desh ke kuch prakhyat siddh hanumat tirthon ke vishay men yahan vishisht jankari prastut ki ja rahi hai. in hanumat tirthon ki jankari se jahan bhakt janon ko anand milega, vahin un shakti pithon men ja kar darshan ka anand lene men suvidha rahegi. yahan shri hanuman ji ke nau pramukh shakti pithon ka varnan kiya ja raha hai. 1-menhdipur (rajasthan) ke bala ji (shri hanuman ji ) janashruti ke anusar yah devalay ek hajar varsh purana hai. bahut pahle yahan koi mandir nahin tha. ek bar mandir ke mahant ji ko bala ji ne svapn men darshan de kar vahan mandir sthapit kar ke upasna karne ka adesh diya. tadnusar mahant ji ne vahan mandir banvaya. kaha jata hai ki mugal shasan kal men is mandir ko todne ke anek prayas hue, parantu saflta nahin mili. vartaman naya mandir 200 varshon se adhik purana nahin hai. rajasthan men yah mandir vishesh rup se prasiddh hai. marg sanket : yah sthanjypur-bandikui bas marg par, jaypur se lagabhag painsath kilomitar ki duri par sthit hai. do pahadiyon ke madhya ki ghati men avasthit hone ke karan ise ‘ghata menhdipur’ bhi kahte hain. menhdipur ke bala ji manautipurn mane jane ke karan pure varsh dridh shraddha vale bhakton ka ana-jana laga rahta hai. yahan ke pramukh devta bala ji hi hain; sath hi pretraj shri bhairav nath ji bhi mahatvapurn hain. jaypur ya anyatra kahin se bandikui marg se chalne vali bas dvara menhdipur bala ji pahuncha ja sakta hai. 2-salasar (rajasthan) ke shri hanuman ji: shri salasar hanuman ji rajasthan ke churu mandlantargat sujanagadh tahsil men sthit hain. shri salasar bala ji (shri hanuman ji) ka jan manas men atyant mahatva hai. yahan ke bala ji ka shri vigrah asota namak gram ke khet men prakat hua tha, jo param tapasvi mohndas ji ko prapt hua tatha unhin ke dvara pratishthapit kiya gaya. aj mandir ka bhavya evan vishal rup nirmit ho gaya hai. svarn sinhasan par ram darbar shri bala ji ke shri mastak ke upar virajit hai. svayan bala ji svarn sinhasan par virajman hain. yah vishva ke hanumat bhakton ki asim shraddha ka kendra hai. mandir ke chaturdik yatriyon ke avas ke lie badi-badi dharmashalaen bani hain, jinmen hajaron yatri ek sath thahar sakte hain. dur-dur se bhi apni manokamnaen le kar yatri yahan ate hain aur ichchit var pate hain. marg sanket: chaitra shukla chaturdashi ko yahan hanuman jayanti ka divya utsav hota hai. bhadrapad shukla paksh ki chaturdashi tatha purnima ko darshanarthiyon ka mela lagta hai. yahan pahunchne ke lie jaypur se ya churu se bas prapt hoti hai, jo salasar tak jati hai. jaypur se bas men tin ghante lagte hain, jo karib sau kilomitar ki duri par hai. sujanagadh, churu, jhunjhnu, ratanagadh, sikar adi prasiddh shahar salasar se 50 se 60 kilomitar ki duri par hain. 3-varansi (uttarapradesh) ka sanktmochan mandir: man annapurna ke anchal men avasthit devadhidev mahadev ki priya nagri varansi ke dakshin men, hindu vishvavidyalay ke samip, lanka namak mohalle men shri sanktmochan hanuman ji ka mandir hai. upaskon ke lie yah ek divya sadhna sthali hai. mandir ke prashast prangan men apne parmaradhya shri ram, man janki ji evan lakshman ji ke sath shri hanuman ji virajman hain. shri sanktmochan hanuman ji ke samip hi shri thakur ji bhagvan, nrisinh ke rup men, vidyaman hain. yah murti gosvami tulsidas ji ke tap evan punya se praktit svayanbhu murti hai. is murti men shri hanuman ji dakshin bahu se bhakton ko abhay pradan kar rahe hain tatha bam bahu unke vaksh par sthit hai, jiske darshan ka punya labh, sarvang snan ke avasar par, keval pujari ji ko prapt hota hai. shri vigrah ke netron se shraddhaluon par aviral ashivarshan sa hota rahta hai. 4-ayodhya men hanumangdhi ka hanuman mandir: ayodhya ka sabse pramukh shri hanuman mandir ‘hanumangdhi’ ke nam se vikhyat hai. yah rajadvar ke samaksh atyuchch tile par chaturdik prachir ke bhitar hai. usmen sath sidhiyan chadhne par shri hanuman ji ka mandir milta hai. is vishal mandir men shri hanuman ji ki sthanik murti hai. yahan shri hanuman ji ka ek aur vigrah hai, jo matra chah inch uncha hai tatha sarvada pushpachchadit rahta hai. hanumadbhakton ke lie yah sthan ativ shraddhaspad hai. hanumangdhi ke dakshin men sugriv tila aur angad tila namak sthan hain. lagabhag sava tin sau varsh purva svami shri abhyram ramdas ji ne hanumangdhi ki sthapna ki. yahan hindu bhakton tatha darshanarthiyon ke anavarat ane ke karan nitya hi mela sa laga rahta hai. manglvar aur shanivar ko to apar bhid hoti hai. yadyapi shri ram ki janmabhumi