kabhi-kabhi kuch logon ka bhagya aisi karavat badlta hai ki un par ekaek lakshmi ki barsat hone lagti hai. aisa lagta hai mano chappar far kar daulat chali a rahi hai. aisa kin logon ke sath aur kaise ghatit ho sakta hai, iske lie hath ki rekhaen bhi ishara karti hain. jaise - hath bhari, gudguda, anguliyan sidhi, jivan rekha gol, bhagya rekha moti se patli ya iska ant sidhe shani grah par ho aur hath men sabhi grah unnat hon to yah dhanpti yog ya karorpti vyakti ka hath kahlata hai. par kai bar aisa dekha gaya hai aisa yog hone par bhi lakshmi ruth jati hai. iske lie dipavli par lakshmi-ganesh ka pujan vidhivat karne se manushya ko is yog (dhanpti) ka fal milne lagta hai.
- jivan rekha ke sath puri mangal rekha, bhagya rekhaon ki sankhya ek se adhik, angutha piche ki taraf, guru grah, shani grah, budh grah ya anya grahon ka prabal hona, hath mulayam hone se bhi dhanpti yog banta hai. is fal men aur adhik barakat lane ke lie nitya lakshmi mantra ka havan aur gayatri mantra ka path karna chahiye.
- mastishk rekha jitni hi nirdosh aur sidhi hoti hai, vyakti utna hi svatantra mastishk ka hota hai tatha jivan bina kisi sankat ke age barhta hai. aise vyakti dhanvan hote hain. yadi is lakshan ke sath shukra grah utha hua ho, to karya men badhaen bahut adhik ati hain. dhanpti yog ko bhi puri tarah se safal karne men rukavat ati hai. iski shanti ke lie yantra sthapna vidhivat karvani chahie.
- bhagya rekha ka jivan rekha se dur hona bahut hi uttam lakshan mana jata hai. ye vyakti sadaiv karya karne vale hote hain. inka rahn-sahan bare vyaktiyon jaisa hota hai aur kharche bhi isi ke anurup hote hain. yah ek dhanpti yog ka lakshan mana jata hai. kintu kai bar dekha jata hai ki bhagya rekha hriday rekha ya mastishk rekha par ruk jane se dhanpti yog men bahut rukavat ati hai. is dosh ko dur karne ke lie kuber pujan karvana chahie jisse vyakti ke dhanvan banne ke bich ki rukavten dur hon.
- bhari hath hone par rekhaen jitni hi patli, sudaul aur doshrhit hoti hain, vyakti sukhi, dhanvan, svasth tatha gunsanpann hote hain. inki ginti gine chune dhaniko men hoti hai par jivan bhar mansik pareshaniyon ka samna karna parta hai. is dosh ki mukti vipasna sadhna dvara sanbhav hai.
- mukhya bhagya rekha ka ant brihaspati grah par bahut dekhne ko milta hai. ya to yah bhagya rekha jivan rekha se nikal kar brihaspati par jati hai ya bhagya rekha hi shakhanvit hokar brihaspati par pahunchti hai. 2 rekhaen jivan rekha se nikal kar guru par jaen to vyakti bhagyashali hota hai aur 22 varsh ki ayu se hi dhani hona shuru ho jata hai. yadi is rekha par kraes ban jae to yah dhanvan banne ke yog ko kam kar deta hai. iske lie brihaspati pujan, brihaspati yantra aur brihaspati sadhna karni avashyak hai.
- jivan rekha ke ant men koi rekha yadi chandra parvat ki taraf ati ho to aise vyakti vriddhavastha men dhani hote hain. is yog ka fal kuch samay pahle bhi mil sakta hai. yadi lakshmi pujan karen aur 42 din tak lakshmi mantra ka jap karen to dhan ayu sima se pahle hi ane lagta hai.
- hath men jivan rekha ke sath ek dusri samanantar jivan rekha bhi dekhne men ati hai. kai bar yah rekha puri jivan rekha ke sath chalti hai. yah dohri jivan rekha kahlati hai. dohri jivan rekha nirdosh hone par vyakti ko jivan men sukh-shanti, dhan aur pratishtha deti hai. is dasha men yadi hath ka akar chaira, bhari aur mansal ho to vipul dhan-sanpatti prapt hoti hai. vyakti jivan men asadharan unnati karne vala hota hai.