prashna: mukhya ratn nau hi kyon hain jabki anek prakar ke aur ratn bhi upalabdh hain?
uttara: brahmand men nau grah hain jinka mahatvapurn prabhav jatak par parta hai. in grahon se nikli rashmiyon ko ekatrit karne ki kshamata navaratnon men pai jati hai, atah ye ratn hi pramukh ratn hue. anya ratn alpamatra men in rashmiyon ko ekatrit karne men saksham hain, atah ve uparatn kahlae.
prashna: ratn, uparatn, kritrim ratn v rangin kanch men kya antar hai?
uttara: charon men antar unki grah rashmiyon ko avshoshit karne ki kshamata par adharit hai. ratn sab se adhik rashmiyan grahan karte hain. unke bad uparatn aur fir kritrim ratn. rangin kanch n ke barabar rashmiyan grahan karta hai.
prashna: kya achche ratnon ka prabhav adhik hota hai?
uttara: achche ratnon ka prabhav nishchay hi adhik hota hai kyonki ye ratn rashmiyon ko jyon ki tyon avshoshit karne men saksham hote hain. jaise ek saf shishe ke arpar sab kuch saf-saf dikhai deta hai aur dhundhle shishe ke arpar dekhne men kathinai hoti hai.
prashna: yadi koi vyakti achcha ratn dharan karne men saksham nahin ho to kya vah upay se vanchit rah jaega?
uttara: jaise koi garib vyakti apna daektari ilaj nahin kara pata hai vaise hi vaidik ratn dharan karne men asamarth vyakti ratn ke upay se vanchit rah jata hai. jis prakar daektari ilaj men bhi kam mulya ki davaiyan hoti hain jinka sevan kar ya fir parhej ya sanyam dvara svasthya labh prapt kiya ja sakta hai, usi prakar, ratn ke abhav men jatak anya upay jaise dan, vrat, mantra jap adi ke dvara kasht ka nivaran kar sakta hai.
prashna: kya ratn ko dhatu vishesh men pahnna avashyak hai?
uttara: dhatu ratn ki kshamata ko kam ya adhik kar deti hai. atah upyukt dhatu men hi ratn dharan karna uchit hai. jaise nilam, gomed v lahsuniya panchdhatu men, moti chandi men, hira plaitinam men v anya ratn svarn men dharan karne chahie.
prashna: ratn kho jae, tut jae ya usmen darar a jae to kya karna chahie?
uttara: ratn ka tutna ya usmen darar ana ashubh mana gaya hai. aise men upyukt grah shanti karani chahie aur naya, bara tatha achchi gunavatta ka ratn dharan karna chahie. yadi ratn kho jae to ise shubh mana gaya hai. aise men samjhna chahie ki grah dosh dur hua. ratn ka pana ashubh hai. mana jata hai ki dusre ke grah kasht pane vale ko prapt ho rahe hain.
prashna: savae men ratn pahnne ka kya arth hai?
uttara: savae men ratn pahnne ka arth hai uska nirdisht bhar se adhik hona. yadi panch ratti ka ratn bataya gaya ho to usse adhik arthat sarhe panch, chah ya sat ratti ka ratn dharan karna chahie. iska arth yah bilkul nahin hai ki keval sava panch ratti ka ratn hi dharan karna hai, paune chah ratti ka nahin. paune chah ratti ka ratn lagabhag sava panch kairet aur sava panch ratti ka paune panch kairet ke barabar hota hai. atah pauna ya savaya mapak ikai par nirbhar karta hai.
prashna: kaun sa ratn kab tak dharan karna chahie?
uttara: kuch ratn jivanaparyant pahan sakte hain, kuch ratnon ko samyanusar parivartit karna chahie, aur kuch ratn apko bilkul nahin pahnne chahie. yah apki kundli men grah sthiti ke anusar hi jana ja sakta hai. yogkarak ya shubhasth grahon ke ratn sarvada dharan kie ja sakte hain. kintu marak ya ashubh sthan men sthit grahon ke ratn dharan nahin karne chahie. anya grahon ke ratn dashanusar dharan karne chahie.
prashna: anguthi aur laeket men ratn dharan karne men kya antar hai?
uttara: mastishk ke vishesh kendra bindu hamari ungliyon par sthit hain. atah ungli vishesh men dharan karne se ratn dvara ekatrit rashmiyon ka prabhav adhik prapt hota hai. utna prabhav ratn ko laeket men pahnne se nahin milta. atah laeket men lagabhag dogune bhar ka ratn pahnna chahie taki purn prabhav prapt ho sake.
prashna: kya dusre ke pahne hue ratn ko dharan karna chahie?
uttara: dusre ka pahna hua ratn pahnna sarvatha varjit hai kyonki uske madhyam se pahle jatak ke grahon ka shubhashubh prabhav bhi, jo usmen avshoshit ho chuka hota hai, dusre jatak par par sakta hai. yadi pahnna hi ho, to najdiki rishtedar ka pahna hua ratn hi dharan karen, jaise mata-pita, pati ya patni ka pahna hua ratn, kisi anya ka nahin. aise ratn ko bhi dharan karne se pahle use puri tarah shuddh kara len.
prashna: kya tapt ratn (heated stones) kam prabhavshali hote hain?
uttara: ratnon ko garm karne se uski gunavatta par vishesh asar parta hai, atah ve utne prabhavshali nahin rahte jitne ki prakritik.
prashna: kya chote-chote kai ratn ek ratn ke barabar hote hain?
uttara: yah is tathya ke samanantar hai ki jaise ek kamre men sau momabattiyan jal rahi hon aur dusre kamre men bara balb jala raha ho. bare balb ki roshni sau momabattiyon ki roshni se kahin jyada hogi. atah ek bara ratn dharan karna hi uttam hai.
prashna: ratn dharan karne ke samay ka kya mahatva hai?
uttara: ratn men grah ke devta ka vas mana gaya hai. bina dev ke ratn kanch ke tukre ke barabar hota hai. ratn dharan karte samay usmen devta ka avahan kiya jata hai. avahan se dev us ratn men bas jaen iske lie unka kar v hora ka samay chuna jata hai. atah ratn ko prabhavshali banane ke lie upyukt samay par dharan karne ka vishesh mahatva hai. dharan karte samay grah bal bhi purn hona avashyak hai.
prashna: ratn utarne ke niyam kya hain?
uttara: jis prakar se ham kisi atithi ka svagat karke use vida karte hain, usi prakar se hamen ratn dharan ke samay usmen devta ka vas manakar dharan karna chahie aur usi prakar se utarna chahie. utarte samay iski dhup dip dvara archana karen, ratn men sthit devta ko vida karen aur taduprant use surakshit sthan par rakhen.