bhartiya prachya vidyaon ka atyant vistrit itihas raha hai. desh, kal aur paristhitiyon ke parivartan ke falasvarup jahan ek or anek navin vidhaon ka prachar-prasar barha vahin anekanek prachya vidyaen lupt hone ke kagar par a gain. iska mukhya karan ye raha ki ye vidyaen achuk parinam deti thin islie inhen guru shishya paranpra ke antargat simit rakha gaya. inhin simaon ke bandhan ke parinamasvarup inka prachar-prasar simatakar simit logon tak hi rah gaya aur ye lupt hone ke kagar par a gain. guruon ka kahna tha ki achuk hone ke karan in vidyaon ka galat upyog bhi kiya ja sakta hai islie inhen gupt rakha gaya hai.
pratyek guru ki apeksha yahi rahti hai ki use shishya ke rup men ek uchit patra mile taki vah use yah ya is jaisi anya vidyaen sikhakar is bhar se mukt ho jae ki uske karan sansar se kisi vidya ka hras ho gaya hai. lekin ise hamari vidanbna hi kaha ja sakta hai ki is vidya ya aisi anya prachya vidyaon ko bhavi pirhi tak pahunchane ke lie unhen yogya shishya nahin mile aur vidya unke sath hi vilupt ho gai. udahrnarth aisi anek vidyaon ka yahan varnan kiya ja raha hai jo luptapray hain.
lekhak ne svayan aisi anek vidyaon ka sankalan karne ka ek prayas kiya aur sikhi bhi. parantu guru ka nirdesh hamesha man-mastishk par havi rahta hai ki ya to yogya patra ko hi sikhana ya fir apne sath hi le jana. inka varnan pustakon men dena guruon ki drishti men samajik apradh hai kyonki unka manna hai ki inhen sarvajnik karne ke pashchat ye apke niyantran kshetra se bahar ho jaengi aur nirankush hokar jan kalyan ki apeksha jan sanhar ka madhyam ban jaengi.
yugon-yugon se gurujnon ne inhin niyamon ka palan kiya aur yogya shishya ki prapti n hone par ve inhen apne sath hi le gae. prachya kalp vidyaon men sona kalp, chandi kalp, tanba kalp, lauh kalp, pital kalp ityadi. isi prakar falon evan fulon ki bhi kalp hai. isi kari mane ek aur rahasyamyi evan adbhut kalp hai jise ham gandh sugandh kalp ke nam se jante hain. kalp shabd ka arth hai ek hi vidhi ya vastu dvara har prakar ki samasyaon ka samadhan hona.
kuch anubhut evan achuk prayog apke lie prastut hai:
1. akhand lakshmi prapti ke lie dipavli se praranbh karke lagatar 41 din tak pratah nishith kal men 4 baje se 6 baje ke bich ap apne ghar men ishan kon men athva ghar ke mandir men shuddh ghi ka dipak prajjvalit karen aur prajjvalan ke pashchat dhage vali mishri ka ek chota sa tukra man lakshmi ka dhyan karke dal den. pratyek 7 din ke bad mishri ke tukron ko chitiyon ke bil ke pas dal den. vishesh: yah prayog anuradha nakshatra se bhi praranbh kiya ja sakta hai. 41ven din is dipak ka dan kisi bhi mandir men kar dena chahie arthat mandir jakar dipak prajjvalit karke vahin chor ana chahie v kuch mishri brahman ko de deni chahie.
2. karj se mukti pane ke lie dipavli se praranbh karke 11 din tak lagatar til ke tel ka dipak ghar men prajjvalit karen aur niranjni men tanbe ka ek sikka rakh den. is sikke ko dipak men hi rakha rahne den aur 11ven din dipak prajjvalit karke kisi mandir men chor den aur sikka mandir ke samip mitti men daba den. dipavli ke atirikt yah prayog shatbhisha nakshatra se bhi praranbh kiya ja sakta hai. samay ratri men 10baje se 12 baje tak rahega.
