prithvi mata ka vrat v pujan pan. brajkishor sharma brajvasi prithvi mata ke vrat v pujan ka vishesh mahatva shastron v puranadi men varnit hai. sabhi ne bhu devi ka pujanakar apne-apne yogya manovanchit falon ko prapt karte hue jivan ka kalyan kiya hai. prastut hai is lekh men prithvi mata ke vrat v pujan ki vidhi. prithvi mata vrat ke bare men yadi vichar kiya jaye to yah nitya vrat hai. pratidin pujan karna bhi shreyaskar hai. brahman jan sabhi pujnon men prithvi mata ka pujan karate hi hain.
grih nirman ya griharanbh tatha kisi vishesh ayojnarth (jaise ramlila, krishnalila ya vishesh prakar ke yagyadi) bhumi pujan ki anivaryata hai. shastron men varnit bhadrapad shukla panchmi, bhadrapad shukla tritiya, shravan shukla shashthi tatha chaitra krishn navmi ko prithvi devi ka vishesh vrat v pujan ka palan karna hi chahie. in tithiyon men bhagvan varah ka prakatya hai aur bhagvan varah ki do patniyon men bhudevi (prithvi mata) ka vishesh sthan hai atah ye jayanti tithiyan pujniya v vandniya hai. prithvi mata ke prati apradh karne vala narkgami v prithvi mata ka samman karne vala svargadi lokon ko prapt hota hai. atah pratyek manav matra ka prithvi mata ke prati nitya pujan v samman ka shubh sankalp hona hi jivan ke charon purusharth (dharma-artha-kam-moksha) ko pradan karane vala hai. prithvi man ki prasannata hetu unke utpatti-prasang, dhyan, stuti adi ke upakhyan ka bhi pathn-pathan kalyankari hai.
utpatti - prasang: bhagvan narayan ne devarshi narad ji ko bataya ki yah adrniya prithvi madhu aur kaitabh ke med se utpann hui hain. iska bhav yah hai ki un daityon ke jivnkal men prithvi spasht dikhayi nahin parti thi. ve jab mar gaye, tab unke sharir se med nikla - vahi surya ke tej se sukh gaya. atah ‘medini’ is nam se prithvi vikhyat hui. svayan mahabhag dharm ne prithvi ke janm ki katha kuch is prakar batayi. mahavirat purush anantkal se jal men virajman rahte hain. samyanusar unke bhitar sarvavyapi samashti man prakat hota hai. mahavirat purush ke sabhi romkup uske ashray ban jate hain. unhin romkupon se prithvi nikal ati hai. jitne romkup hain, un sabmen ek-ek se jalshit prithvi bar-bar prakat hoti aur chipti rahti hai.
srishti ke samay prakat hokar jal ke upar sthir rahna aur pralykal upasthit hone par chipakar jal ke bhitar chale jana - yahi iska niyam hai. akhil brahmand men yah virajti hai. van aur parvat iski shobha barhaye rahte hain. yah sat samudron se ghiri rahti hai. sat dvip iske ang hain. himalay aur sumeru adi parvat tatha surya evan chandrama prabhriti grah ise sada sushobhit karte hain. mahavirat ki agya ke anusar brahma, vishnu tatha shiv adi devta prakat hote evan samast prani is par rahte hain. punya tirth tatha pavitra bharatavarsha-jaise deshon se sanpann hone ka ise suavasar milta hai. yah prithvi svarnamay bhumi hai. is par sat svarg hain. iske niche sat patal hain. upar brahmalok hai. brahmalok se bhi upar dhruvlok hai. prithvidan ke punya ke bare men shastra kahta hai ki jo purush kisi sandhyaput brahman ko ek bisvamatra bhi bhumi dan karta hai, vah bhagvan shivke mandir-nirman ke punya ka bhagi ban jata hai. faslon se bhari-puri bhumi ko brahman ke liye arpan karne vala satpurush utne hi varshon tak bhagvan vishnu ke dham men virajta hai. is prakar is prithvi par akhil vishva ka nirman hua hai. ye nirmit sabhi vishva nashvar hain. yahan tak ki ‘prakrit-praly’ ka avasar ane par brahma bhi chale jate hain. us samay keval mahavirat purush vidyaman rahte hain. karan, srishti ke aranbh men hi parabrahm shrikrishn ne inhen prakat karke is karya men niyukt kar diya hai.
