shri baglamukhi mahima raj shivam ma ta shri baglamukhi ka ek prasiddh nam shri pitambara bhi hai. yah tripur sundri shakti shri vishnu ki aradhna se hi mata bagla ke rup men prakat huin. yah vaishnavi shakti hain. yah shiv mrityunjay ki shakti kahlati hain. yah siddh vidya shrikul ki brahm vidya hain. dash mahavidya men adya mahakali hi pratham upasya hain. inki kripa ho to sadhna men shighra labh prapt hota hai. inki sadhna vam ya dakshin marg se kiya jata hai, parantu bagla shakti visheshakar dakshin marg se hi upasya hain. shri bagla parashakti ki sadhna ati gopniyata ke sath ki jati hai. inki upasna rishi-muni ke atirikt devta bhi karte hain. janmanas ke hetu inki sadhna sulabh banane ke lie sakshat shiv ko 'shri svami' ke rup men manav sharir dharan kar datiya, madhya pradesh men shri pitambara pith ki sthapna karni pari. shri svami dvara likhit pustak 'shri baglamukhi rahasya' ati sundar aur sadhkon ke lie kripa svarup hai. shri baglamukhi ke sadhak ko ganbhir evan nidar hone ke sath-sath shuddh evan saral chitt ka hona chahie. shri bagla stanbhan ki devi bhi hai trishakti rup ke karan stanbhan ke sath-sath bhog evan mokshadayini bhi hain. baglamukhi ki sadhna bina guru ke bhul kar bhi nahin karni chahie, anyatha thori si bhi chuk se sadhak ke samaksh ganbhir sankat upasthit ho jata hai. manidvip vasini kali bhuvneshvari mata hi baglamukhi hain. inki ang puja men shiv, mrityunjay, shri ganesh, batuk bhairav aur vidalika yakshini ka pujan kiya jata hai. kai janmon ke punya pratap se hi inki upasna siddh hoti hai. vidvanon ka mat hai ki vishva ki anya sari shaktiyan sanyukt hokar bhi mata bagla ki barabri nahin kar sakti hain. inke mantra ka jap siddh guru ke margadarshan men hi karna chahie. inke mantra ke jap se anek prakar ki chamatkarik anubhutiyan hone lagti hain. alg-alag kamnaon ki siddhi hetu jap ke lie haridra, pile hakik ya kamalagatte ki mala ka prayog karna chahie. devi ko chanpa, gulab, kanel aur kamal ke ful vishesh priya hain. inki sadhna kisi shiv mandir ya mata mandir men athva kisi parvat par ya pavitra jalashay ke pas guru ke sannidhya men vishesh siddhiprad hota hai. vaise ghar men bhi kisi ekant sthan par dainik upasna ki ja sakti hai. shri bagla ke ekakshari, trayakshari, chaturakshari, panchakshari, ashtakshari, navakshari, ekadshakshari aur shattrinshdakshari mantra vishesh siddhidayak hain. sabhi mantron ka viniyog, nyas aur dhyan alg-alag hain. inke atirikt 80, 100, 126 aksharon mantron ke satha 514 aksharon ke bagla mala mantra ki bhi vishesh mahima hai. 666 akshar ka brahmastra mala mantra bhi hai. iske alava aur bhi anekanek mantra hain, jinka ullekh sankhyayan tantra men milta hai. manokamna ki siddhi ke lie bagla stotra, kavach aur baglastra ka gopniya path bhi kiya jata hai. sath hi bagla gayatri aur kilak bhi hai. ghrit, shakkar, madhu aur namak se havan karne par akarshan hota hai. shahad, shakkar mishrit durva, guruch aur dhan ke lava se havan karne par rogon se mukti milti hai. karya vishesh ke lie vishesh mala, vishesh mantra aur vishesh havan ka vishesh prayog hota hai.
Kya aapko lekh pasand aaya?
Subscribe