ayodhya hai, tathapi yahan unki utni puja nahin hoti, jitni shri hanuman ji ki hoti hai. 5-chitrakut men shri hanuman dhara: koti tirth se, pahad ke upar hi, hanuman dhara niklti hai. chitrakut se tin kilomitar ki duri par sadhe tin sau sidhiyan chadhne par hanuman ji ke darshan hote hain. yah bhag parvat mala ke madhya bhag men hai. pahad ke sahare hanuman ji ki vishal murti ke thik sir par do jal kund hain, jo sada bhare rahte hain aur unmen se nirantar jal dhara pravahit hoti rahti hai. is dhara ka jal nirantar hanuman ji ka sparsh karta rahta hai. atah ise hanuman dhara kahte hain. yah sthan vrikshon se dhanka evan shital hai. iske bare men ek katha prasiddh hai ki lanka vijay ke pashchat jab bhagvan ka ayodhya men rajyabhishek hua, tab shri hanuman ji shri ram ji se bole: bhagvn! mujhe koi aisa sthan bataie, jahan lanka dahan se utpann mere sharir ka tap mite. tab shri hanuman ji ko bhagvan ne yahi sthan bataya tha. yah sthan itna shant evan pavitra hai ki yahan antahkaran ke sakal tap mit jate hain. marg sanket: chitrakut se yah tin kilomitar dur hai. tenpo sidhe hanuman dhara talhti par pahunchte hain. 6-prayag (uttarapradesh) ke bhushayi shri hanuman ji: tirtharaj prayag ke triveni sangam ke samip vishal kile ke nikat shri hanuman ji ka ek vishal bhushayi vigrah hai, jo bharat hi nahin, samuche vishva men prasiddh hai. shri hanuman ji ke vishay men prasiddh hai ki aj se 200 varsh purva ek prasiddh hanumadbhakt vyapari hanuman ji ko nav men rakh kar ganga marg se apne gram vindhyachal ke lie chala. triveni sangam par karne ke pashchat nauka dagmgane lagi. navik ne nauka palat jane ke bhay se use kinare par lagaya. kinare par nauka lagte hi nauka palat gayi aur hanuman ji uttan mukh ho kar bhumi par gir pade. par kisi ko koi chot, ya moch nahin ayi. sab log hanuman ji ko uthane ka prayas karne lage, par vifal rahe. jab ratri hui, tab ganga tat par hi sabne vishram kiya. hanuman ji ne vyapari ko svapn men darshan dete hue kaha ki main yahin prayag men rahna chahta hun. atah mujhe isi sthiti men yahin chod do. shri hanuman ji ki agya man kar vahin hanuman ji ki pratishtha ki gayi. tabhi se pavnatmaj shri hanuman ji vahin virajit ho kar apne dason ko abhay dan dete rahte hain. ajakal yahan baghanbri akhade ke sannyasiyon dvara shri hanuman ji ki seva ki jati hai. marg sanket: shri prayag hanuman mandir, bhushayi hanuman ji, sangam bandh, ayatmanagar, ilahabad (uttarapradesh) 7-hanuman chatti ke shri hanuman ji: badrinath jane vale marg men pandukeshvar se sat kilomitar ki duri par evan badrinath se panch kilomitar purva hanuman chatti namak siddhasthali hai, jo shri hanuman ji ki tapahsthali hai. yahan mukhya marg par hi unka ek chota sa bhavya mandir hai. mahabharat kal men jab bhim dropdi ke lie kamal pushp lane alkapuri ja rahe the, tab bhim ko shri hanuman ji ke darshan yahin par hue the. atah yah sthan atyadhik siddh evan ramniya hone ke sath-sath aitihasik bhi hai. badrinath jane se purva yatri yahan shri hanuman ji ke darshan avashya karte hain. sabhi yatri shri hanuman ji ka prasad svarup sindur lagate hain. mandir men ram kirtan men magn shri hanuman ji ka atyadhik sundar vigrah hai, jo darshanarthiyon ko bhav-vibhor kar deta hai. is sthan ka vishesh mahatva hai, kyonki yah hanuman ji ki tapobhumi mani jati hai. marg sanket: hanuman chatti, badrinath marg, jila chamoli, pandukeshvar ke pas, gadhval (uttaranchl) 8-ujjain ke shri panchmukhi hanuman jiah ujjain men jahan dvadash jyortilingon men mahakal hain, vahin bade ganesh ji ke samaksh hi shri panchmukhi hanuman ji ka atyadhik supratishthit mandir hai. chunki yah atyant prachin siddhapith hai, atah iska rahasya agyat hai. panchmukh hone ke karan inki mahima vyapak hai. ujjain men shri mahakaleshvar ke darshan ke bad ganesh ji ke mandir ke shri hanuman ji evan harasehar siddhi devi ke darshan avashya karne chahie. 9-porbandar (gujrat) ke shri ekadshmukhi hanuman ji: gujrat men sudamapuri (porbandr) men shri panchmukhi mahadev ke mandir men shri ekadshmukhi hanuman ji sarvaprasiddh hain. yahan hanuman ji ke do charan, bais hath evan gyarah mukh hain. in gyarah mukhon men kapi mukh, bhairav mukh, agni mukh, hrayagriv mukh, varah mukh, nag mukh, rudra mukh, nrisinh mukh, gaj mukh evan saumya manav mukh hain. sanpurn bharat men is prakar ka archavigrah durlabh hai. marg sanket: shri ekadshmukhi hanuman ji porbandar ke sudama mandir se pashchim men hain.
Kya aapko lekh pasand aaya?
Subscribe