3. makan banane ki ichchapurti ke lie pratahkal nishith kal men 4 baje se 6 baje ke bich shuddh ghi ka niranjni prajjvalit karke usmen pili mitti ka samput den. yah pili mitti ap kisi bhi nirmanadhin makan ki ninv se lekar aen to uttam rahega anyatha kisi pavitra sthan ki mitti bhi prayog men la sakte hain. yah kalp niyamit 41 din karna chahie. 41ven din dipak ka dan kar den. 41 inten kisi mandir men, gurudvare men ya kisi bhi dharmik sthal par dan kar den.
4. bachche mata-pita ki n sunte hon ratri men 12 baje se 2 baje ke bich ya pratah 4 baje se 6 baje ke bich ate ka niranjni jo chaimukhi honi chahie prajjvalit karke usmen safed makkhan ka samput dena chahie. shuddh ghi ka prayog karen aur niyamit 17 din tak yah kalp karen. dipak bujh jane par usi din godhuli vela men yah dipak prajjvalit karke kisi nirjan sthan par rakh aen v agle din fir se naya dipak banakar prayog karen.
5. parivarik sadasyon ke apsi samanjasya hetu dipavli ki rat men 12 baje ek panchmukhi niranjni jo ki ate ki bani ho shuddh ghi men prajjvalit karke akshat ke dane (jitne parivar men sadasya hon), shuddh shahad ki bundane, mishri ke dane aur lal roli (ek chutki) dal den. pratah nishith kal men 4 baje ke aspas is niranjni ko kisi nirjan sthan par prajjvalit karke chor aen.
6. kanya ka vivah n ho raha ho to yah kalp kanya ki man ko karna chahie. dipavli se praranbh karke athva kisi brihaspativar se praranbh karke karna chahie. haldi ki sat ganthen apne ghar ke mandir ya ishan kon men rakhakar unapar haldi se pila kiya ate ke dipak (chaimukhi) prajjvalit karke chutki bhar haldi dal den. yah kalp lagatar 7 ya 11 din tak karen. is kalp ka samay pratah 6 baje se 8 baje tak hai. usi din gaudhuli vela men yah dipak kisi chairahe par prajjvalit karke rakh aen. yadi chairahe par rakhna sanbhav n ho to kisi nirjan sthan par sukhe ate se chairaha banakar uske bichon bich dipak rakh aen. haldi ki ganthen bani rahengi keval dipak pratidin badla jaega. chairahe ke atirikt dipak kisi shivalay men bhi rakha ja sakta hai.
7. shatruon ko shant karne ke lie dipavli ki ratri men til ke tel ka niranjni jo ki satnaja pisvakar banai gai ho usmen kale, safed til ka samput dekar ghar men prajjvalit karen v bujh jane par kisi chairahe par athva nirjan sthan par sukhe ate se chairahe ka nirman karke fir se prajjvalit karen v chutki bhar lal roli dalakar rakh den. dipavli ke atirikt yah karya kisi shanivar se bhi praranbh kiya ja sakta hai. iska samay ratri kal men 10 baje se 12 baje tak hai.
8. ghar se hari-bimari dur karne ke lie ate ki niranjni banakar usmen utni battiyan lagaen jitne parivar men sadasya hon. rui ki batti banaen aur usmen parivarik sadasyon ke pahne hue kapron men se kuch dhage nikalakar bantane. ise bhalibhanti is prakar samjhen ki man lijie parivar men 5 sadasya hain to panch battiyan banengi aur panchon men ghi dalakar battiyon men alg-alag panchon sadasyon ke pahne kapre se nikale dhage bant jaenge v niranjni bhi panch mukhi hogi evan yah kalp bhi 5 din niyamit kiya jaega. pratyek din dipak badal jaega aur purana dipak kisi bare pipal ke niche prajjvalit karke rakha jaega. pratyek sadasya ke hisab se 2 chaval ke danon ka samput haldi se chaval pile karke diya jaega. man lijie parivar men panch sadasya hon to chaval ke das danon ko haldi se pila karke tel men dala jaega. niranjni men til ke tel ka prayog kiya jaega.
