ashtam chandra yani janm kundli men athven bhav men sthit chandra. athvan bhav yani chidra bhav, mrityu sthan, klesh‘vighnadi ka bhav. atah athven bhav men sthit chandra ko lagabhag sabhi jyotish granthon men ashubh mana gaya hai aur vah bhi jivan ke lie ashubh. jaise ki faldipika ke adhyay ath ke shlok panch men likha hai ki ashtam bhav men chandra ho to balak alpayu v rogi hota hai. ek anya granth brihdjatak men bhi varnit hai ki chandra chatha ya athvan ho v papagrah use dekhen to shighra mrityu hogi. jatak tatvam ke adhyay ath ke shlok 97 men bhi athven chandra ko mrityu se jora gaya hai.
jyotish ke granth mansagri ke dvitiya adhyay ke shlok ath men varnit hai ki yadi chandra ashtam bhav men pap grah ke sath ho to shighra maran karak hai. isi karan se adhikatar jyotishi ashtam chandra ko ashubh kahte hain aur jatak ko uski ayu ke bare men bhaybhit kar pujadi karva kar dhan labh bhi lete hain, jyotish ke prakand gyani bhi janmapatri men ashtam chandra ko dekhte hi janmapatri ko lapetna shuru kar dete hain, ve ashtam chandra ko aisa sarp mante hain jiske vish ko janm kundli men sthit shubh grah guru, shukra ya budh rupi amrit bhi nishprabhavi nahin kar sakte. ve ashtam chandra ko bhay ka prayay v sakshat mrityu ka devta mante hain, mainne svayan anek panditon ko ashtam chandra ki bhayankta batate dekha hai.
parantu yah sarvatha galat hai ki ashtam chandra ko dekhte hi janmapatri ke anya shubh yogon, lagn v lagnesh ki sthiti, ashtam v ashtamesh ki sthiti adi ko bhul jaen aur ashtam chandra ko dekhte hi ashubh batana shuru kar den, kya is ashtam chandra ki bhayankta hamen itna sammohit kar deti hai ki ise dekhte hi mrityu ya prabal arisht ke rup men apna nirnay sunane lagte hain, bina yah vichar kie ki sunne vale jatak ko aise murkhatapurn nirnay se kitna aghat pahunchta hai. yah apne ap men nakaratmak jyotish hai aur hamen isse bachna chahie. keval mrityu ya bhayankta hi ashtam chandra ka pratik nahin hai varan asha v jivan ka pratik bhi ashtam chandra hi hai. atah ashtam chandra ka keval nakaratmak paksh hi nahin, balki iske sakaratmak paksh par bhi gahan vichar karne ke bad hi jyotishi ko apna nirnay sunana chahie.
aie ashtam chandra ke bare men jyotish ke vibhinn granthon men likhit nimn shlokon par ek najar dalen jo ashtam chandra ke sakaratmak paksh ko ujagar karte hain arthat bhaybhit karne se bachate hain:
1. jatak parijat men likha hai ki jis jatak ka krishn paksh men din ka janm ho ya shukla paksh men ratri ka janm ho aur uski janm kundli men chatha ya athvan chandra ho, shubh v pap donon prakar ke grahon se drisht ho to bhi maran nahin hota. aisa chandra balak ki pita ki tarah raksha karta hai.
2. mansagri men kaha gaya hai ki lagn se ashtam bhavagat chandra yadi guru, budh ya shukra ke dreshkan men he to vahi chandra mrityu pate hue ki bhi nishkapat raksha karta hai. ab in shlokon par to jyotishigan dhyan dene ki avashyakta samjhte nahin ya dhyan dena hi nahin chahte jo ashtam chandra ka sakaratmak paksh ujagar karte hain balki nakaratmak paksh ko ujagar kar svarth siddh karte hain.
atah hamen ashtam chandra se bhaybhit hone ki avashyakta nahin hai, balki yah jivan ka prayay bhi ban jata hai yadi nimn siddhant is par lagu hon to:
1. jatak ka janm krishn paksh men din ka ho ya shukla paksh men ratri ka ho.
2. janm kundli men chandra shubh grah guru, shukra ya budh ki rashi men ho ya inhin grahon se drisht ho.
3. dreshkan kundli men chandra par guru, shukra ya budh ki drishti ho ya chandra inhin tin grahon ki rashiyon men sthit ho.
