88 varsh ki umra tak bhi vakt ki karvten unki hasti par apni silvten nahin chor pain. yah hai chah dashak tak ruphle parde par chae rahne vale sadabhar nayak dev sahab ke jivan ki dilachasp dastan sitaron ke aine se--- dev sahab ka janm shukra ke tula lagn men hua. lagn men tritiyesh brihaspati sthit hai. tritiya bhav abhinay, natya kala, sangit adi ka bhav hai.
kalpurush ki kundli men tritiyesh budh abhinay kshamata ke karak hain. lagnesh shukra dvadash bhav men dvadshesh budh v navmesh budh se yut hokar baithe hain. tula lagn men shani yogkarak hote hain. lagnesh shukra, dvadshesh v navmesh budh, chaturthesh v panchmesh shani tatha labhesh surya in sabhi ki yuti dvadash men hai. tritiyesh ka lagn men hona v abhinay ke karak budh ka lagnesh se yuti v karmesh se drishti sanbandh devanand ke abhinay ke kshetra men ane ka karan bana. tritiyesh guru apne hi nakshatra men aur budh ke upanakshatra men lagn men sthit hai.
yahi karan hai ki dev sahab ne adakari ka ek alag hi andaj prastut kiya. dvitiyesh mangal labh bhav men rahu se yut hokar kutunb, pancham v shashtham ko purn drishti pradan kar rahe hain. dvitiya bhav vani, kutunb, dhan adi ka bhav hai. devanand ka janm dhanadhya parivar men hua. sabhi bhai bahnon ko nashte men dahi ki garhi lassi milti thi jismen mave ka pera dala hota tha. kundli ke yog karak grah shani ki bhi purn drishti kutunb bhav par hai.
is karan se bhi unka parivar sukh suvidhaon se sanpann tha tatha samaj men sammanajanak sthiti ko prapt tha. tritiyesh brihaspati ke lagnasth hone ke karan aur shadbal men sarvadhik bali hone ke karan unmen abhinay kshamata kut-kut kar bhari thi. iske sath hi tritiya bhav chote bhai-bahnon ka bhav hai to unka purn sahyog devanand ko prapt tha. devanand ke chote bhai goldi anand bhi dev sahab ke sahyog se gaid film ke nirdeshan ko safltapurvak anjam dene men safal rahe.
chaturthesh shani dvadash bhav men lagnesh shukra, bhagyesh v vyayesh budh tatha labhesh surya se yut hokar baithe hain. shani par karmesh chandrama ki purn drishti hai. chaturth bhav sukh bhav kaha jata hai. chunki sukhesh vyay men sthit hai atah unke sukhon ka vyay hua, kahne ka tatparya hai ki dev sahab ne apna ghar chorakar munbai men kafi samay tak filmon men kam pane ke lie sangharsh kiya.
chunki bhagyesh, lagnesh, karmesh adi ka purn prabhav bhi chaturthesh shani ke sath tha isilie unhen apne prayason men saflta mili. pancham bhav ka vivechan yadi shiksha ki drishti se karen to panchmesh shani apne se panchmesh arthat navmesh budh, pancham se bhagyesh arthat lagnesh shukra se yut hai tatha pancham se shashthesh chandrama jo ki karmesh bhi hai se drisht hai. dev sahab ki shiksha bi. e. tak angreji madhyam se samanya shreni men purn hui.
ve em. e. bhi karna chahte the kintu tab tak pita ki arthik sthiti bigar chuki thi atah dev sahab ne parhai v ghar donon chor diye aur abhinay jagat men sangharsh karne ke lie munbai ki rah pakar li. pancham bhav ki vyakhya yadi prem ki drishti se ki jae to dev sahab ke jivan men prem ki koi kami nahin rahi. kaelej ke dinon men usha chopra namak sahpathin se ve man hi man prem karte the par ijhar n kar pae. ek dusri larki se lagav hua kintu dev sahab ke bajae unke dost ne apne dil ki bat kah di aur vah unse alag ho gai.
ek bar dadar steshan men unhen ek larki mili. unhonne usse apne man ki bat kahne men bilkul der nahin lagai lekin usne jab unhen apne bvayafrend ke bare men bataya tab dev sahab ulte pair vapas ho gaye. filmon men saflta milne ke bad devanand ne ek se ek safal v hit filmen din. usi samay dev sahab ne ‘jit’ film sain ki jismen unki nayika thin suraiya.
jaldi hi dev v suraiya ki mitrata prem men parivartit ho gai. kintu suraiya ke parivar vale is rishte se khush nahin the jiske karan jald hi suraiya v dev sahab ke prem ka ant ho gaya. devanand ne bahut mushkil se khud ko sanbhala aur filmon men vyast ho gaye. devanand ki agli film baji men vishesh bhumika ke lie nai tarika mona sinh ko liya gaya. donon men dhire-dhire jan pahchan barhi.