9. niahsantan danpattiyon ke lie dipavli ke pashchat ane vale budhvar se praranbh karke shuddh ghi ki panchmukhi ate vali niranjni men rui se banai batti men pati-patni ke pahne hue kapron se nikale dhage milakar banten v dipak prajjvalit karen. is kalp ka samay pratah kal 4 se 6 baje ke bich hai. ise niyamit 11 din tak karna chahie v bina ched vale moti ka samput den. dipak pratidin badla jaega aur moti vahi rahega.
pratyek din dipak prajjvalit karke mandir men apne isht devi athva devta ke sammukh rakh aen. is moti ko apne pas rakhen v kisi bhi shukla paksh ki tritiya, navmi, trayodshi ya purnamasi ko pital ke matke men sava kilo gur, dhai kilo jau, dhai kilo gehun, 250 gram batashe, 250 gram moth, 250 gram chane ki dal, 250 gram mung ki dal fir vah moti ismen dal den aur 11 bundi ke laddu, panchmeva mithai dalakar matke ko dhakkan se band karke lal kapre se bandh den aur ganga ji men dopahar 12 bajakar 20 minat se 3 bajakar 20 minat ke bich pravahit kar den.
savdhani:
1. mahvari samapt hone ke 3 din bad se hi yah kalp kiya ja sakta hai.
2. yah kalp un danpattiyon ke lie hai jinhen kisi prakar ki medikal samasya nahin hai.
3. yah kalp un danpattiyon ke lie hai jinki patrika men santan ka yog hi nahin hai.
4. yah kalp un danpattiyon ke lie bhi hai jo sochte hain ki unke bhagya men santan sukh nahin hai.
5. yah kalp achuk evan anubhut hai.
10. sharir men kisi bhi prakar ka dard dur karne ke lie dipavli ki ratri men 12 baje ke bad yah kalp karen athva kisi shanivar se praranbh karen. 1 shuddh ghi ki khari batti vali niranjni men apne sir se ulta ghumakar (7 bar) utari gai chini ka sanput den. yah kalp lagatar 11 din tak karen. niranjni ate men haldi milakar banana chahie. pratyek din naya dipak banaya jaega v pahle vala mandir athva kisi dharmik sthan par prajjvalit karke rakha jaega.
pratyek din ek mutthi chini apne sir se 7 bar ulta ghumakar usmen se ek chutki bhar niranjni men dalen v baki sanbhalakar rakh len. 11 din ka kalp pura hone par isi chini se khir khakar kisi mitti ke patra men rakhakar kisi nirjan sthan par rakh aen. khir men dudh, chaval, chini ke atirikt koi aur chij nahin dali jaegi. khir yadi kisi aise sthan par rakhi jae jahan kire-makore ya chitiyan ityadi hon to shighra labh milega.
11. vyapar men vriddhi ke lie dipavli ki ratri men 10 baje ke aspas parantu 12 baje se pahle yah kalp karen. ate ki banai chaimukhi niranjni men gole ke tel men kachche gole ka samput dekar niyamit 7 din tak karen. is karya ko kisi shukravar se bhi praranbh kiya ja sakta hai. pratyek din niranjni badli jaegi v pahle vali niranjni kisi dharmik sthal ya fir kisi nirjan sthan par ya kisi chairahe par prajjvalit karke rakhi jaegi.
12. putra ke vivah men badha a rahi ho to yah kalp karen yah kalp larke ki man karegi. dipavli ki ratri se pranrabh karke lagatar 31 din karen. yah kalp larke ke janm ke var vale din se bhi praranbh kiya ja sakta hai. shuddh ghi ki ate ki niranjni men badam aur mishri ka sanput den. yah kalp pratah 8 baje se 10 baje ke bich karen evan usi din sandhya ke pashchat is dipak ko kisi nirjan sthan par sukhe ate se chairahe ka nirman karke uske bichon-bich rakh den. larke ke vivah men a rahi badhaen shighra dur hongi.
vishesh:
- niranjni shabd ka tatparya upay se hai.
- yah kalp dip tantra se sanbandhit hai arthat uprokt sabhi upay tantra se sanbandhit hain atah shighra faldayi hain.
- kalp karte samay apni manokamna apne man men dharan avashya karen ki ap apni kis ichchapurti ke lie yah kalp kar rahe hain.