4. navansh kundli men chandra par guru, shukra ya budh ki drishti ho ya chandra inhin tin grahon ki rashiyon men sthit ho. aie ab kuch udahrnon se vichar karte hain ki kis prakar ashtam chandra ukt tinon siddhanton ke adhar par jivan ko bhaybhit n kar jivndayak ban gaya.
udaharan 1: jatak ka chandra ashtam bhav men rahu ke sath hai. lagnesh shani bhi shatru surya ke sath hai. chandra kundli ka lagnesh budh ashtamesh mangal ke sath tritiyasth hai. fir bhi jatak aj 49 varsh ka hokar bhi svasth aur josh se apne kam men karyarat hai. ashtam chandra hokar bhi jatak svasthya labh ke sath sukhi jivan ji raha hai. iska karan nimn prakar se bataya ja sakta hai: û jatak ka janm krishn paksh men din ka hai. û chandra ashtamasth to hai par shubh grah budh ki rashi kanya men hai. û dreshkan kundli men chandra uchch ka hokar shubh grah shukra ki rashi vrish men hai. arthat chandra shubh prabhav men hai. û navansh men bhi chandra svarashi ka hokar kark men hai tatha shubh grah budh se bhi drisht bhi hai. atah kah sakte hain ki jatak ke janm chandra par ukt charon siddhant shatapratishat lagu hote hain jis karan se ashtam chandra jatak ko bhaybhit nahin kar paya.
udaharan 2: jatak ka chandra ashtamasth hai. is par ashubh grah shani ki purn drishti hai. chandra kundli ka lagneshbudh bhi shashthasth hai aur tritiyesh surya ke sath hokar ashubh sthiti men hai. dreshkan kudli men bhi chandra par shani aur mangal ka prabhav hai. fir bhi jatak aj 49 ki ayu men bhi apne udyogadi ko svasth hokar sucharu rup se chala rahe hain. iska karan nimn prakar se kaha ja sakta hai: û jatak ka krishn paksh men din ka janm hai. û chandra ashtamasth to hai par shubh grah budh ki rashi mithun men hai. û navansh kundli men chandra shubh grah shukra ki rashi tula men hai. û dreshkan kundli men bhi chandra shubh grah budh ki rashi mithun men hai.
udaharan 3. jatak ka chandra ashtamasth hai aur ashubh grah mangal se drisht bhi hai. fir bhi jatak aj 86 varsh ki ayu men bhi jivit hai. lagabhag 55 sal tak svasth rah kar hi film jagat men kam kar sake. iska karan nimn prakar se kaha ja sakta hai: û jatak ka krishn paksh men din ka janm hai. û dreshkan kundli men chandra shubh grah guru ki rashi dhanu men hai aur anya kisi pap prabhav men nahin hai. û navansh kundli men bhi chandra shubh grah guru v budh se drisht hai tatha budh ki rashi kanya men hai.
udaharan 4: jatak ka chandra ashtam men hai. chandra kundli ka lagnesh budh apni nich rashi men hai tatha ashubh grah mangal se drisht hai. fir bhi jatak aj 54 varsh ki ayu men bhi apne sho rum men puri urja v utsah se sakriya hai kyonki - û jatak ka shukla paksh men ratri ka janm hai aur chandra bhi purnima ke pas ka bali hai, aisa chandra mata ke saman jatak ki raksha karta hai. û ashtam chandra shubh grah budh ki rashi men hai tatha chandra par shubh grah budh v guru ki drishti bhi hai. û dreshkan kundli men chandra shubh grah guru ke sath hai aur chandra par shubh grah budh ki drishti hai. û navansh kundli men chandra shubh grah budh ki rashi mithun men hai.
udaharan 5 jatak ka chandra ashtam bhav men surya ke sath hai. dreshkan kundli men bhi chandra v surya ki yuti hai. navansh kundli men chandra par mangal ki purn drishti hai, fir bhi jatak aj 71 varsh ki ayu men sevanivrit hokar svasth hai. amavasya ka chandra jatak ke lie rakshak bana. û jatak ka krishn paksh men din ka janm hai. û ashtam chandra par shubh grah guru ki drishti hai. ashtam chandra shubh madhyatva men bhi hai. û navansh men chandra svagrahi hokar kark rashi men hai. û dreshkan men chandra par shubh grah guru ki drishti hai aur guru ki hi rashi dhanu men hai.
udaharan 6. sheyar dalal 26.07.1948, 08.00, dilli. jatak ka chandra ashtamasth hai, chandra par mangal ki drishti bhi hai lagnesh surya bhi shatru shani ke sath dvadasth hai, fir bhi jatak aj 59 varsh ki umra men bhi apne vyavsay men svasth hokar pure josh se karyarat hai, kyonki: û jatak ka krishn paksh men din ka janm hai. û chandra ashtam bhav men shubh grah guru ki rashi men hai aur guru se drisht bhi hai. û navansh kundli men chandra shubh grah guru se drisht hai. û dreshkan kundli men chandra shubh grah guru ki rashi men hai aur guru se drisht bhi hai. is prakar chandra par guru ki jivndayi drishti lagn, navansh v dreshkan men par rahi hai. jatak svasth hai, prabhavshali vyaktitva hai v dhani hai. uprlikhit udaharan kundliyon par yadi ek najar dalen to ek achcha vidvan bhi ashtam chandra ko dekhakar galat nirnay lene ki bhul kar sakta hai, atah ashtam chandra ke nakaratmak paksh ko n dekhakar uske sakaratmak paksh par bhi gahan vichar karna chahie aur uski lagn, dreshkan v navansh kundliyon men bhi sthiti v shubhashubh prabhavon ka vichar kar hi antim nirnay len.