chikitsa vigyananusar yadi manav sharir men insulin ki kami ho jay to use madhumeh ka rog hota hai. jyotishiya drishtikon se shukra grah ko mutra ka karak mana gaya hai. madhumeh rog men shugar mutra sthan se bahar niklta hai. atah shukra se madhumeh rog ka vichar kiya jata hai. mithe ras ka karak grah guru hota hai. atah guru ka bhi vichar avashyak hai. khane-pine ki mithi chijen dekhakar yadi man kabu men nahin rahta to man ke karak chandrama ka vichar bhi karna chahiye.
madhumeh rog hone ke yog - madhumeh rog manav sharir men painkriyaj par adharit hai. yadi painkriyaj sahi karyan nahin kar raha hai to madhumeh hota hai. painkriyaj nabhi se upar v dil se niche hote hain. isliye inhen janm kundli ke pancham bhav se dekha jata hai. nabhi v udar ka vichar chathe bhav se kiya jata hai. mutradi angon ke saptam v ashtam bhav bhi vichar karna chahiye.
- jaliya rashi kark, vrishchik v min tatha shukra ki rashi vrish v tula ko yadi do ya adhik papi grahon ne pirit kar rakha hai to in logon ko madhumeh rog hone ki ashanka adhik hoti hai.
- janmakundli ke chathe v athven bhav ke pirit hone, pachan tantra ki sinh rashi ke pirit hone v mutra angon ki vrishchik rashi ke pirit hone se madhumeh rog hota hai.
- chathe bhav men guru ya shukra ki sthiti ya mangl-shukra ki sthiti is bimari ki or ishara karti hai.
- guru kamjor sthiti men 6, 8 ya 12 bhav men ho ya apni nich rashi men ho to jatak ko madhumeh rog ki sanbhavna banti hai.
- shukra chathe bhav men ho aur guru 12ven bhav men ho to bhi madhumeh rog ho sakta hai.
- chathe bhav ka svami 12ven bhav men ho v dvadshesh ka sanbandh guru se ban raha ho to bhi madhumeh rog ho sakta hai.
- guru grah kundli men shani v rahu donon se pirit ho.
- guru grah ast ho v rahu/ketu aksh par ho.
- guru grah yadi rahu ke nakshatra men ho aur rahu se drisht bhi ho.
- yadi guru v shani ki yuti bahut najdik anshon par ho rahi ho arthat donon ek hi navansh men hon.
- yadi shukra v guru ya chandra v guru pirit hon.
- jab guru grah shani ki rashi men ho v ashubh grah se drisht ho.
- lagn kisi ashubh grah se pirit ho v guru bhi pap grah se pirit ho.
- jab rahu ka sanbandh ashtamesh se athven bhav men ya trikon men ban raha ho.
- shani ka sanbandh chandrama se ho ya shani hi kark rashi men ho.
- chathe v dvadash bhav ke svamiyon ka apas men rashi parivartan ho raha ho.
- pancham ya panchmesh ka sanbandh yadi 6, 8, 12 bhav se ban raha ho to yah bimari ho sakti hai.
- kul milakar dekha jaye to yadi shukra, guru v chandrama dushit hon to madhumeh ka rog hota hai tatha 5, 6, 7, 8 bhavon ke alava sinh, kanya, tula v vrishchik rashiyon ke dushprabhav men hone se madhumeh v mutrangon se sanbandhit rog lag jate hain.
madhumeh rog thik karne ke upayah aisa dekha gaya hai ki guru ke karan huye rogon se mukti ki sanbhavna adhik hoti hai. surya v mangal ke karan huye rog anshik rup se dur hote hain. lekin shani ke karan huye rogon ka koi ilaj nahin hota. jyotish granthon men kaha gaya hai ki madhumeh se pirit jatak ko sada ganesh ji ki upasna karni chahiye v unhen charhaya gaya bhog prasad ke rup men grahan karna chahiye.
unhen kaith v jamun ka fal bhog ke rup men charhana chahie v svayan bhi prasad ke rup men grahan karna chahiye. isse madhumeh rog men avashya aram milta hai. rat ke samay do chammach methi dana ek gilas pani men dalakar rakh den. subah shauch jane se purva yah pani pi len aur methi dane bhi chaba len. iske sath hi bina chili lauki ko ubalne ke pashchat uska adha gilas ras nikal kar ek chutki pisi kali mirch, ek chutki saunth, tulsi, pudina aur adha gilas pani men milakar bhojan ke adha ghante bad rojana ek bar pite rahen. madhumeh rog thik hone lagega.
jamun ke patte, nim ki pattiyan, bel ke patte v tulsi ki pattiyan in sabko sukha len aur ikattha pisakar rakh len. iska ek chammach churn rojana subah khali pet len. 10 din men hi asar dikhne lagega. sat ath bhindi ko khade char hisson men chirakar ek gilas pani men rat ko bhigo kar rakh den aur subah usi pani men bhindi ko masal den v pani ko chanakar pi len. aisa rojana karne se madhumeh samapt hone lagega.
sada suhagan jise ‘‘barmasi’’ bhi kahte hain, uske ful do prakar ke hote hain: safed v baingni rang ke. subah ke samay baingni rang ke panch ful ek khali kap men ublte pani men dal den. jab pani pine yogya ho jaye to fulon ko nichorakar pahle fulon vala pani aur uske bad sada pani pi len. sat din yah pani piyen aur fir sat din yah prayog band kar den. sava do mahine tak aisa karen.
madhumeh rog ka namo-nishan bhi nahin milega. 16 shukravar purn man se kisi mandir ya jarurtmand vyakti ko shraddhanusar chaval ka dan karen aur shukra ke mantron ki ek mala jap rojana karen. is upay se madhumeh rog jane lagta hai. pratyek guruvar ko shraddhanusar pili vastuon ka dan den v guru ke mantron ki ek mala jap rojana karen. ‘sarporva’ ki jar safed reshmi kapre men bandhakar pirit vyakti ko apni dayin bhuja par dharan karni chahiye. kuch dinon men hi aram milne lagta hai.
pushya nakshatra men jamun ikattha karen aur fir inka sevan roj subah khali pet karen. isse madhumeh rog thik hota hai. rojana ek chammach karele ke churn ko subah ek kap bina chini vale dudh ke sath sevan karen. madhumeh se aram milta hai. yog ki jannmudra men 30 minat rojana baithne se madhumeh rog men labh milta hai. in sabke atirikt kam se kam 2 se 3 kilomitar rojana paidal chalne ki dinacharya avashya banani chahiye.