ek bahut purani kahavat hai chirag tale andhera arthat dipak ki roshni sare ghar men ujala karti hai parantu uske niche nitant andhera rahta hai. yah kahavat vastav men charitarth hui nisha ke ghar men. nisha ka vivah raypur ke ek atyant dhanadhya parivar men hua tha. unka prakashan ka karobar varshon se chal raha hai jahan bachchon ke skul ki pustakon se lekar daktari, injiniyaring, vastukla adi kors men pravesh ke lie pustaken chapi jati hain aur in pustakon ko parh kar n jane kitne vidyarthi uchch shikshan sansthaon men pravesh pa chuke hain.
nisha ko jab putra ratn ki prapti hui to vah khushi se fuli n samai aur apne putra ke bhavishya ko lekar usne n jane kitne sundar sundar sapne sanjoe. mayank bachapan se apni kafi shararti aur uddand tha. use tin varsh ki ayu men ek narsari skul men bheja gaya jahan uska man bilkul nahin lagta tha aur vah bas shararten hi karta rahta. bachapan men sabhi bachche bal sulabh shaitaniyan karte hain aisa soch kar uski shaitaniyon ko najrandaj kar diya jata. nisha ke athak parishram evan lar dular ke falasvarup vah panchvin kaksha tak pahuncha lekin panchvin kaksha ke pashchat usne skul jana bilkul band kar diya aur jabaradasti skul bheje jane par vahan bachchon ki pitai kar deta.
uske uddand vyavhar se naraj hokar use skul se nikal diya gaya. ek pratishthit parivar ka hone ke karan use anek skulon men dakhil karaya gaya par vah apni harkton se baj nahin aya aur anttah uske lie sabhi skulon ke darvaje band ho gae. ghar par bhi uski parhai ke lie bharasak prayatn kie gae par koi saflta nahin mili aur uska vyavhar din pratidin kathor hota gaya. uske chote bhai ko dur bording skul men dala gaya kyonki mayank use bhi apne hi rang men dhal raha tha.
nisha mayank ko manovaigyanik ke pas le gai to mayank ne aspas logon se pata laga liya ki yahan par kis tarah ka ilaj hota hai aur jab use pata chala to vah mammi ko hi pagal kahne laga usne davai khane se saf inkar kar diya. bahut se panditon ko uski janmapatri dikhai gai, kintu unke dvara die gae sabhi ratnon athva tavijon ko usne tor mor kar fenk diya. aj mayank jab 14 varsh ka ho gaya hai, nisha aur uske pati vishal ko yahi chinta khae jati hai ki vah bhavishya men kya karega.
parivar ke karobar men bhi vah hath nahin banta sakta kyonki vah usmane saksham nahin hai. vaise uska mastishk jarurat se jyada tej hai. kanpyutar ke khel hon ya koi iltronik vastu, vah sabhi kuch bina sikhae sikh leta hai. kya hoga mayank ka bhavishya, kaise vah apne jivan ko sanvarega, aie, janen mayank ki kundli se. mayank ka janm gandmul nakshatra ashvini ke pratham charan men hua hai jiska svami ketu hai.
is nakshatra men janme vyakti ka jivan sangharshashil hota hai. vah asthir evan chanchal prakriti ka hota hai. ashvini ke pratham charan men janma vyakti vishesh rup se apne pita ke lie kasht utpann karne vala hota hai aur uske karan mata-pita ko pareshaniyan uthani parti hain. mayank ki kundli men lagnesh budh apni nich rashi men ashtamesh shatru mangal ke sath saptam bhav men yuti bana raha hai jiske karan vah aur adhik ashubh ho gaya hai.
chanuki donon grah lagn ko purn drishti se dekh rahe hanai, mayank ke svabhav men uddandta evan anushasnhinta vidyaman hai. is lagn ke lie chaturth ke svami guru ki bhumika bhi aham hai kyonki vah vidya ka karak hone ke sath-sath chaturth ka svami bhi hai. shiksha ka vichar pancham ke sath-sath chaturth bhav se bhi kiya jata hai.
guru kendradhipti dosh se grast hokar dvadash bhav men baitha hai aur ashubh fal de raha hai, jiski vajah se mayank ka man parhai men nahin laga. pancham sthan ka svami shani svagrihi hokar vahin sthit hai, atah mayank ke pas buddhi ki kabhi nahin hai parantu vah apni uddandta ke karan apni buddhi ka upyog n to sahi dhang se aur n hi sahi karyon men kar pa raha hai.
is janm kundli men shani hi shubh sthiti men hai tatha shubh bhav aur chandra lagn evan surya lagn se karm sthan men sthit hai. is grah sthiti ke falasvarup mayank ko takniki karyon se, lohe se athva pita ke vyavsay se bhi labh hone ki sanbhavna hai.
bhavishya men grah dasha ke anusar shukra ki mahadsha men 18 julai 2011 se jab shani ki antardasha praranbh hogi tab karya vyavsay ki or uski abhiruchi jagrat hogi aur vah apna jivan, sangharshashil hote hue bhi, samanya rup se vyatit karega.