hael hi men bi. si. si. ai ke naye adhyaksh ke rup men 41 varsh ke anurag thakur ko chun liya gaya aur apne derh dashak ke safar men anurag aj kriket ki duniya ke sabse takatavar namon men se ek ban gaye hain. bi. si. si. ai ke sabse yuva adhyaksh anurag ne apne kariyar ki shuruat rajniti se ki lekin kriket men unki dilachaspi bachapan se hi thi. himachal pradesh ke purva mukhyamantri prem kumar dhumal ke bete anurag thakur ka janm 24 aktubar 1974 ko hamirpur, himachal pradesh men hua tha. anurag ne bachapan se hi rajniti ko karib se dekha tha aise men unka safal rajneta banna tay tha. tin bar ye himachal ke hamirpur se sansad rahe hain lekin kriket ka shauk inhen bachapan se hi tha. karib 16 sal pahle anurag ne kriket prashasak ke taur par himachal pradesh kriket esosiyeshan ke adhyaksh pad se shuruat ki thi to kisi ko ye andaja nahin tha ki ek din ye pure vishva ke sabse takatavar kriket bord ke mukhiya ki sit sanbhalenge.
lekin anurag thakur n sirf apne siyasi safar men chalangen lagate gaye balki kriket ki pechidgi bhari siyasat men bhi jam kar chaike chakke lagate hue nabad bane hue hain. anurag thakur apne tej tarrar svabhav ke karan yuvaon ke bich lokapriya hain. apne isi svabhav ke karan ye bhajpa ke kendriya netritva ke kafi karib a gaye. anurag soshal midiya par kafi ektiv rahte hain. tvitar par inke 4.94 lakh faeloars hain. sansad ho ya parti miting anurag apni bat bebaki se rakhte hain. anurag ka khelon ke prati hamesha se jhukav raha hai. kriket ke alava ye haeki, raifal men bhi ruchi rakhte hain. anurag apni kaelej tim ke star kriketar rah chuke hain. kriket premi anurag himachal pradesh kriket esosieshan ke sabse kam umra ke adhyaksh bane hain. mahaj 25 sal ki umra men himachal kriket esosieshan ke adhyaksh pad ko sanbhala tha aur is dauran inhonne sirf ek fasrt klas maich bhi khela. inhonne is maich ki khud hi kaptani bhi ki thi.
is maich men inhonne jammu-kashmir ke khilaf 7 gendane ka samna kiya lekin ran nahin bana pae halanki inhonne do viket jarur liye. anurag ne 27 navanbar 2002 ko himachal pradesh ke purva pi. dablu. dimantri gulab sinh thakur ki beti sefali se shadi ki. anurag ke do bete hain. anurag apni man ko bahut mante hain aur unhin ke kahne par ye apni ungliyon men alg-alag ratnon ki anguthiyan bhi pahnte hain. anurag ka nam kai bar vivadon se jura hai. bi. si. si. ai ke purva adhyaksh shrinivasan ke sath inka matbhed kafi charcha men raha tha. vahin bukij vivad men nam ane se inki khub kirkiri hui thi aur buki karan gilhotra se mulakat ke mamle men ai. si. si. ai. ne inse puchtach ki thi lekin anurag par kuch sabit nahin ho saka.
anurag ke aur kriket ki duniya men inke karishmai safar par ek sarsri najar dalen to janenge ki inke karyakal men himachal ke dharmashala men 4780 fit ki unchai par bana stediyam apne apmen injiniyaring ka bemisal namuna to hai hi, himmat aur junun ka bhi nayab misal hai. anurag ke anusar ech. pisi. e. ke pas mahaj 50 lakh ki jamapunji thi aur pahar kat kar maidan banane ke kathin kam ko pura karne v stediyam banane men 60 karor rupye lage lekin kahte hain ki dhun pakki ho to pahar bhi har man lete hain. natijan pura stediyam n sirf vakt par banakar taiyar hua balki aj duniya ke sabse behtrin suvidhayukt aur khubsurat stediyamon men shumar kiya jata hai. yah manne men hamen koi hichak nahin honi chahie ki jis kriket bord ke shirsh pad ke lie sharad pavar, jagmohan dalmiya, shrinivasan jaise dhurandhron ne apna jivan lagaya us par anurag thakur ke itni asani se kabij ho gaye.
aisa hone se kaiyon ko ishrya bhi ho rahi hogi. par yahi to kismat hai aur apni kismat aur mehanat ke bal par anurag thakur duniya ke sabse takatavar aur amir kriket bord ke naye adhyaksh hain. bi. si. ai ke speshal janaral miting dvara chune gaye adhyaksh anurag thakur varsh 2017 tak bi. si. si. ai ke adhyaksh rahenge to unka kamkaj aur sakshamata yah bhi sabit karegi ki age unki dhamak kis tarah rahegi. halanki nae adhyaksh mahoday ne kriket ke prachar-prasar ke lie soshal netavarking sait ka rasta apnaya hai. to iske lie unhonne rajya sanghon ko soshal sait par apna akaunt banane ka adesh bhi diya hai. paradarshita ki rah men anurag thakur ki gaidens men tim indiya ke nae koch ke lie eplikeshan bhi aenlain hi bhara gaya hai. iske sath anurag thakur apni yojna ke bare men kahte hain ki maich ke lie stediyam ka kam se kam 10 pratishat chatron, larkiyon aur divyango ke lie arakshit hoga, jahir hai aise kai karya hain jin par dhyan dene ki avashyakta hai.