suraiya se dil tutne ke bad dev sahab ke jivan men jo khalipan a gaya tha use mona ne bhar diya. baji hit hui aur donon ne shadi karne ka faisla kar liya. jald hi donon shadi ke bandhan men bandh gaye. devanand ki kundli men panchmesh, lagnesh, navmesh, dvadshesh, ekadshesh arthat shani, shukra, budh, surya sabhi ki yuti dvadash bhav men hai jiske karan unke anek prem sanbandh bane kintu vyay bhav v vyayesh ke prabhav ke karan sthayi nahin rahe. vivah ke bad devanand ne ek ke bad ek anek safal filmen din. 1941 se 1961 tak shukra ki mahadsha chali.
shukra lagnesh hokar chandrama ke nakshatra v rahu ke upanakshatra men sthit hai. chandrama karmesh hai aur lagnesh shukra, labhesh surya, bhagyesh v vyayesh budh tatha sukhesh v panchmesh shani ko purn drishti pradan kar rahe hain. rahu dhanesh v saptamesh mangal se yut hokar labh bhav men baithakar dhanagam ko sunishchit kar rahe hain. lagn kundli men lagnesh shukra karmesh ke nakshatra men hai tatha yogkarak shani v labhesh se yuti men bhi hai.
yadi navansh kundli ka adhyayan karen to ham dekhenge ki navansh men bhi lagnesh brihaspati tritiya bhav men tritiyesh shukra v budh se yuti banakar baithe hain. sath hi brihaspati navansh men karmesh bhi hai. yahi karan hai ki devanand ne film jagat men apne behtrin abhinay kshamata ke karan ek alag jagah banai. tritiya bhav, tritiyesh v budh tinon hi abhinay kshamata ke karak hain. jab bhi lagnesh, karmesh, dhanesh, labhesh v kundli ke yogkarak grahon ka sanbandh inse hoga jatak ko abhinay ke kshetra men saflta prapt hogi ismen koi sandeh nahin hai.
shukra ki mahadsha men devanand ne filmi kariyar ka charmotkarsh prapt kiya. jab shukra ki dasha samapti ki or barh rahi thi tabhi devanand ka filmi kariyar bhi apni dhalan ki or tha. anek asafal filmon jaise- ‘nicha nagr’, ‘afsr’ adi ke bad ‘fantush’ ‘si. ai. di.’, ‘kalabajar’, tin deviyan adi suprhit filmen devanand ke nam ke sath juri hain. in sabke bad ai ‘gaid’ ek kinvdanti ban chuki thi, selulaid par rachi kinvdanti.
‘gaid’ ek nirmata ke rup men dev sahab ke lie aur nirdeshak ke rup men goldi ke lie ‘uchchatam shikhr’ the jise chune ke bad dhalan ki yatra to shuru honi hi thi. iske bad ‘tisri manjil’, ‘jaeni mera nam’, ‘hare rama hare krishna’ tatha ant men ‘desh pardesh’ devanand ki akhiri hit film thi. 80, 90 ke dashak men devanand dvara banai v abhinit lagabhag sabhi filmen asafal hi rahin. kintu dad deni hogi unki jivtta ki ki har film ke flaep hote hi ve agli film ki taiyari shuru kar dete the.
yah sara khel grahon ka hi hai kyonki ve filmon ke lie hi bane the. unki lagn kundli men lagnesh, dhanesh, labhesh, karmesh sabhi mahatvapurn bhavon evan grahon ka ghanishth sanbandh bana hua hai. inhen jitna dhanoparjan abhinay jagat se hua vah sabhi kuch inhonne filmi duniya men hi laga diya. inhonne jitni safal filmen din utni hi lanbi katar inki asafal filmon ki bhi hai. iska ek matra karan vyayesh ka uprokt sabhi grahon ke sath ghanishth sanbandh hai. inhonne saflta ka shikhar bhi dekha aur asflta ka dharatal bhi dekha lekin inki jivtta ko kabhi anch nahin ai. dev sahab ne darshakon ke samne apni alag chavi banai aur use kayam rakha v hamesha apne suted-buted andaj men hi logon se milte the.
devanand ke jivan ki antim dasha brihaspati ki thi. brihaspati tritiyesh arthat ashtam se ashtamesh hain sath hi tritiya bhav men baithe hain. brihaspati ki dasha 2002 men praranbh hui jo ki 2018 tak chalni thi kintu 4 disanbar 2011 ko landan men unka dehavsan ho gaya. lagnesh dvadash bhav men sthit hai jiske karan janm sthan se itni dur inki mrityu hui. lagnesh hi ashtamesh bhi hai, dvadash bhav men baithakar shashth bhav ko purn drishti de rahe hain aur shashthesh lagn men baithakar lagn ko balvan bana rahe hain jis karan inhane dirghayu prapt hui aur aj hamare bich n hokar bhi apni abhinay kshamata ke karan hamari smritiyon men amit chavi banae hue hain.