yadi apne aspas ke vatavaran ko purnataya shuddh, satvik v sakaratmak n kiya jaye to lakshmi prapti ke totkon ke rup men kiye jane vale prayog, totke, shri dhan lakshmi yantra pujan, lakshmi prapti mantra, anushthan v yagya sabhi nirarthak ho jate hain. islie lakshmi prapti ke totkon ko siddh karne ke ichchuk sadhkon ke lie yah parmavashyak hai ki ve is lekh men vyakt kiye gaye vicharon ko apne jivan men apnaen tatha lakshmi ki aisi anukampa prapt karne men saksham ho jaen ki unhen sthir lakshmi ki prapti ho jae v unhen lakshmi prapti ke totkon ko siddh karna aur bhi saral ho jaye.
is bhautikvadi yug men jivnyapan ke lie dhan ka hona param avashyak hai aur dhanoparjan ke lie shram ke sath-sath dhan ki devi bhagvti lakshmi ki nishthapurvak puja upasna karna jaruri hai. sath hi yah janna bhi utna hi jaruri hai ki bhagvti kis sthan par aur kis tarah ke acharan ke vyakti ke ghar men sthayi rup se vas karti hain. is jankari ke abhav men uparjit dhan bhi hath se nikal jata hai. yahan isi bat ko dhyan men rakhte hue kuch mahatvapurn tathya prastut kie ja rahe hain jinka anusaran kar sudhi pathakagan apne ghar men lakshmi ke sthayi vas ke upay kar sakte hain.
lakshmi kahan rahti hain
madhur bolne vala, kartavyanishth, ishvar bhakt, kritagya, indriyon ko vash men rakhne vale, udar, sadachari, dharmagya, mata-pita ki bhakti bhavna se seva karne vale, punyatma, kshamashil, danshil, buddhiman, dayavan aur guru ki seva karne vale logon ke ghar men lakshmi ka sthir vas hota hai.
- jiske ghar men pashu-pakshi nivas karte hon, jiski patni sundar ho, jiske ghar men kalah nahin hota ho, uske ghar men lakshmi sthayi rup se rahti hain.
- jo anaj ka samman karte hain aur ghar ae atithi ka svagat satkar karte hain, unke ghar lakshmi nishchat rup se rahti hain.
- jo vyakti asatya bhashan nahin karta, apne vicharon men duba hua nahin rahta, jo ghamandi nahin hota, jo dusron ke prati prem rakhta hai, jo dusron ke dukh se dukhi hokar uski sahayta karta hai aur jo dusron ke kasht ko dur karne men anand anubhav karta hai, lakshmi uske ghar men sthayi rup se vas karti hain.
- jo nitya snan karta hai, svachch vastra dharan karta hai, jo dusri striyon par kudrishti nahin rakhta, uske jivan tatha ghar men lakshmi sada bani rahti hain.
- anvle ke fal men, gobar men, shankh men, kamal men aur shvet vastra men lakshmi ka vas hota hai.
- jiske ghar men nitya utsav hota hai, jo bhagvan shiv ki puja karta hai, jo ghar men devtaon ke samne agarabatti v dipak jalata hai, uske ghar men lakshmi vas karti hai.
- jo stri pati ka samman karti hai, uski agya ka ullanghan nahin karti, ghar men sabko bhojan karakar fir bhojan karti hai, us stri ke ghar men sadaiv lakshmi ka vas rahta hai.
- jo stri sundar, harini ke saman netra vali, patli kati vali, sundar kesh shringar karne vali, dhire chalne vali aur sushil ho, uske sharir men lakshmi vas karti hain.
- jiski stri sundar v rupvti hoti hai, jo alp bhojan karta hai, jo parva ke dinon men maithun ka parityag karta hai, lakshmi uske ghar men nishchit rup se vas karti hanai.
- jo suryoday se pahle (brahm muhurt men) uthakar snan kar leta hai, us par lakshmi ki kripa sada bani rahti hai.
- jo gaya dham men, kurukshetra men, kashi men, haridvar men athva sangam men snan karta hai, vah lakshmivan hota hai.
- jo ekadshi tithi ko bhagvan vishnu ko anvla fal bhent karta hai, vah sada lakshmivan bana rahta hai.
- jin logon ki devta, sadhu aur brahman men astha rahti hai, unke ghar men lakshmi ka sthayi vas hota hai.
