fal aur ful to sabhi ke upyog men ate hi hain, par inki chal, tana, jar tak upyog men ate hain, jahan tak ki inko shraddhapurvak naman karne matra se jivan ki vibhinn kathinaiyan sugmta se dur ho jati hai, aur vidhi vidhan se puja karne par to manokamnaen bhi siddh ho jati hai fir kyon nahin ham inse apne apko jorte hain, kuch vrikshon se sabhi ke jivan ki ubhay pareshaniyan ka hal niche ullekhit karta hun, jisse pathkon ka jivan to sahaj hoga hi sath men unhen punya labh ki bhi prapti hogi. vriksh jivan ke har mor par manushya ka sath dete hain, par kya har manushya vrikshon ke bare men kisi bhi mor par sochta hai? vanaspati men prabhu ki kya lila samahit hen abhi tak samajh se pare hain, par hamare rishi muniyon ne inke kuch divya gunon ka anubhav kiya hai. in upayon men sadhak ki purn shraddha, bhakti aur vishvas ka hona param avashyak hai. yadi kanya ke vivah men vilanb ho raha ho ya uttam yogya var ki prapti nahin ho pa rahi ho aur jinki janm kundli men 1, 4, 7, 8, 12 bhav men mangal shani ya rahu sthit ho, unhen kanya ke dvara vishnu mandir men brihaspativar ke din anvle aur pipal vriksh ka ropar kar 21 din tak vriksh ke samip dipak prajjvalit karen to nishchit rup se suyogya var ki shighra prapti ke yog bante hain.
pati-patni men tanav ki param sima vivad se hoti hui talak tak pahunch jati hain. kai bare aisi sthiti men tantra shastra v jyotish men bhi karan pakar se bahar lagta hai, tanav ki sthiti sukh, shanti ko khatm kar talak tak ki sthiti nirmit ho jati hai. iske nivaran ke liye pati-patni ko sanyukt rup se shiv mandir men pipal aur baragad vriksh ka ropar somvar ke din karne par apsi matbhed samapt hokar apsi prem v samanjasya banta hai. vyapar men ho rahi lagatar hani ko dur karne, lakshmi devi v kuber dev ko prasann karne ke liye sitafal aur ashok ke vriksh ko shukravar ke din devi mandir men lagaven. nishchit rup se vyapar men nirantar vriddhi ke yog banenge. yadi kisi ghar men vyakti ko bhut-pret ka bhay ho ya parivar ke kisi vyakti ko pret badha ki pareshani ho to anisht prabhav ki samapti ke liye shiv mandir men somvar ke din katahal ka vriksh ropar kar tel ka dipak lagakar prarthana karen- ”ap divya shaktiyon ke sath meri tatha mere parivar ki raksha karen.“ katahal ki ek patti le jakar ghar ke mukhya dvar par laga den, tatha lagatar 21 din samyanusar vriksh ke samip tel ka dipak lagayen.
iske prabhav ke karan nishchit rup se pret badha tatha anishtakari prabhav samapt karne ka yah uttam upay hai. imli ke vriksh se to sabhi parichit hain hi ise tantra kriya men bhi log vishisht rup se prayukt karte hain, rin se mukti ke liye asadhya rog nivarnarth, niahsantan dampatti ko santan prapti ke liye tatha vishesh rup se vidyarthiyon ko shiksha men uchch saflta ki prapti ke liye kisi bhi shanivar ke din dopahar men shri ramchandra ji ke mandir men imli vriksh ka ropar karen v lagatar 11 shanivar tane men tel ka dipak lagaven, nishchit hi karya siddhi ke yog banenge. jinke ghar men pitri dosh ki sanbhavna ho tatha jinki janm kundli men pitri dosh ho to ekadshi ke din ghar ke mukhya dva ar ke samip tulsi vrikh ka ropar kar pratidin pujan v darshan matra se pitri dosh ke karan utpanan samasya dur ho jati hai.
priyajan ki atmashanti v sadgati prapti ke liye balak ki mrityu hone par udyan ya shri ganesh mandir men amrud (jamfl) aur imli vriksh ka ropar karen. yuva ki mrityu hone par, shmashan (muktidham) men nim aur bel vriksh ka ropar karen, yuvti ki mrityu hone par devi mandir men shukravar ke din pipal aur ashok vriksh ka ropar karen. vivahita stri ki mrityu hone par sitafal aur ashok vriksh ka ropar karen, vriksh ka ropar sutak avastha ki samapti ke uprant hi karen tatha sadaiv uska dhyan rakhen. uprokt upay se gaya shraddh ke barabar punya prapt hota hai. navagrah sanbandhi janm kundli men anisht dosh ko dur karne ke liye jyotish men kai upayon ka varnan hai parantu navagrah pira se bachne ke liye sabse uttam saral sugam vidhi sanbandhit grah ke vriksh ka ropar upyukt hai.
surya: jinki janm kundli men surya nich ka ya shatru grahi ho, jinhen hriday rog v netra sanbandhit samasya ho tatha ai. e. es. adhikari, nyayadhish v mantriyon ko uchch patishtha v samman ke liye safed ankre v bel vriksh ka ropar ravivar ke din vishnu mandir men karne se shighrata shighra labh prapt hota hai, sinh rashi ke jatak ko bhi yah upayen upyukt hain.
