jab do grah ek hi bhav men ek dusre ke bahut nikat hote hain v donon grahon ki digri men 10 se kam ka antar hota hai to yah avastha grah yuddh ki avastha kahlati hai. jis grah ki digri kam hoti hai vah grah yuddh men jita hua mana jata hai v jis grah ki digri un donon men adhik ho vah grah yuddh men parajit hota hai. hamare prachin jyotish ke granthon men grah yuddh men parajit grah ko ''khal'' ki sangya di gai hai. sath hi yah bhi mana gaya ki is khal grah ki dasha - antardasha men manushyon ko atyadhik sharirik v mansik kasht hota hai. grah yuddh men keval do grahon ko shamil kiya jata hai agar 3 grah digri men atyadhik samip ho to unhen bhi do-do grah karke grah yuddh men dekha jata hai. (ise ham udaharan men samjhenge). surya grah yuddh men shamil nahin hota kyonki surya ke sath agar koi grah nikatatam anshon men ho to vo ast kahlata hai.
aie dekhen hamare kuch prachin shastron ka kya mat hai- faldipika: mantreshvar ki faldipika ke anusar khal grah ki dasha atyant duahkh dene vali, videsh bhraman, krodhi banane vali v mansik santap dene vali hoti hai. jatkabhrnm: jatkabharanam men kaha gaya hai ki khal grah ki dasha men kasht, stri ki chinta, atyant santap prapti, pardesh yatra, dhanhin aur buddhihin hona kaha gaya hai. sarvarthachintamni: sarvarthachintamni ke anusar khal grah ki dasha men kalah, priyajnon ka viyog, pita ka viyog, shatruon v chuglkhoron dvara dhan hani v bhumi hani tatha apne khas logon dvara uski ninda tatha alochna hoti hai. brihad parashar horashastra: khal avastha men sthit grah ki dasha men kalah, pita viyog, dhan nash v priyajnon se ninda hoti hai. is prakar hamne dekha ki hamare sabhi prachin granthon men khal grah ki dasha ki ninda ki hai.
is lekh ke madhyam se yah dikhane ka prayas kiya gaya hai ki kis prakar parajit grah ki dasha kharab parinam deti hai. ham yahan keval unhin grahon ki bat karenge jo grah yuddh men hai. prastut kunbh lagn ki kundli ke 12ven bhav men 3 grahon ki yuti hai. (shukra, mangal v shani) inmen se shukra v mangal grah yuddh men shamil hai. shukra jo kundli ka chaturthesh v navmesh hai mangal se grah yuddh men parajit hai. shukra jahan navmesh hokar bhagya v pita ka pratinidhitva karta hai vahin chaturthesh hokar mata, ghar v sukh bhav ka svami hai. is grah ka grah yuddh men harna mata-pita ke bhagya v sukh ki hani darshata hai. mangal pita ke bhav arthat navam se dvitiya v saptam ghar ka malik hokar pita ke lie markesh hai vahin chaturth se bhi saptamesh v dvadshesh hokar atyant kharab hai. jatika ki rahu ki mahadsha 1996 se shuru hui. rahu men shukra ki antardasha jatika ke lie bhayankar parinam lekar ayi. grah yuddh men hara shukra shani ki yuti se bhi pirit hai.
navansh men bhi shukra navam se dvitiya hokar marak hai v navam se ashtam men sthit hai. is dasha men jatika ke pita ko kainsar ho gaya. jiske chalte 3 sitanbar 2009 ko unka dehant ho gaya. mata ko bhi pati ki mrityu ke karan kafi mansik kasht hua. khud jatika jo ki iklauti santan hai ke upar mata ki jimmevari a gai. umra choti hone ke karan v abhi parhai puri n hone ke karan inhonne apne ghar ka adhe se jyada hissa kiraye par dekar apna gujara karne ka faisla liya. is prakar grah yuddh men hare shukra ki dasha ne jatika ko pita viyog, jatika ki mata ko kasht v ghar ke sukh se bhi kafi had tak vanchit kiya. not - 2009 men rahu ketu ka gochar bhi isi paksh ko pirit kar raha tha. yah kundli ek aise jatak ki hai jinka panchmesh grah yuddh men hara hai.
