jyotish shastra bahut hi prachin hai. hamare manishi, vidvanon ne apne divya chakshu dvara desh evan kal tatha uske sukshm gati ka adhyayan karke kuch siddhanton ko pratipadit kiya hai. jinhen sutrabaddh karke prastut kiya hai. samaj men rahakar ham sabhi samaj ki manyataon ke anukul acharan karte hain. manyataen vibhinn hote hue bhi unki parinti lagabhag ek jaisi hai. jiske lie pratyek prani sangharsh karta hai. parivar ki maryadaon se bandhnyukt manushya samaj dvara nirdharit achrnon ka palan karne ko badhya hai tatha vibhinn sanskaron par acharan karta hai. janm se mrityu paryant manushya sanskaron se bandha kartavyarat rahta hai.
jivan ke pratyek sanskar ka ek dharmik mulya hai. sanskriti bhi hamare karm tatha kiye hue karm par adharit hai. kyonki pratyek manushya karm se bandha hai, jiske anusar janm janmantar se bhogman bhogta hai, islie shastron men satkarm karne par jor diya jata hai. is vidha men karmanusar janm samay men kshitij men tadnukul grah nakshatradi bhi upasthit rahte hain, jo ki janm kundli ke rup men milte hain. janmakundli vastav men jatak ke purva janm ka vah lekha jokha hai, jo is janm men use bhogna parta hai. kundli dekhakar yah bataya ja sakta hai
ki amuk balak ka janm kin paristhitiyon men hua. hindu dharm ka puratatva nam hi varnashram dharm hai. jisse hamare vibhinn sanskar bandhe hain, aur acharan ki vidhaen. inhin sanskaron men ek mahatvapurn sanskar hai, vaivahik sanskar. jis par do aprichiton ka milan, donon ka bhavishya tatha milan ke parinti ka vrittifal ichchit santan hona bhi nirbhar hai. yahi karan hai ki samaj ke log vivah ke purva larke tatha larkiyon ke parivar ke bare men janne samjhne ke bad hi nirnay lete hain tatha ganmanya jyotishiyon se kundli dikhate hain tabhi antim nirnay lene ki paranpra hai.
jyotish shastra se kundli milane ki vidha janm kal ke nakshatradi se hai. iska vargikaran 36 gun kiye hain jinke adhar par milan avashyak hai. yadi var kanya ke 20 gun milte hain, to ise madhyam mana jata hai. yadi 20 gun se adhik milte hain, to ati shubh tatha 20 gun se kam milne par ashubh mana gaya hai. atah 20 gun se jitna adhik mile uttarottar utna hi shubh manne ka nirdesh shastron men hai. adhik gunon ke mel par adhik jor dena chahie. var kanya ke nakshatradi ke adhar par gunon ka milan kiya jata hai. janmakal men kundli banane men nakshatron ka pramukh mahatva hai. pucha bhi jata hai ki kaun nakshatra men janma hai bachcha? kaisa niklega ityadi. yah sunishchit evan pramanit hai ki vishesh nakshatra men janm liya vyakti kuch n kuch nakshatrik visheshta lie paida hota hai, jo sarvavidit hai.
atah nakshatron ki sthiti ke pashchat manushya ek vishesh varn, vashya, gan, nari adi ko lekar janm leta hai tatha un gun doshon se paripurn jivan vyatit karta hai. udahrnarth yadi purva falguni men koi janm leta hai to vah balak nimn gun dharm ko lekar janm leta hai. 1. varna-kshatriya 2 vashya-vanachar 3. yoni-mushak 4. gan-manushya 5. nari-madhya ityadi. ye sabhi visheshtaen manushya apne purva janm ke karm se pata hai tatha vaisi hi naisargik visheshta lekar janm leta hai. vastav men yah ishvariya vidha hai tatha samajik evan sansarik vyavastha se kahin pare aur sunishchit hai. is prakar brahman kul men janmen manushya ka janm nakshatra- purva falguni hai to nakshatra vashat vah kshatriya varn ka hua. ank nirnay lena hai
ki us manushya ki bhautik sthiti ko dhyan men rakhakar hamen visheshtya nari par kundli milate samay dhyan rakhna chahie ya nakshatra vashat kshatriya varn hone, kshatriya varn par dhyan dena chahie, jo vastav men ishvariya hai, tatha bhautikta se pare hai. astu yahan yah tarkasangat hoga ki nakshatradi ke vipak se jo kuch hai vahi sunashchit aur atal hai. purva ullikhit udaharan men nari par vishesh jor n dekar kshatriya varn ki vyavastha hi grahan karne yogya hai.
