apne karya vyavsay men unnati ke shikhar par pahunch par aksar kuch log apne ap ko sarvashaktiman samjhne ki bhul kar baithte hain aur us ishvariya shakti ko bhul jate hain jiske samaksh manushya ek tuchch tinke ke siva kuch bhi nahin hota. aisa hi kuch is vastavik ghatna ke nayak ke sath ghata. samir ka vivah ek sadharan parivar ke sadharan se nain naksh vali sunita se hua tha. samir apne man men khubsurat patni ki chah kab se pale hue tha.
sunita ke shyam varn ko dekhakar uska man bujh sa gaya aur jitne sapne usne apne sukhi vivahit jivan ke dekhe the, use bikhrte se najar ae. sunita ki sughar grihasthi, gharelupan evan karya kushlta uska man nahin jit pai. vah aur uski bahan kanchan koi n koi bahana bana kar hamesha sunita ko pratarit karte rahte. sunita khun ka ghunt pikar rah jati, par kabhi virodh nahin karti. pati ki berukhi ko usne ishvar ki niyati samajh kar apne man ko mana liya tha. samir ki bari bahan jo vivahit hone ke bad uske ghar ke najdik hi rahti thi sunita ko uske rup rang par tane dene men kasar nahin chorti thi.
isi kashamakash ke bich sunita do putron ki man ban gai aur kanchan ko ek ke bad ek putriyan hoti gain aur vah dhire-dhire putra ki chah men chah putriyon ki man ban gai. kahte hain stri hi stri ki dushman hoti hai. apni vivshta ki khij vah sunita par har vakt utarti rahti aur apratyaksh rup se us par uska beta god dene lie mansik dabav banane lagi. samir muk darshak ki tarah sab dekhta aur prativad karna to dur ulta bahan ka hi sath deta. ek din jab sunita ke sabra ki sima tut gai to usne ghar men rakhe yuriya (khad) ko apna uddharak man kar grahan kar liya aur us dham men chali gai jahan alaukik prem hi prem hai.
sunita ke mata-pita ne samir aur kanchan ko beti ki maut ka jimmedar thahrate hue mukdma kiya, par samir apne uchch sarkari ohde aur paise ke bal par riha ho gaya. lekin lagabhag 8-10 sal us par mukdma chalta raha. 1994 men samir ne punarvivah kiya. dusri patni vina dekhne men sundar thi. use laga tha ki ab vah apne sabhi sukh bhog sakega, lekin uski yah ichcha bhi purn n ho saki. vina ko apne saundarya ka vishesh abhiman tha. apne rup ke danbh me,n usne n to kanchan ki chalne di, n hi samir ko samman diya aur n hi putron ko man ka pyar.
ghar men nirantar vivad chalne laga. faltah samir ne sharab ko apna sathi banaya. ab use vina ki jagah, sharab ka shabab hi achcha lagne laga aur vah din rat isi men duba rahne laga. vina se use ek putri prapt hui par gharelu jivan usi tarah chalta raha. karib 4-5 sal bad samir ka sharir puri tarah khokhla ho gaya aur vah parlok men sunita ke pas pahunch gaya. aiye samir ki kundli ka vishleshan karen: jatak ke vrish lagn men grahon ki sthiti sundrta ke prati uske sahaj akarshan, manmauji prakriti tatha svatantra rahn-sahan evan vichardhara ke prati abhiruchi ko darshati hai.
kundli men saptamesh mangal ke lagn men, shukra ki rashi men sthit hone ke karan khubsurat patni ki chah bani. kundli men shani sabse adhik yog karak grah hai tatha saptam sthan kendra men balvan sthiti men hai. atah uski pratham patni sunita shani grah ke gun dharm ke anusar krishn varn evan gharelu thi. dusri or shani grah ki mangal ki rashi men sthiti ke karan jatak ka uske prati akarshan nahin raha. dusri patni mangal evan shukra ke gun dharm ke anurup prapt hui.
shukra evan mangal ke prabhav ke karan vah sundar to thi lekin mangal ke karan usmen ahan bhav bhi vyapt tha. kundli men nimn shlok ke anusar dvivivah yog ka srijan bhi ho raha hai. karke pap sanyukte nichrashyanshke'pi va. papagrahen sandrishte vivahadvaymadishet.. sarvarthachintamni-adhyay-6/shlok-19 nimn yog ke anusar kundli men saptam bhav ka karak shukra surya ke sath sthit hone ke karan pap prabhav men hai evan pap grah rahu ki pancham drishti ke karan dvivivah yog ban raha hai. gyarhven bhav se bare bhai-bahnon ka vichar kiya jata hai.
jatak ki kundli men gyarhven bhav ke svami brihaspati ki pancham bhav men sthit hokar gyarhven bhav par drishti hone ke karan bari bahan ka usse ghanisht sanbandh bana raha hai tatha sath hi brihaspati ki purn drishti saptamesh mangal par hone se uski patni ke upar bhi prabhutva bana raha hai. kundli men sukh sthan par mangal evan shani ki purn drishti aur man karak chandra par rahu ki drishti hai. lagnesh, kutunbesh budh aur shukra ast avastha men hain.
lagnesh men pap grah vyayesh mangal hai tatha lagn par pap grah shani ki drishti hai. lagnesh shukra bhi pap prabhav men hai. in sabhi ashubh yogon ke karan jatak alp samay tak hi jivan ka sukh bhog saka.