chandra: chandrama se jaliya padarth ka vichar kiya jata hai, jinki rashi kark h v janm kundli men chandra nich ka v shatru grahi ho unhen tatha aushdhiyon ke vikreta, sinchai vibhag, krishak, derifarm tatha mansik rup se pareshan vyakti ko palash v chandan vriksh ka ropar somvar ke din shiv mandir men karen.
mangl: mangal shakti ka pratik hai, yah ek agni tatva ka grah hai jin jatak ki janm kundli men mangal kark rashi gat 28 ansh ka hai, tatha jinki janm kundli manglik prabhav yukt ho unhen anisht prabhav shanti ke liye tatha sainik, pulis vibhag men karyarat mesh v vrishchik rashi vale jatak ko kher v anar ka ropar manglvar ke din hanuman ji ke mandir men karna labhaprad rahta hai.
budh: budh prithvi tatva ka grah hai, jinki janm kundli men budh shatru grahi v 15 ansh par min rashi men nich ka ho, unhen tatha ganitagya, lekhan karya karne vale, klark, ke liye darop (durva) v anvle vriksh ka ropar budhvar ke din shri ganesh mandir ya vidyalay men ropar karna chahie.
brihaspati (guru): varah mihir ne guru ko ‘gaur matra’ bataya hai, yah satoguni v akash tatva ka purush grah hai, jinki rashi dhanu v min ho, jinki janm kundli men guru astagat v panch ansh par makar rashi ka ho unhen tatha vedpathi yagyacharya, adhyapak, nyayadhish ko uchch saflta prapti ke liye brihaspativar ke din shri ram ya shri vishnu mandir men pipal vriksh ka ropar karna shubhaprad rahta hai.
shukra: shukra rajas prakriti, strigrah v jal tatva hai. jinki rashi vrishabh v tula hai, jinki janm kundli men shukra kanya rashigat nich ka hai unhen tatha sangitagya, gayak, shrringar sanbandhi samagri ke vikreta, kalakar varg ko uchach labh pratishtha hetu udumbar, ashok ya sitafal vriksh ka ropar devi mandir men shukravar ko karen.
shani: shani makar v kunbh rashi ka svami, vayu tatva hai. jinki janm kundli men shani, surya v mangal ka yog ho unke liye shani ghatak hota hai, surya shani ka yog pita se virodh utpann karta hai, iske anisht prabhav se vat rog, pairon men rog, chitt bhramit rog ki sanbhavna rahti hai, jinhen shani ki dhaiyya, sarhesati chal rahi ho unhen tatha lohe ke vyapari, vakalat ke kshetra se jure vyakti, tel ke vyapari ko shani dev ki santushti v prasannata ke liye shami vriksh ka ropar shanivar ke din shani mandir ke samip ya dakshinabhimukh shri hanuman mandir men karna chahie. sath hi pakshiyon ke rahne ki vyavastha karna v vriddhajanon ki seva dvara bhi shani dev vishesh rup se santusht hote hain.
rahu-ketu: rahu-ketu chaya grah hai, jinki janm kundli men kalasarp yog ho, karya men lagatar vighn ane par inke anisht prabhav se vyakti ko pishach pira, netra rog, bhut pretadi badha, bhay janya rog, vishajanya rog utpann hote hain. iske anisht prabhav ke nivarnarth, darbh, ashtagandh v chandan ka vriksh shiv mandir men ropar karna chahie tatha lagatar 21 din tak machliyon ko ramnam uchcharan sahit goliyan khilane se bhi anisht prabhav samapt ho jate hain. vrish ropar ka samay sthan v uski suraksha vishesh mahatvapurn hai jisse kiye gaye karm ka punya labh prapt hon.
vastushastra ke anusar ghar ke samip pakar, nim, am, bahera, pipal, ber, gular, imli, kela, bel, khajur adi vriksh ka hona ashubh mana gaya hai. ghar ke samip chanpa, ashok, katahal, chameli, shal, maulsiri adi vriksh shubh fal pradan karne vale kahe gaye hain. ‘brihatsanhita’ v ‘samrangnsutradhar’ ke anusar jis ghar ke angan men ninbu, anar, kela v ber ugte hain us ghar ki vriddhi men badha utpann karte hain. ‘brihdaivagya’ ke anusar jis ghar men pipal, kela, kadamb, biju, ninb ka vriksh hota hai usmen rahne vale ki vansh vriddhi men rukavat utpann karta hai. bhavishya puran ke anusar ghar ke bhitar lagayi gai tulsi dhan-putra v hari bhakti dene vali hoti hai pratahkal tulsi ka darshan karne se jane anjane hue pap turant samapt ho jate hain v suvarn dan ka fal prapt hota hai. ghar ke dakshin ki or tulsi vriksh ka ropan anishtakari mana gaya hain ghar ke samip ashubh vriksh hone par vriksh v ghar ke madhya men shubh fal dene vale vriksh ko laga dena chahie. ghar ke samip pipal vriksh hone par uski seva puja karte rahne se ashubh fal prapt nahin hota.