bhavishya puran men kaha gaya hai ki bhadrapad ke ant ki chaturdashi tithi men paurnamasi ke yog men anant vrat ko karen. skand puran men bhi kaha gaya hai ki bhadrapad mas ki purnima tithi men muhurt matra ki chaturdashi ho, to usko sanpurn tithi janna chahie aur usmen avinashi vishnu ka pujan karna chahie . is varsh 8-9-2014 ko is vrat ka palan kiya jaega. bhadrapad mas ki shukla paksh ki chaturdashi bhagvan anant ka vrat rakhakar manayi jati hai. is vrat ke nam se lakshit hota hai, ki yah din us ant n hone vali srishti ke karta vishnu ki bhakti ka din hai, ‘‘anant sarva naganamdhipah sarvakamdah, sada bhuyat prasannome yaktanabhyankrah’’ mantra se puja karni chahie. yah vishnu krishn rup hain, aur sheshnag kal rup men vidyaman hanai atah donon ki sammilit puja ho jati hai.
puja vidhi: pratah kal, nitya kriya tatha snanadi se nivritt hokar, chaiki ke upar mandap banakar, usmen akshat sahit ya kusha ke sat tukron se shesh bhagvan ki pratima sthapit karen. uske nikat haldi se range hue kachche sut ke dhage men 14 ganthen lagakar rakhen aur gandh, akshat, pushp, dhup, dip, naivedya adi se pujan karen. tatpashchat anant dev ka dhyan karke shuddh kachche sut se nirmit anant ka apni dayin bhuja men dharan karen. yah dhaga anant fal dene vala hai. punah nimn mantra anant sarva naganamdhipah sarvakamdah, sada bhuyat prashannome bhaktanambhyankrah se prarthana karen. katha bhi shravan karen. katha: dharm ke ansh dvara kunti se utpann pandu ke jyeshth putra dharmatma punyatma maharaj yudhishthir ne jab rajsuya yagya kiya to usmen yagya mandap itna manoram tha ki jal-sthal ki bhinnata pratit nahin hoti thi.
bhagvan shri krishn ki agra puja ke uprant, sabhi dishaon se padhare rishiyon, maharshiyon, rajaon ko yathayogya karyon ko saunp, maharaj dhritrashtra ke putra duryodhan ko rajkosh ka karya de diya gaya. sanpurn karya vidhivat niyamanusar purn ho gaye. ek din yagya mandap aur mahlon ki shobha niharte hue duryodhan yagya mandap ke us sthal par a pahunche, jahan jal ki jagah sthal aur sthal ki jagah jal ka bhram ho jata tha. isi bhram ke karan duryodhan jalashay ko sthal samajh kar usi men gir pare. bhimsen aur draupdi yah dekh kar duryodhan ka uphas urane lage, hansne lage aur kaha ki ‘andhon ki santan andhi hi hoti hai.’ yah bat unke hriday men ban jaisi lagi tatha unhonne badla lene ki man men than li. kuch samyoprant, mama shakuni se paramarsh kar, pandvon ko dyut krira ka amantran bhej diya tatha dyut krira men chal se sarvasva jit liya; yahan tak ki har hone par unhen, pratigyanusar, 12 varsh ka banvas tatha ek varsh ka agyat vas de diya. banvas ke anek kashton ko sahte hue ek din jab bhagvan vasudev-devki nandan shri krishn se yudhishthir ki bhent hui, to unhonne apne duahkh ka sanpurn vrittant shri krishn ko kah sunaya aur ise dur karne ka upay pucha. tab shri krishn ne anant bhagvan ka vidhipurvak vrat karne ka paramarsh diya aur kaha ki is vrat se tumhen punah rajya prapt ho jaega. is sandarbh men ek divya prasang bhi shri krishn ne yudhishthir ko shravan karaya.
prachin kal men sumant namak brahman ki sushila nam ki ek sundar divya gunon se purn kanya thi. brahman e bari hone par kanya ka vivah kaundinya rishi ke sath sanpann kar diya. rishivar sushila ko le kar ashram ki or chal pare. raste men hi sandhya vandan ka samay hone par rishi sandhya karne lage. sushila ne tab pas men hi dekha, to bahut si saubhagyavti striyan, apne-apne patiyane aur svajnon ke sath, kisi devta ki puja kar rahi hain. tab usne pas ja kar pucha ki ap sab kiski puja kar rahi hain? un sabhi ne sushila ko anant bhagvan aur vrat ki mahima batayi.
sushila ne bhi vahin us vrat ka anushthan kiya aur chaidah ganthon vala dora hath men bandh kar rishi kaundinya ke pas ayi. rishi kaundinya ne sushila ke hath men bandhe dore ka rahasya pucha. sushila ne sanpurn vrittant kah sunaya. tab rishi ne krodhavash dora tor kar agni men dal diya. isse bhagvan anant ka atyant apman hua. uska parinam yah hua ki rishi sukhi n rah sake. un par vipattiyon ka pahar tut para. dhan-daulat sabhi kuch samapt ho gaya. tab unhonne sushila se iska karan pucha, to sushila ne anant dore ki smriti dilayi. kaundinya pashchatap se uddhign ho, us dore ki prapti hetu, van men vicharan karne lage aur ek din kshudha-pipasa se vyakul ho kar bhumi par gir pare. tab anant bhagvan ne unhen darshan diye aur kaha ah he kaundinya! tumne mera tiraskar kiya tha. usi se tumhen itna kasht bhogna para. gyan ho gaya ho, to ab ghar ja kar anant ka anushthan 14 varshon tak karo. isse tumhare duahkh-daridrya mit jaenge tatha dhan-dhanya se sanpann ho jaoge.