desh ke kai aise maidan hanai jahan unke sit ka ankan nahin hua hai jo stediyam ke andar ki sabse bari pareshani batai jati hai. is pareshani ko suljhane ke lie sit ke nanbring ki bat bhi kahi ja rahi hai to paryavaran aur urja ke sanrakshan ka dhyan rakhte hue maidanon men solar painal, ren vatar, hararvesting aur trited sivej vaetar ka istemal kiya jaega par yah sab kaise hoga aur iske lie kya-kya karna parega is par abhi manthan chalega aur uske bad kahin kriyanvayan sanbhav hoga. jyotishiya vishleshan jin paristhitiyon men anurag thakur itne prabhavshali pad par asani se kabij ho sake vah koi chamatkar se kam nahin islie har kisi ki yah jigyasa hai ki unke janm din par grahon ki aisi kya sthiti thi ki itni choti ayu men anurag itni bulandiyon par pahunch sake. anurag ki chandra kundli bahut hi balvan hai. chandrama se dasham sthan bahut shaktishali hai aur bahut sundar v prabhavshali rajyog bana raha hai.
kendra v trikon ke svami shukra yogkarak grah hokar dasham sthan kendra men apni rashi men trikon (bhagya bhav) ke svami budh ke sath yuti hone se ek prabhavshali rajyog ban raha hai jiske falasvarup inko jivan men choti umra se hi pad-pratishtha, dhan v yash ki prapti hui. nich bhang raj yog: surya dasham bhav men nich rashi par hai parantu jis rashi men surya nich ke ho rahe hain us rashi ka svami shukra chandrama se kendra men hai tatha jis rashi men surya uchch ke hote hain us rashi ka adhipti mangal bhi chandrama se kendra men hi hai. yah ek purn shaktishali prabal nich bhang raj yog ban raha hai. iske prabhav se anurag apne jivan men choti umra men hi anek upalabdhiyan hasil karne men kamyab rahe aur shighratishighra uchchasth shikhar par bhi pahunch gaye. malavya yog: shukra ke kendra men apni mul trikon rashi men hone se yah yog ban raha hai. is yog ke prabhav se inhen manmohak, akarshak, prabhavshali vyaktitva v uchch sukh suvidhaon ki prapti ho rahi hai.
char rashi ka chandrama hone se anurag tej tarrar prakriti ke hain tatha inmen shighra nirnay lene ki kshamata bhi vidyaman hai. pitri sthan (dasham bhav) shubh hone se inhen apne pita ke dvara bhi samy-samay par vishesh sahyog v labh prapt hua. ekadash bhav men rahu hone se inki rajniti men ruchi barhi tatha inhen apne rajnitik jivan men achchi saflta bhi mil rahi hai. chathe bhav men shani grah ke prabhav se anurag ke virodhi inka samna karne men asafal rahte hain aur isi karan bi. si. si. ai men bare-bare dhurandhron ke hote anurag ka adhyaksh pad par nirvivad chunav ho gaya. dvitiya sthan par baithe brihaspati ke karan anurag apni vani tatha vakpatuta se soshal midiya mane bhi chaye rahte hain aur dasham sthan men baithe mangal kuldipak yog bhi bana rahe hain. niahsandeh anurag ne apne kul ki kirti ko bhi age barhaya hai. chaturgrahi yog: chandrama se kendra men char grahon ki yuti rahi ho to jatak gyan aur dhan se sanpann sarvagun sanpann raja hota hai.
raj yog: dasham bhav men surya, budh v chathe bhav men pap grah hon to jatak avashya hi raja hota hai. 2 navanbar 2014 se janmasth rahu ke upar shani ka gochar hone se rajniti men inki khyati shighrata se barhi tatha chandrama se ashtam bhav par guru, rahu v shani ke sanyukt gochriya prabhav se inhen bi. si. siai ka adhyaksh pad achanak se mil gaya kyonki ashtam bhav ka sakriya hona achanak labh karvane ke lie jana jata hai. age bhavishya men inki sarhesati aranbh hone vali hai jismen inhen aur bare jimmedari bhare v shaktishali pad prapt hone ki puri sanbhavnaen bani hui hain. rajniti ke kshetra men is yuva neta ka bhavishya ujjval hai aur ye rashtra ke prati samarpit chavi vale neta ke rup men ubhar kar nirantar apna yogdan karte rahenge.