nakshatra vashat brahman kul men janm lene par bhi jatak kshatriya gunon ko apne men sanjoye rahega. acharan bhi bahut kuch usse milta julta hoga. nakshatron ke adhar par 36 gun hote hain. yadi 36 gun mil gaye to vah milan atyant shreshth mana jayega. lekin aisa kam hota hai. is prakar yah sunishchit hai ki kam gun milne par kuch n kuch kami to rahegi hi. yah kami kisi bhi kshetra men ho sakti hai. jaise yadi bhagyadi thik raha to kanya ka bahulya ho gaya santti ke kshetra men ityadi. yahi nahin vanshanugat rogadi bhi var kanya ke sahvas ke falasvarup milta hai, vah bhi to melapak ke kam adhik gunon ke milne ka pratifal hai. aksar dekha jata hai ki yajman log bhi keval grah maitri santan dhan ko milane par jor dete hain aise men shastra aur vidvan ko dosh dena vyarth hai. sukh evan duahkh ye donon ek dusre ke purak hain. ek ke bina dusre ka koi astitva nahin hai. yah to manushya ka gun hai ki yadi aj vah sukh bhog raha hai
to usi ko kal dukh bhi bhogna par sakta hai. isi prakar is sansar chakra ko sanchalit karne men nar evan nari ek hi rath ke do pahiye hote hain. yah sansar bina donon ke yog se chal hi nahin sakta. donon pahiye yadi ek dusre ke samarthak v purak n hon arthat uchit tal mel n ho to jivnyapan sukhi nahin ho sakta. hamara jyotish shastra bahut hi prachin hai. hamare manishi, vidvanon ne apne divya chakshu dvara desh evan kal tatha uske sukshm gati ka adhyayan karke kuch siddhanton ko pratipadit kiya hai. jinhen sutrabaddh karke prastut kiya hai. ab samay a gaya hai ki is vishay ko naye sire se vaigyanikta ke adhar par vivechna ki jaye tatha vartaman kal, sthiti ke sandarbh men usko prastut kiya jaye taki surya siddhant v drishya ganit ka antar dekhen.
yadi is prakar ke samyantar ko adhar banayen to ghatiyon ka antar parte-parte ansh rashi tak pahunch jayega. aj samay a gaya hai ki is par naye sire se vichar karke prachin paddhati par bani sarni ko hatakar navinatam sarni ko prastut kiya jaye. apne ko samyanukul rhalne ke lie naya rup dena hoga. jabki pashchatya desh hamare hi siddhanton ko apnakar antriksh yug men pravesh kar chuke hain to hamari karya kshamata par prashn chinh kyon. ukt ke atirikt isi prakar vartaman samay ke pashchatya samaj men vivah vishayak nirnay ke lie rakt grup tatha anuvanshiki pratha prachlit hai. is vishay men hamare manishiyon ne hajaron varshon purva kundli melapak ki vyavastha kar di thi. jo gaurav ki bat hai.
parantu durbhagya yah hai ki hamari paddhati par astha kam ho rahi hai. pashchatya pranali par shraddha barh rahi hai. stri evan purush men 23, 23 joron ke kromosom hote hain. milan ke uprant 23 ke hi joron men kromosom pratifal ke rup men santti ko milta hai jo pushtaini visheshtaen mata evan pita donon ko apne men sanjoye rakhta hai. pratifal men santti ko dosh-gun roganu bhi milte hain. udahrn: kalpana karen ki kisi var evan kanya ko nari dosh hai aur mana ki donon ki nari antya hai, to antya nari vashyat donon men kaf ki pravritti hui. ab jo santan paida hogi use anupat se adhik tinon gunon men yani kaf, pitt evan vat men kaf prakriti virasat men mili. jis prakar rakt ke tin grup huye vaise hi adi madhya evan antya nariyan bhi hai. jis prakar antya nari men kaf prakriti ke kromosom hai, vaise hi kram se madhya evan adi men vat evan pitt ke kromosom milte hain.