srishti aur pralay pravahrup se nitya hain- inka kram nirantar chalu rahta hai. ye samay par niyantran rakhne vali adrisht shakti ke adhin hokar rahte hain. pravahakram se prithvi bhi nitya hai. varahakalp men prithvi murtiman rup se virajman hui thi aur devtaon ne iska pujan kiya tha. us samay bhagvan ka varahvtar hua tha. shruti ke sammat se yah prithvi unki patni ke rup men virajman hui. isse mangal ka janm hua aur mangal se ghatesh ki utpatti hui.
usi kalp men brahma ke stuti karne par bhagvan shri hari hiranyaksh ko marakar prithvi ko rasatal se nikal le aye. use jal par is prakar rakh diya mano talab men kamal ka patta ho. usi par rahakar brahma ne sanpurn manohar vishva ki rachna ki. prithvi ki adhishthatri devi ek param sundri devi ke vesh men thi. use dekhakar bhagvan shri hari ke man men prem karne ka vichar utpann ho gaya. ataev bhagvan ne apna varahrup bana liya. unki kanti aisi thi, mano karoron surya hon. unke prayas se param sundri murti bhalibhanti rati ke yogya ban gayi. us devi ke sath ve ek divya varshatak ekant men rahe. fir unhonne us sundri devi ka sang chor diya. khel-hi-khel men ve apne purva varahrup se virajman ho gaye. unke dvara parmsadhvi devi prithvi ka dhyan aur pujan aranbh ho gaya. svayan bhagvan ne dhup, dip, naivedya, sindur, chandan, vastra, ful aur bali adi samagriyon se unka puja kiya.
bhagvan ke agyanusar upasthit sabhi vyakti prithvi ki upasna karne lage. kanvashakha mane kahe hue mantron ko parhakar unhonne dhyan kiya aur stuti ki. mulmantra parhakar naivedya arpan kiya. is prakar triloki bhar men prithvi ki puja aur stuti hone lagi. sarvapratham bhagvan varah ne is prithvi ki puja ki. unke pashchat brahma v sanpurn pradhan muniyon aur manvon dvara iska samman hua. ‘un hrin shrin vasudhayai svaha’ isi mantra se bhagvan vishnu ne iska pujan kiya tha.
dhyan ka prakar yah hai- ‘prithvi devi ke shrivigrah ka varn svachch kamal ke saman ujjaval hai. mukh aisa jan parta hai, mano sharatpurnima ka chandrama ho. sanpurn angon men ye chandan lagaye rahti hain. ratnamay alankaron se inki anupam shobha hoti hai. samast ratn inke upar tatha andar bhi vidyaman hai. ratnon ki khanen inko gaurvanvit kiye hue hain. ve vishuddh chinmay vastra dharan kiye rahti hai. inke mukhmandal par muskan chayi hai. sabhi log inki upasna karte hain. isi prakar dhyan karke sab logon ne prithvi ki puja ki.
kanvashakha men pratipadit inki stuti is prakar hai - jay jaye jaladhare jalshile jalaprade.. yagyasukrjaye ch jayan dehi javavhe. mangle mangladhare mangalye mangalaprade.. manglarthan mangleshe manglan dehi me bhave. sarvadhare ch sarvagyae sarvashaktisamanvite.. sarvakamapraden devi sarvesht dehi me bhave. punyasvarup punyanan bijrupe sanatni.. punyashraye punyavtamalye punyade bhave. sarvashasyalye sarvashasyadhyo sarvashasyade.. sarvashasyahre kale sarvashasyatmike bhave. bhume bhumipasarvasve bhumipalprayne.. bhumipanan sukhkre bhumin dehi ch bhumide. yah prithvi stotra param pavitra hai. jo purush pratah kal iska path karta hai, use balvan raja hone ka saubhagya anek janmon ke liye prapt hota hai.
