jivan ki kahani grahon ki jubani  

jivan ki kahani grahon ki jubani enjelina joli pan. sharad tripathi yah satya hai ki achche fal kathan ke lie kundli ki gahrai men jana avashyak hai, lekin grahon ki sthiti ke vishleshan ke adhar par bhi vyakti ke jivan ka bahut kuch sar bataya ja sakta hai. jyotish ek aisa madhyam hai jiske dvara ham vyakti ke jivan ki tamam achchi v buri baton ka vishleshan karte hain- ye batane chahe bhavishya ki hon, vartaman ki hon ya atit ki hon. hamari bhartiya sanskriti men to aj bhi ekal vivah ka hi prachalan hai parantu pashchimi deshon men log jivan sathi badlte rahte hain. jyotish ke madhyam se aur desh-kal-paristhiti ko dekhte hue yadi gahrai men jakar kisi bhi vyakti ki janmakundli ka vishleshan karen - vah chahe bhartiya ho ya pashchimi desh ka nivasi to fal kathan men koi antar nahin milta. grah jaisa prabhav eshiyai logon par dalte hain, vaisa hi prabhav yuropiya ya amriki logon par bhi dalte hain. grahon ka khel aise logon ke bare men kya kahta hai, aie grahon ke madhyam se janne ka prayas karen. hamara prayas hai ki vishleshan ke madhyam se ham pathkon, jyotish jigyasuon, khasakar jyotish ki shiksha prapt kar rahe vidyarthiyon, ka margadarshan karen aur ve iska pura-pura labh uthaen. is bar bat karte hain pashchimi sabhyata men pali ek mahila ki. is shrinkhla ke dusre lekh ki shuruat enjelina joli namak ek aisi mahila (abhinetri) se karte hain jo bachapan men khud se ghrina karti thi aur aj jise puri duniya sarahti hai. aj vah sabse sundar mahilaon men gini jati hain. vah sanyukt rashtra ki ‘‘gudvil ambesdr’’ hain. apne saundarya aur vilakshan abhinay pratibha ke karan unhen aeskar samet kai pratishthit puraskaron se navaja gaya. do god lie bachchon ki man hone ke sath unhonne tamam vivadon ke bich hal hi men apni aur mashhur halivud abhineta braidpit ki santan ko janm diya hai. ek man aur gudvil ambesadar ki bhumika ke bich 32 varshiya halivud abhinetri enjelina joli apni kamiyon ko chipane ki bajay aksar un par charcha karti najar ati hain. enjelina ek fransisi shabd hai, jiska arth hai ‘khubsurat nanhi pari’. inka janm kailiforniya (las enjilsa) amerika men jane mane abhineta jan hnait aur madal marshalain vartad ke ghar 4 jun 1975 ko pratah 9 bajakar 6 minat par hua. inki kundli ka vishleshan is prakar hai. kark lagn aur lagn men shukra ka baitha hona, ye yog rup rang aur sundrta ko barhate hanai. lagnesh chandra navam bhav men guru aur mangal ke sath baitha hai. lagnesh ki guru-mangal ke sath yuti svabhav ko jiddi v svabhimani banati hai. pancham bhav men baitha rahu in tinon grahon ko apni panchvin drishti se dekh raha hai jiske falasvarup kabhi-kabhi inke nirnay galat ho jate hain jo inki pratishtha men kami late hain. janm ke samay inhen budh ki mahadsha mili thi, jo san 1988 tak arthat inki 13 varsh ki ayu tak rahi. budh inke vyay v tritiya bhavon ka svami hai. tritiya bhav, chaturth bhav (mata) se dvadash bhav hota hai aur pita (navm) bhav se saptam (mark) hota hai. arthat tritiya bhav mata v pita donon ke lie kharab hota hai. isi karan inke bachapan se hi mata-pita alag hue aur bachapan kashtamay raha. san 1981 men jab budh men dasham bhav ke svami aur navmesh (pita) ke sath sthit mangal ka antar chal raha tha, tab is umra men pahli bar pita ke sath film men abhinay karne ka mauka mila. 1986-87 men budh men saptamesh shani ki dasha chal rahi thi. atah is samay vivah ki umra to hoti nahin atah is samay inke praurh vyakti se sanbandh ho gaye. kintu uski shani ki isi dasha men mata pita fir se sath rahne lage. saptam arthat chaturth (mata) se, chaturth aur navam (pita), se ekadash sthan hota hai. ketu ki mahadsha ne inke kairiyar ko bahut unchai par pahunchaya kyonki vah ekadash bhav men surya v budh ke sath sthit hai. surya ke ekadash men sthit hone se prasiddhi mili, budh ne abhinay kala v myujik vidiyo men achchi saflta dilai. 1993 men ketu men bhagyesh guru ka antar chal raha tha. isi samay inhonne sairbog-2 namak film se haelivud men kairiyar ki shuruat ki. 1995 men ketu ki mahadsha samapt hui aur shukra ki mahadsha lag gai. shukra inka chaturthesh hai jo inke apne nae ghar ka suchak hai. islie chaturthesh ne fauran ate hi british abhineta aur sahnayak jani milar se inke prem sanbandh banae aur 28 march 1996 ko jab shukra men shukra men shukra ka pratyantar chal raha tha tabhi inki shadi milar se kara di. isi shukra men shukra ke samay men inhen golden glob v emi puraskar ke lie namankit kiya gaya. farvri men shukra men shukra ka antar samapt hone ke bad shukra men surya jaise hi praranbh hua vaise hi 3 farvri 1999 ko pati milar se talak