janmakundli ek aisa khaka hai, jisse n keval sva ke bhut, bhavishya ya vartaman ka lekha jokha prastut kiya ja sakta hai, balki jatak ki kundli dvara sare parivar ki jankari bhi ho sakti hai, in 12 rashiyon tatha 9 grahon ke dvara anginat bhavishyavaniyan tatha jankariyan pai ja sakti hai. hamare shastron men rashiyon dvara kal purush ke angon ka vibhajan kiya gaya hai. yahi nahin kisi ki bhi kundli dekhakar jatak ke stri tatha stri ke pita, mata v bhai, matul ityadi ka bhi pata lag sakta hai. vaise jatak ke saptam bhav ko jatak ke patni ka lagn manakar usse chaturth se mata, dasham se jatak ke patni v pita ke bare men jan sakte hain. hamare jyotishi kundli dvara kis prakar kundli dekhakar tathya gyat karte hain unka adhyayan yahan prastut hai.
nimn kundliyon ka avlokan karen. adhyayan k aur kh donon hi uchch padadhikari evan karyarat hain. k ka nakshatra jyeshtha evan kh ka nakshatra hast hai. is prakar kundli melapak ke anusar keval 14 gun milte hain. shastrokt matanusar itne kam gunon ko nimn shreni men rakhte hain. varnashram ke pariprekshya men yadi vichar karen to ve kshatriya varg men ate hain. aisi sthiti men ‘nari doshastu vipranam’ ke anusar vichardhara ko dhyan rakhte hue hamen varn dosh par vishesh dhyan dena chahie. jahan tak varn ka sanbandh hai ‘ka’ ka varn brahman tatha nakshatra vashat ‘kha’ ka varn vaishya hai. chunki brahman ke vashya vaishya hai, islie gun melapak shubh hain.
lekin gun keval 14 hi milta hai. donon hi uchch shiksha sanpann hain tatha inki ek santan hai. ‘ka’ hridyrog se pirit hain, shalya chikitsa bhi ho chuki hai parantu ishvar ki kripa se sakushal hai. kundli ke avlokan se pata chalta hai ki jatak ko hriday rog hona chahie. chaturth bhav rahu se akrant hote hue bhi ketu evan mangal ke prabhav se grasit hai. chaturthesh pap grah ke sath baithakar tripad drishti se surya ke sath dekh raha hai. yahi karan hai jo jatak ko hriday rog se grasit hona chahie. jatak ko baipas sarjari hui hai iski pushti bhi ho jati hai.
is prakar sankshep men ham dekhte hain ki hamari jyotishiya paddhati purn hai aur ham purn rupen un vidhiyon par apni jankari ke lie ashrit rah sakte hain. bhagvan ved anadi hain, ishvar pradatt hain, aur gyan ke sagar hain. inhin ke netron ka nam jyotish shastra hain. jis prakar sharir men netra atyadhik upyogi hai thik usi prakar jyotish shastra mahatvapurn hai. hamare manishi jyotishi ekant men baithakar us virat purush ke ang pratyangon ke vishleshan karne men samarth the.
unki antarnihit shaktiyan sva se para aur para se apra men vichrti hui akhil brahmand ke rahasyon ke part ko kholne men samarth thi jo aj ke lie udaharan svarup hai. hamen us shastra ka manthan fir se karna hoga taki hamen apne purvajon ke vachnon ko tarkayukt vaigyanik rhang se samaj evan sansar ke samne rakhna hai taki logon men jyotish shastra men vishvas ki jagriti ho tatha agyanta v andhvishvas samapt ho sake.