jyotish, hast rekha v kainsar bharti anand sukhad, sundar aur svasth sharir ki kamna pratyek vyakti karta hai. parantu apne purva janmon ke karmon, apni janmapatri aur hast rekhaon men likhe rogon, dukhon aur kashton ko bhogna hi parta hai. yadi ham hast rekhaon aur jyotish ke dvara inka purvanuman laga len to sanbhavit rogon se bachav ke upay kar sakte hain. fir chahe vah kainsar jaisa bhayanak rog hi kyon n ho. kya hai kainsr? sharir vigyan ke anusar manav sharir ke angon ki rachna koshikaon se hoti hai. sharir men in koshikaon ka tutna v banna ek prakritik prakriya hai. in koshikaon ko banane men pani aur khun ka yogdan hota hai. ek achche svasthya vale jatak ke sharir men 70 se 75 pratishat jal rahta hai. kisi karan se yadi pani aur khun ke pravah men rukavat a jati hai to iska prabhav koshikaon par parta hai.
jis matra men koshikaen banti hain utni matra men vah nasht nahin hoti jiski vajah se koshikayen asamanya v aniyantrit gati se vibhajit hone lagti hain sath hi koshikayen rakt pravah aur lasika tantra ke jariye sharir ke kai bhagon men jakar ek sthan par koshikaon ka nirman apne dhang se karti hai. koshikaon ke barhne ki gati gunatmak hone par kam samay men kai guna barh jati hai. jiske karan us sthan par koshikaon ka ghanatva barh jata hai tatha sharir men ech. bi. ka star kam hone lagta hai aur jatak ki rog pratirodhak kshamata kam ho jati hai. is prakar sharir is bimari ki giraft men a jata hai aur jatak ko mrityu ke kagar tak le jata hai. aiye ham iska jyotishiya drishtikon se sankshipt vishleshan karte hain aur janne ki koshish karte hain ki akhir kin-kin grahon ki yuti, v kis prakar se grahon ki sthiti hone par jatak ko yah bhayanak rog jakar leta hai. lagn ka svami chate ghar men ho, chandra aur shani yadi lagn men ho evan marak rashi ki mahadsha ya pratyantar dasha ho to us vakt jatak ki is rog se mrityu bhi ho sakti hai.
lagn par pap grahon ki kharab drishti ka hona v lagnesh chate, athven v barhven ghar men a jaye ya iske bilkul viprit barhven, athven v chate ghar ke svami ka lagn men sthit hona. mukhytah yah rog chandra v mangal ke kamjor hone se bhi hota hai islie yadi chandra aur mangal ko pap grah gher len jaise chandra+rahu, mangl+shukra ya shukra+chandra aur yah grah athven ya chate ghar men baithe hon to is prakar ka bhayavah rog hota hai. pap grahon ki drishti jis ghar par ho us ghar se sanbandhit ango par kainsar ka prabhav banta hai. guru ka kisi bhi sthan par pap grahon se yukt hona bhi livar kainsar ki sanbhavna banata hai. chate ghar ka svami pap graho ke sath baithakar jis ghar men baithta hai us ghar ke ang par kainsar ho sakta hai. yadi ap ki rashi ka nakshatra svami bhi yadi chate athve ya barhven ghar men baitha ho to bhi is rog ki sanbhavna ban jati hai. lagn yadi svagrahi n hokar purn ast ho jaye aur vah pap grahon ke sath baitha ho to bhi is bhayanak rog ke kitanu jatak ko daste hain. pap grahon ki mahadsha, antardasha v pratyantardasha men bhi is rog ka agaman ho sakta hai. mangal, ketu, shani ke marak, chate ya barhven ghar men hone se bhi kainsar hota hai. is prakar se hajaron aise lakshan hain jisse iske hone ki sanbhavna ya is kainsar rog ke bare men pata lagta hai. to aie ab ham hastarekhaon ke milan dvara bhi is rog ke bare men charcha karen.
yadi ham hastarekhaon evan jyotish dvara kisi vyakti vishesh ka avlokan karte hain to iska parinam hamen bahut achcha milta hai.
1. yadi vyakti ka hath din pratidin patla ho raha hai aur hath ki sari rekhaen ubhar kar mote rup se najar a rahi hon to, hamen fauran savdhan ho jana chahie aur samajh jana chahie ki bhayanak rog hamen gher raha hai aur samay rahte hi sari 'medikl' janch fatafat kara leni chahie.
2. yadi bhagya rekha jivan rekha ke pas ho aur vah moti ho rahi ho, bhagya rekha ko rahu rekhaen gher rahi hon, hriday rekha shani ke niche se tut rahi ho to yah kainsar rog ka lakshan bhi mana jata hai.
3. bhagya rekha miti hui si ho, jivan rekha janjirakar ho v jivan rekha tuti hui ho, mastishk rekha ke upar yav bante hon, hath sakhat v pila ho to yah kainsar ke rog ko darshata hai.
4. shani parvat par rekha chinn bhinn ho aur hriday rekha ya to moti ho ya tuti ho v anguliyan tirchi hone par bhi is rog ki sanbhavna hoti hai.
5. anguliyan bahut adhik lanbi v patli hon, hath bilkul mansal n ho, hath men bahut hi kam rekhaen ho to yah bhi is rog ka bhavishya tay karta hai.
6. bhagya rekha, jivan rekha dono hi tut-tut kar chalti hon, bhagya rekha ko moti-moti rekhaen kat rahi hon to yah lakshan bhi is rog ki taraf ishara karte hain.
7. yadi chandra kshetra par til ho aur vahan par rekhaon ka jal ban raha ho- yah kshetra halka dabane par agar bahut jyada dab jata ho v chandra kshetra jyada ubhar lie hue yadi n ho to yah bhi kainsar ko ingit karta hai.
8. mangal kshetra par yadi bahut adhik rekhaen ho v mangal par tare ka chihn, til, v vahan se jivan rekha ka tuta hona bhi is rog ki sanbhavna ki or ishara karta hai.
9. yadi mangal kshetra par mangal rekha tut-tut kar chalti ho, vahan par matsya ka chihn evan mastishk rekha ko mangal kshetra se akar rekhaen katti hon aur hath ka rang pila ho, nakhunon men safedi ho to bhi yah is rog ki sanbhavna darshata hai.
10. yadi hath men sabhi grah dab rahe hon hath lakri sa sakhat, angutha kam khulta ho, mangal rekha, jivan rekha tuti-futi ho to bhi kainsar ho sakta hai. yadi is prakar ke lakshan kisi ke bhi hath men hon to fauran der n karen medikal help ke sath-sath kuch jyotishiya upay bhi kar len.