- jo ghar men kamal gatte ki mala, laghu nariyal, dakshinavart shankh, parad shivling, shvetark ganpti, mantrasiddh shri yantra, kankdhara yantra, kuber yantra adi sthapit kar nitya unki puja karta hai, uske ghar se lakshmi pirhiyon tak vas karti hain.
- dharm aur niti par chalne vale tatha kanyaon ka samman karne logon ke jivan aur ghar men lakshmi sthayi rup se vas karti hain.
lakshmi kahan nahin rahti hain
jo log alsi hote hain, jo ishvar men vishvas nahin karte, jo bhrashtachari, chor tatha kapti hote hain, unke pas lakshmi nahin rahti hain.
jo log buddhiman nahin hote, dhan-prapti ke lie prayatn nahin karte, unke jivan men lakshmi kabhi nahin ati hain .
jo vyakti guru ka anadar karta hai, jo guru ke ghar chori karta hai, jo guru patni par buri najar rakhta hai, uske jivan aur ghar men lakshmi nahin rahtin.
jo vyakti devtaon ko basi pushp arpit karta hai, jo ganda rahta hai, jo tute-fute ya fate hue asan par baithta hai, use lakshmi ki kripa prapt nahin hoti hai.
jo vyakti ek panv se dusra panv ragar kar dhota hai, jo gande sthan par sota hai, jo sayankal men stri ke sath sahvas karta hai, jo din men sota hai uske jivan tatha ghar men lakshmi kabhi nahin rahti.
jo vyakti ghar men aya hua ya ghar men banaya hua mishtann ghar men rahne valon ko die bina hi kha leta hai, jo ghar ki rasoi men bhed-bhav rakhta hai, lakshmi uska sath chor deti hain.
dusron ka dhan harpne vale, par-stri gaman karne vale, suryoday ke bad tak sone vale vyakti ko lakshmi tyag deti hain. jo devtaon ki puja nahin karta, uske jivan tatha ghar men lakshmi kabhi nahin rahti hain.
jo vyakti vyarth hi hansta rahta hai, jo khate vakt hansta hai, lakshmi uske pas kabhi nahin rahti hain.
jo stri gandi aur pap karm men rat rahti hai, jo par-purushon men man lagati hai, jiska svabhav dushit hota hai, jo bat-bat par krodh karti hai,
jo apne pati ko dabane ke lie rosh pradarshan, chal ya mithya bhashan karti hai, uske ghar lakshmi nahin rahti.
jo stri apne ghar ko saja kar nahin rakhti, jiske vichar uttam nahin hote, jo apna ghar chor dusron ke ghar nitya jati rahti hai, jise lajja nahin ati, uske ghar men lakshmi kabhi nahin rahti hain.
jo stri dayahin hoti hai, svabhav se nirdayi hoti hai, dusron ki chugli karne men lagi rahti hai, jo dusron ko lara-bhirakar svayan ko chatur samjhti hai, uske ghar men lakshmi vas nahin hota hai.
jo stri svayan ko saja-sanvar kar nahin rakhti ya jis stri ka ghar saja-sanvra nahin hota, uske ghar lakshmi nahin rahtin.
mansahari logon ke ghar men lakshmi ka vas nahin hota.
nashile padarthon ka sevan karne valon ke sath lakshmi nahin rahti hain.
jo stri apne pati ki priya nahin hoti, uske ghar men lakshmi nahin rahti hanai.
jo stri apne ghar men puja ka sthan nahin rakhti, jo devtaon ki arti nahin utarti, unhen dhup nahin dikhati, jo arti nahin gati, lakshmi uska sath nahin deti hain.
jiska koi guru nahin hota, use lakshmi ki kripa nahin milti.
jo stri din men soti rahti hai, mata-pita, sas-sasur ka adar nahin karti, uske ghar men lakshmi kabhi nahin rahti hain.
jo vyakti purusharthahin aur akarmanya hota hai, uske ghar lakshmi nahin ati.
jo apne ghar men shiv, vishnu, ganpti aur shaligram ko sthapit nahin karta aur unki nitya puja nahin karta, uske ghar lakshmi nahin rahti hain.
jo lakshmi ke stotra ka path ya mantra ka jap nahin karta, dhan ka apavyay karta hai, ya keval bhog men hi jivan ka sukh samjhta hai, use lakshmi kripa kabhi prapt nahin hoti.
jiske ghar men kalah hota hai, jo apni patni ka bat bat par apman karta hai, use naukrani samjhta hai, uske ghar lakshmi ka vas nahin hota.