vivah v dampatya jivan ka akalan janmakundli ke saptam bhav se kiya jata hai. purush ki kundli men shukra grah patni v vivah (kalatra) karak hota hai tatha stri ki kundli men brihaspati pati tatha dampatya sukh ka karak hota hai. ‘‘jyotish navnitam’’ granth ke anusarah guruna sahite drishte darnathe balanvite. karke va tatha pativratprayna.. arthat jab saptamesh v karak (shukra) balvan hokar guru se yukt athva drisht hon to jivan sathi nishthavan hota hai. parantu sabhi jatak aise bhagyashali nahin hote. saptam bhav, bhavesh v shukra par mangal aur shani ka prabhav mukhya rup se dampatya jivan men vighnakarak mana jata hai, parantu chaya grah (rahu/ketu) bhi is kshetra men kam dushprabhavi nahin hote. chaya grahon men rahu ihlok tatha sansarik kshetra men, aur ketu parlok tatha dharmik kshetra men vishesh prabhavi hote hain. maharshi parashar ke anusar rahu vrish rashi men uchch ka hota hai, mithun uski mul trikon rashi hai, tatha vrishchik men vah nich ka hota hai.
jab rahu balvan ho aur shubh grahon s yukt ya drisht ho to jatak ke lie shubh faldayak hota hai. parantu ashubh prabhav ya ashtam athva dvadash bhav men hone par rahu jatak ka jivan kashtamay bana deta hai. ashubh rahu ka saptam bhav v bhavesh se sanbandh hone par dampatya jivan dukhi hota hai. sabhi granth rahu ke saptam bhav v bhavesh se sanbandh ko dampatya jivan ke lie ashubh mante hain. jatak charitrahin hota hai (sarahuketau yadi darnathe papekshite va vyabhichar yogah. ‘‘sarvarthachintamni’’) pahli patni ka dehant ho jata hai. dusri patni bhi bimar rahti hai, ya pati ke viruddh acharan karne vali hoti hai. jatak nich striyon par dhan nasht karta hai aur use santan prapti men badha ati hai ya santan se kasht hota hai. ashtam (mangalya) bhav ka rahu rogdayak hota hai aur dampatya jivan ko dukhi banata hai. shashth bhav men mangal, saptam bhav men rahu aur ashtam bhav men shani jivnsathi ka nash karte hain. mansagri granth ke anusar: shashthe ch bhavne bhaubhah saptame rahu sambhavah. ashtame ch yada sau ristasya bharya n jivti.. rahu ka lagn par prabhav jatak ka kapti, vyagra, tatha nirankush banata hai.
saptam bhav sthit chandrama par rahu ki yuti ya drishti jatak ko vyakul v dussahsi banati hai. rahu tatha mangal ka apsi sanbandh jatak ko jiddi v laraku banata hai aur inka saptam bhav par prabhav vivah vichched karata hai. rahu ka shukra par prabhav jatak ko kamuk banata hai. rahu ka surya se sanbandh hone par jivan sathi nimn star ka tatha ahankari hota hai. ye vrittiyan dampatya jivan men bikhrav lati hain. rahu ka chandrama v shukra donon par dushprabhav hone se jatak aprakritik yaun bhav se grast hota hai. mangal v shukra par rahu ka prabhav hone se jatak parivar, jati v samaj ki parvah n kar yaun sanbandh sthapit karta hai. rahu ka shani par prabhav hone se dirghakalin rog dampatya jivan ko dukhamay bana dete hain. rahu ka dampatya jivan par dushprabhav nimn kundliyon men pratyaksh rup se drishtigochar hota hai.
kundli san. 1 men rahu saptam bhav men nich ka hai. uski ekadash bhav sthit saptamesh mangal aur svakshetri brihaspati par drishti hai. durishit mangal ki shukra, shani aur chandrama par drishti hai. jatak ne march 2002 men prem vivah kiya, parantu dusri striyon ke chakkar men rahta hai, jisse uska dampatya jivan tutne ki sthiti men pahunch gaya hai.
kundli san. 2 men rahu saptamesh mangal ke sath lagn men sthit hai. kalatrakarak shukra ast hai tatha papakatrtari yog men hai. saptam bhav par kisi shubh grah ki drishti nahin hai. jatak abhi tak avivahit hai.
kundli san. 3 men saptamesh shani lagn men pratikul rashi men hai aur us par koi shubh drishti nahin hai. mangal aur shukra ki yuti rahu dvara grast hai. mangal ki saptam bhav v brihaspati par drishti hai. dilli se bahar profeshanal kors karte hue jatka ka ek anya jati ke sahpathi se pranay sanbandh hua, vah uske sath bina vivah ke rahne lagi aur pariksha men fel ho gai. iska pata chalne par uske mata-pita ne uska kisi prakar vivah karaya kintu uska vaivahik jivan sukhi nahin hai.
kundli san. 4 men lagn v rashi kanya hai. saptamesh brihaspati dvadash bhav men hai. dvadshesh surya, ashtamesh mangal aur shashthesh shani saptam bhav men rahu s grast hain. chandrama ketu se grast hai tatha us par saptam bhav sthit grahon ki ashubh drishti hai. saptam bhav v saptamesh ke grast hone ke karan jatka ke vivah se 11ven mas men uske pati ka svargavas ho gaya.