ise parhne se munashya prithvi ke dan se utpann punya ke adhikari ban jate hain. prithvi-dan ke apaharan se, dusre ke kuen ko bina uski agya liye khodne se, ambuvachi yog men prithvi ko khodne se, dusre ki bhumi ka apaharan karne se jo pap hote hain, un papon ka uchched karne ke liye yah stotra param upyogi hai. prithvi par virya tyagne tatha dipak rakhne se jo pap hota hai, usse bhi purush is stotra ka path karne se mukt ho jata hai.
prithvidan ke punya ke bare men shastra kahta hai ki jo purush kisi sandhyaput brahman ko ek birisvamatra bhi bhumi dan karta hai, vah bhagvan shivke mandir-nirman ke punya ka bhagi ban jata hai. faslon se bhari-puri bhumi ko brahman ke liye arpan karne vala satpurush utne hi varshon tak bhagvan vishnu ke dham men virajta hai, jitne us jamin ke rajahkan hon. jo ganv, bhumi aur dhanya brahman ko deta hai, uske punya se data aur pratigrihita-donon vyakti sanpurn papon se chutakar bhagvti jagdanba ke lok men sthan pate hain. jo paropkari purush bhumidan ke avasar par data ko utsahit karta hai, use apne mitra evan gotra ke sath vaikunth men jane ki suvidha prapt hoti hai.
dusri or apni athva dusre ki di hui brahman ki bhumi haran karne vala vyakti surya evan chandrama ki sthitiparyant ‘kalsutra’ namak narak men sthan pata hai. itna hi nahin, kintu is pap ke prabhav se uske putra aur pautra adi ke pas bhi prithvi nahin thahrti. vah shrihin, putrahin aur daridra hokar ghor raurav narak ka adhikari banta hai. jo gochrbhumi ko jotakar dhanya uparjan karta hai aur vahi dhanya brahman ko deta hai, to is nindit karm ke prabhav se use devtaon ke varsh se sau varsh tak ‘kunbhipak’ namak narak men rahna parta hai.
gauon ke rahne ke sthan, tarag tatha raste ko jotakar paida kiye hue annaka dan karnevala manav chaidah indra ki ayu tak ‘asipatra’ namak narak men rahta hai. jo kamandh vyakti ekant men prithvi par virya girata hai use vahan ki jamin men jitne rajahkan hain, utne varshon tak ‘raurv’ narak men rahna parta hai. anbuvachi men bhumi khodne vala manav ‘krimidansh’ namak narak men jata aur use vahan char yugon tak rahna parta hai. jo dusre ke tarag me pari hui kichar ko nikalakar shuddh jal hone par snan karta hai, use brahmalok men sthan milta hai.
jo mand-buddhi manav bhumipti ke pitron ko shraddh men pind n dekar shraddh karta hai, use avashya hi narkgami hona parta hai. shivling, bhagvti ki murti, shankh, yantra, shaligram ka jal, ful, tulsidal, japmala, pushpamala, kapur, gorochan, chandan ki lakri, rudraksh ki mala, kushki jar, pustak aur yagyaopvit- in vastuon ko bhumi par rakhne se manav narak men vas karta hai. ganth men bandhe hue yagyasutra ki puja karna sabhi dvijati varnon ke liye atyavashyak hai. bhukanp evan grahan ke avasar par prithvi ko khodne se bara pap lagta hai.
is maryada ka ullanghan karne se dusre janm men anghin hona parta hai. is par sabke bhavan bane hain, isliye yah ‘bhumi’ kahlati hai. kashyapki putri hone se ‘kashyapi’ tatha sthirrup hone se ‘sthira’ kahi jati hai. vishva ko dharan karne se ‘vishvamiara’, anant rup hone se ‘ananta’ tatha prithuki kanya hone se athva sarvatra faili rahne se iska nam ‘prithvi’ para hai.