ho gaya. surya prithktavadi grah hai aur shukra ki rashi men baitha hua hai tatha saptamesh shani se dvadash sthan men bhi sthit hai. yah surya dampatya ke lie to thik nahin hai magar ekadash bhav men baithakar prasiddhi dilane men sahayak hai. atah isi varsh surya ne inhen sarvashreshth abhinetri ka pratishthit ‘’aeskar puraskar’’ dilaya. iske age ka samay surya ka pratyantar hai jo dvitiya ka svami hokar ekadash men baitha hai. iske bad chandra ka antar jo lagnesh hokar bhagya bhav men baitha hai. fir mangal ka antar jo panchmesh v dashmesh hokar bhagya bhav men baitha hai. isne inhane apne jivan ki sarvochch unchai tak pahunchaya. isi samay inki film lara koft rilij hui aur is film ne jordar antarrashtriya khyati arjit ki aur duniya bhar men 275 lakh dalar ki kamai ki. isse enjelina joli ko 70 lakh dalar prapt hue, jisse vah us samay ki vishva ki shirsh abhinetri ho gain. pushing tin namak film men inhonne apne se bis varsh bare ameriki abhineta bili bab thartan ki patni ki bhumika nibhai. ek bar fir joli ko prem ho gaya aur vah midiya men charcha ka vishay ban gain. 5 mai san 2000 ka yah samay tha shukra men chandra men mangal ka. isi din enjelina ne bili bab ke sath dusri shadi kar li aur us samay vah apne pati ke sath prasann najar ane lagin. lagnesh chandra ka navmesh guru ke sath navam bhav men sthit hona inhen dharmik bhi banata hai. isi karan shukra men mangal ke antar men inhonne 10 march 2002 ko kanbodiya ke anathalay se maidaks namak pahle bachche ko god liya. mangal panchmesh hai. pancham bhav men rahu sthit hai aur panchmesh mangal apne se pancham arthat navam sthan men guru ke sath sthit hai. isi yog ne inhen bachcha god lene ko prerit kiya. 9 disanbar 2002 se shukra men rahu ka antar praranbh ho gaya tha. inki janmakundli men rahu pancham bhav men vrishchik ka 70-22’ arthat shani ke nakshatra men hai aur rahu aur shani apas men shadashtak sanbandh banae hue hain. isi karan 27 mai 2003 ko donon ka talak ho gaya. 5 julai 2005 ko shukra men rahu men surya ka antar chal raha tha. rahu pancham men sthit hai aur ekadash men sthit surya pancham bhav ko dekh raha hai. atah pancham bhav ki is sthiti ke prabhavavash inhonne jahara nam ki larki ko god liya. jaise hi shukra men guru aya vaise hi 2006 men pyupil maigjin ke ank men 100 sundaratam mahilaon men inhen bhi sthan diya gaya. fabrs patrika ke 2006 ke ank men inhen ‘selebriti 100’ men 35van sthan diya gaya. guru ka yahi antar inhen dharmik vatavaran ki or le jaega. in dinon vah bauddh dharm ko parhne men juti hain. kuch logon ka to yah bhi kahna hai ki unhonne bauddh dharm svikar kar liya hai. vah svayan ko kisi dharm vishesh se jura nahin mantin lekin kahti hain ki un logon ke lie ishvar avashya hai, jo apna jivan, dharm ke prati nyochavar kar dete hain. guru chunki santan ka karak bhi hai islie inhonne 27 mai 2006 ko ek putri ko janm diya. gochar men dhai sal arthat 2005 madhya se 2007 ant tak shani ke kark men sthit hokar saptam bhav ko dekhne se punah braid pit se vivah hua. inki kundli men bahu vivah yog ka hona bar-bar vivah ka karan hai. yadi janmakundli men dvitiyesh ya saptamesh ke sath kai grah hon, to vyakti ke utne hi pati ya patni hote hain aur yah yog inki janmakundli men ekadash bhav men purn rup se vidyaman hai. atah yah yog kundli ko aur bhi prabhavi bana raha hai. kanudli vishleshan kutumbakalatranathabhyam samete rgrahvaykaurva. kalatra sankhyan prabadanti santah .. sarvarth chintamni (adhyay 6 shlok 14) vyayeshepapsanyukte vyaye papasamanvite. papagrahen sandrishtaiah deshad deshantaran gatah.. vrihad parashar hora shastra (adhyay 12 shlok 246) yadi janmakundli men vyayesh pap grah se yukt ho aur vyay bhav men pap grah ho tatha pap grah ki drishti vyay bhav par ho, to jatak videsh jata hai. vyayesh budh ketu se yukt hai, vyay bhav men papi grah shani hai aur vyay bhav par papi grah mangal ki drishti hai. abhi tak hamne enjelina joli ke pichle samay aur vartaman samay ke bare men jana. ab inke bhavishya ka jyotishiya vishleshan karen. 19 janvri 2008 se chal raha inka shukra men guru men mangal 16 march 2008 tak chalega. mangal bhagya bhav men baitha hai aur dasham bhav ka svami hai. inhen is mangal ke pratyantar men koi nami puraskar milna chahie. lekin isi samay gochar men mangal ke dvadash bhav (mithun) men vicharan karne se vah puraskar se vanchit rah sakti hain. march 2008 se agast 2008 tak shukra men guru men rahu ka pratyantar rahega jo inki kisi santan v vaivahik sanbandhon ke lie thik nahin rahega. 9 agast 2008 se 10 aktubar 2011 tak shukra men shani ka antar chalega, tab vah fir se vivah karengi.