nirbhan moha jit sang dosha, adhya manitya vinivrit kama. dvandvai rvimukta sukhduahkhasajjai, ganchantay murhaah padamavyayan tat gita ke pandrahven adhyay men purushottam yog men varnan kiya gaya hai. kurukshetra men yuddh ke maidan men kaurav v pandvon ke bich yuddh ke samay jab arjun ko moh upja to shrikrishn bhagvan ne arjun ka moh bhang karne ke liye gyan diya ki yah sharir v sansar nashvar hai, vastavik satya to ishvar ka satya lok hai jahan mrityoprant atma ko pahunchna hota hai, us satyalok ko hi golok bhi kahte hain. bhagvan shri krishn kahte hain jinka man aur moh nasht ho gaya hai, jinhonne atmashakti rup doshon ko jit liya hai, jinki parmatma ke svarup men nitya sthiti hai (dhyan) aur jinki kamnaen purn rup se nasht ho gayi hain, ve sukh duahkh namak dvandvon se vimukt gyani jan us avinashi param pad ko prapt hote hain.
jo vyakti ishvar ke sharnagat hokar us param pad ko prapt karna chahte hain uske liye jis pratham yogyata ki avashyakta hoti hai vah hai mithya ahankar se mohit n hona. chunki vriddh jiv apne ko prithvi ka svami manakar garvit rahta hai ataev iske liye bhagvan ki sharan men jana kathin hota hai. use vastavik gyan dvara yah janna chahie ki vah prakriti ka svami nahin hai. uska svami to parmeshvar hai. jab manushya ahankar se utpann moh se mukt ho jata hai tabhi sharnagti ki prakriya utpann ho sakti hai. jo vyakti is sansar men sadaiv samman ki asha rakhta hai uske liye bhagvan ke sharnagat hona kathin hai. ham yahan upadhiyon ke piche pare rahte hain. koi ‘‘sar’’ ki padvi chahta hai to koi ‘prabhu’ banna chahta hai, to koi rashtrapti, koi dhanvan raja ya kuch aur banna chahta hai. jaise koi daektar hai, koi injiniyar hai, koi vakil hai aur koi jaj hai aur ye sab log sansar men apni pahchan inhin upadhiyon se banaye rakhna chahte hain.
parantu jab tak ham in upadhiyon se chipke rahte hain tab tak ham sharir ke prati asakt bane rahte hain, kyonki ye upadhiyan sharir se sanbandhit hoti hain. lekin ham ye sharir nahin hain, aur iski anubhuti hona hi adhyatmik anubhuti ki pratham avastha hai. upadhiyan tatha asaktiyan hamari kamvasna, ichcha tatha prakriti par prabhutva jatane ki chah ke karan hai. jab tak ham bhautik prakriti par prabhutva jatane ki pravritti ko nahin tyagte tab tak bhagvan ke dham, sanatan dham ko vapas jane ki koi sanbhavna nahin hai. vah shashvat avinashi dham usi ko prapt hota hai jo jhuthe bhautik bhogon ke akarshanon dvara moh grast nahin hota, jo bhagvan ki seva men laga rahta hai. aisa vyakti sahaj hi us param dham ko prapt ho sakta hai.
man ka arth hai svayan ko pujniya vyakti manna, apne mahatva ka trrutipurn mulyankan man athva garva kahlata hai. aisa mani vyakti apne upar man ko banaye rakhne ka anavashyak bhar ya uttaradayitva le leta hai. tatpashchat uske pas kabhi samay hi nahin hota ki vah vastavik gyan prapt kar sake aur apne avgunon ka tyag kar susanskrit ban sake. isi prakar moh ka arth hai avivek. (agyan) bahya jagat ki vastuon, vyaktiyon, ghatnaon adi ko yatharthatah n samjhna moh hai. iske karan ham vastavik jivan ka, tatkalik samasyaon ka samna karne ke sthan par apne hi kalpanik jagat men vicharan karte rahte hain. atah atm gyan ke jigyasuon ko in avgunon ka sarvatha tyag karna chahie. manushya ko is bhram se mukt hona chahiye ki manav samaj hi is jagat ka svami hai.
jab manushya is prakar ki bhrantiyon se mukt ho jata hai to vah parivarik, samajik moh se chut jata hai tab vah sukh, dukh, harsh, vishad jaise dvandvon se mukt ho jata hai tab uska bhagvan ka sharnagat banna sanbhav ho pata hai. keval bhagvan ke hi sharan men rahne se bhakton ki arhata badal jati hai. arthat main bhagvan ka hun aur bhagvan mere hain, main sansar nahin hun aur sansar mera nahin hai. atah jo bhakt apna sanbandh keval bhagvan ke sath hi mante hain ve nitya nirantar bhagvan men hi sthit rahte hain. sansar ka lakshya rahne se hi sansar ki vastu, paristhiti adi ki kamna hoti hai arthat ‘amuk vastu’ vyakti adi mujhe mil jaye’ is tarah aprapt (jo abhi tak prapt nahin hua) ki kamna hoti hai. parantu jin bhakton ka sansarik vastu adi ko prapt karne ka uddeshya hai hi nahin ve kamnaon se sarvatha rahit ho jate hain.
bhakton ka yah anubhav hota hai ki sharir, indriyan, man aur buddhi aur ahan ye sabhi bhagvan ke hi hain, bhagvan ke siva unka apna kuch hota hi nahin. use sukh v dukh donon hi sthiti men ek jaisa vyavhar karna chahie. vastav men sansarik ichchaon ki purti kabhi hoti hi nahin jab tak ek ichcha puri hoti hai tab tak dusri anek kamnaen utpann ho jati hain fir vah unki purti karne ki cheshta men lag jata hai. kamnaon (ichchaon) ki purti ke sukh bhog se nayi-nayi kamnaen paida hoti rahti hanai. sansar ke sanpurn vyakti, padarth ek sath milakar bhi ek vyakti ki bhi kamnaon ki purti nahin kar sakte, fir simit padarthon ki kamna karke sukh ki asha rakhna mahan bhul hi hai isliye kamnaon ki nivritti karni chahiye n ki purti ki cheshta, yahi manushyon ke liye param shanti ka upay hai.