basant panchmi evan man sarasvati ki katha ke. ke. nigam man bhavan basant ritu ka agaman shit ritu ki samapti par hota hai. vaidik kalon se is umang, ullas aur utsah se bhare basant panchmi parva ko manane ka prachalan hai. magh shukla panchmi ko manaya jane vala parva basant panchmi man sarasvati ka janm din bhi hai.
basant panchmi ke din prakriti ki ramniyata tatha adbhut saundarya ko dekhakar sabhi praniyon ke hriday men umangon ka sanchar hone lagta hai, is basant ritu ko kam anuragi bhi kaha jata hai. sukhi dampatya jivan ke lie basant panchmi ke din chaval se striyan ashtadal kamal banakar us jal se paripurn kalash rakhti hain aur pujan karti hain ya isi prakar ke mali dvara diye ‘basant garhva’ ka pujan kar kamna karti hain ki unka suhag akshunn evan dampatya jivan sukhamay rahe. is din hare, pile vastron ko dharan karne ka rivaj hai. vastutah pila rang shubhta aur gyan ka pratik hota hai.
magh shukla panchmi ko man, buddhi, gyan, sangit v lalit kalaon ki adhishthatri devi sarasvati ka janm divas bhi hai. unko prasann karne evan unka ashirvad prapt karne ke lie aisa kiya jata hai. is din vishnu, surya, shiv aur parvati ki bhi puja karne ka vidhan hai. basant panchmi ke din se hi holi ki lakriyan chairahe par ikatthi kiye jane ka prachalan hai. basant panchmi hamare jivan men anand, ullas, umang ka sarvoÿam parva hai. brahma ji ne srishti ki rachna ki to yah srishti muk thi. yah dekhakar brahma ji ne apne kamandal se jal chirka, jisse per-paudhe ful khil uthe tatha unse ek shakti utpann hui. us devi ne vina vadan praranbh kiya to sari srishti, per paudhe, jhumne lage aur isse madhur vani niklne lagi, sabhi pashu-pakshi kalarav karne lage.
prakriti mohak, vani yukt sangit se otaprot tatha suhavni ho gai. inhin devi ko man sarasvati kaha gaya. usi din se basant panchmi parva manane ki paripati chal pari. ek anyaktha ke anusar adyashakti ne apne ko panch bhagon men bant liya. ye panch bhag kramshah durga, sarasvati, padma, savitri, radha kahlain. shrimad devi bhagavat aur durga saptashati men kuch isi prakar ka varnan hai.
man sarasvati ka pujan karne hetu basant panchmi ke din pratahkal uthakar dainik kriyaon se nivriÿa hokar pile vastra dharan kar puja sthal par parivar ke sath safed ya pile asan par baithen. samne man sarasvati ji ki murti ya chitra lagaen. uske samne basant garva rakhen. fir shodshopchar puja archanakar sarasvati ka mantra ‘‘un ain sarasvatyai ain namah’’ ka 108 bar jap karen. fir apne bachchon ko tilak kar pile pushpon ki mala pahnakar unki jibh par kesar se chandi ki salai dvara ‘ain’ bij mantra likhen. is kriya ko karne se bachchon ki vani men mithas, buddhi men barhoÿari, parhai men man lagne lagega.
basant panchmi ke shubh muhurt ke bare men manyata hai ki karyon ko karne men jab man men utsah ho to vah karya siddh hota hai aur basant panchmi ke din manushya hi kya, sari prakriti men ullas, umang aur anand vyapt hota hai aur gyan vani ki devi sarasvati ka janm din bhi usi din hone ke karan is sthiti se adhik shubh muhurt aur kya ho sakta hai? ise sarvamanya shubh faldayi muhurt ghoshit karte hue kaha gaya ki is din koi bhi manglik karya bina panchang evan jyotishiya paramarsh ke sampann kiya ja sakta hai. is tarah basant panchmi anpucha muhurt ke antargat ata hai.