mithun lagn ki kundli men shukra panchmesh v dvadshesh hokar tritiya bhav men shashtesh v ekadshesh mangal ke sath grah yuddh men hai v mangal se grah yuddh men parajit hai. kundli ke pancham bhav men ashtamesh shani sthit hai. navansh men bhi pancham bhav rahu ketu aksh men hai v panchmesh ashtam men hai. pancham bhav pirit hai. mangal pancham bhav ke lie dvitiyesh v saptamesh hokar prabal marak hai. is jatak ki guru men shukra ki antardasha disanbar 2005 se shuru hui jo agast 2008 tak chali. is dasha men jatak ke donon bachchon ko ”ayaran dipojishn“ ki bhayankar bimari hui. jiska abhi tak pure vishva men koi ilaj nahin hai. putri jivan ki antim sanse le rahi hai vahin chota putra bhi shighrata se mrityu ki or barh raha hai.
apne bachchon ke ilaj ke lie ye kai deshon ke chakkar bhi laga chuke hain shukra yahan dvadshesh bhi hai. apne samne bachchon ko is sthiti men dekhne se jyada kasht aur kya ho sakta hai. is prakar grah yuddh men hare panchmesh ki antardasha ne jahan inke bachchon ko mrityu tulya kasht diya vahin inhen bhi vyarth ka pardesh gaman v paise ko hani di. inka khud ka janm ”khal grah“ ki mahadsha men hua. inhen bachapan men mata ka sukh nahin mila. pita ne 3 shadiyan ki v ye sauteli man ke vyavhar se hamesha pareshan rahe. prastut min lagn ki kundli men pancham bhav puri tarah pirit hai. rahu ketu aksh men hai sath hi dvadshesh shani se drisht hai. panchmesh chandra ashtamesh v tritiyesh shukra se grah yuddh men hara hai. yahan par chandra budh ke sath bhi grah yuddh men shamil hai. vah budh se grah yuddh men jita hai.
chandra par 4 grahon ka prabhav hai navansh men bhi lagn v pancham bhav pirit hai. jab jatak ki surya men chandra ki antardasha ayi jo ki agast 2009 se thi to jatak puri tarah pagal ho gaya. uski parhai chut gai. daektaron ne use paglkhane bhejne ki salah di. chandra panchmesh v man ka karak hokar pirit hai vahin budh buddhi ka karak hokar pirit hai. navansh men bhi chandra v budh donon lagn men rahu ketu aksh men hai v mangal se drisht hai. is prakar ”khal grah“ ki antardasha ne jatak ko mansik pareshani, ghar valon ko santap v paison ka atyadhik kharcha karaya. abhi jatak usi halat men hai surya ke bad agli mahadsha isi pirit chandra ki hogi. is prakar hamne dekha ki shastron men kahi baton ke anurup khal grah ki dasha bahut hi pratikul parinam deti hai. ye nimn baton par nirbhar karte hain.
û grah yuddh men hara grah kundli ke kin bhavon ka svami hai (unse sanbandhit kharab parinam)
û mahatvapurn tathya yah hai ki vah grah yuddh men kis grah se hara hai vo kundli ke kis bhav ka svami hai.
û grah yuddh men shamil grahon ka kundli men apsi sanbandh kaisa hai.
û anya grahon ki drishti, yuti adi ka sanbandh. pap grahon ka sanbandh - atyadhik kasht shubh grahon ka sanbandh - kasht men nyunta
û khal grah ki dasha umra ke kis parav men ati hai uska prabhav (desh, kal, patra) udahrn: yuva larke ki kundli men khal panchmesh -pagalapan. bari umra ke vyakti ka khal panchmesh - bachchon ko kasht v mansik pareshani.
û grahon ke naisargik karakatvon men bhi kami ati hai. in dashaon v antardashaon men agar gochar bhi pratikul ho to atyadhik kharab parinam de sakta hai.