal men shiv ji ke rup men aur sayan kal men shri vishnu rup men rahte hain. is sthal men puja, upasna ke sath upvas ka mahatmya bahut adhik bataya gaya hai. aise to yahan sal bhar bhaktagan ate rahte hain par sal ke donon chath aur ravivar vrat karne valon ke agaman se yahan vishal mela lag jata hai. manokamna puran sthal ke rup men iski charcha dur-dur tak hai. dev ka surya mandir apni aitihasikta, dharmikta tatha kalatmak bhavyata ke lie vikhyat to hai hi par sabse jyada yahan ki charcha is bat se hai ki yahan ka pradhan desh dvar (mandir pravesh dvar) samanyatah purab ki or n hokar pashchim ki or hai.
mandir ka avlokan v nirikshan spasht karta hai ki iska nirman isi tarah hua par .... kyon?
is sandarbh men ek lokapriya katha log aj bhi bare manoyog se sunate hain. bat us samay ki hai jab aurangjeb ka prantiya senapti kala pahar anyanya mandiron ko dhvast karte hue yahan aya to sthaniya vipro ne use yahan ki vishishtata batayi sath hi anunay vinay kiya ki ise dhvast n kiya jae. isi par kala pahar ne danbh ke sath kaha ki thik hai. agar ratane rat mandir ka rukh purab se pashchim ho jae to main yahan kuch nahin karunga. sabhi vipra pareshan v chintit ho uthen aur aditya dev se prarthana karne lage. adhi rat ko ‘dev ichcha prablan’ ....... ki bhanti jordar gargrahat hui aur mandir ka dvar purab se pashchim ho gaya. dekhne se aisa lagta hai jaise iski nirman yojna multah yahi hai. is par jankar vidvan pan. dhananjay mishra ka manna hai ki mandir ke dvitiya nirmata ne use vishishtata v anutha rup pradan karne ke lie aisa nirman karaya. unche-unche chahardivari se parivritt karib 900 fit uncha yah mandir mukhyatah chuna, gara, patthar, int, lakri v lohe ke sahyog se bana hai. jiske shikhar v us par virajman kamal jagannathpuri ke mandir se mel khata hai. mandir ke samne ki divar par ganpti ki murti hai.
is pure parivar men kitne hi mahatva ke dev vigrah dekhe ja sakte hain. jo chahardivari aur mandir ki divaron ke takhon men virajman hain. dev ki gaurav - garima ko prasarit karne men bihar sarkar ke paryatan mantralay dvara ayojit ‘‘dev mahotsava’’ ka achcha yogdan hai aisi 1986 men gathit ‘dev surya mandir dharmik nyas samiti’ yahan ke vikas hetu sadaiv prayatnashil pratit hota hai.
‘dev’ ke as-pas kuch darshaniya sthal bhi hain jinmen ‘rani pokhr’ rani kuan, mila, gujri man ka gurudvara,’ ‘umga tirtha’ v anba pramukh hain. kul milakar prachya sabhyata sanskriti aur magadh deshiya brahmanon ki sthali-magadh ka yah devalay yahan ka apratim aur bemisal kriti hai jahan ke darshana-pujan ki bat log varshon yad rakhte hain.