''sikandar mahan'' yadgakaran sharma sitaron ki kahani sitaron ki jubani stanbh men ham janmapatriyon ke vishleshan ke adhar par yah batane ka prayas karte hain ki kaun se grah yog kisi vyakti ko saflta ke shikhar tak le jane men sahayak hote hain. yah stanbh jahan ek or jyotirvidon ko grah yogon ka vyavharik anubhav karaega, vahin dusri or adhyetaon ko shreshth path pradan karega tatha pathkon ko jyotish ki prasangikta, uski arthavatta tatha satyata ka bodh karane men mil ka patthar sabit hoga. sansar ke mahan yoddhaon men vishva vijeta sikandar ka nam agraniya hai. agar itihas par drishti dalen to hamen pata chalta hai ki mahan purush is dharti par kam hi samay ke lie rahe. ve jaldi hi apna karya samapt karke chale gaye. itihaskaron ke anusar adiguru shankracharya keval 32 varsh ki ayu men aur sikandar matra 33 varsh ki ayu men is dhara ko chor chal die. jab sikandar ek shahar jit kar aya to usse kisi ne pucha, yadi avasar mila to kya ap agla shahar bhi jitenge? sikandar ne kaha,'' avsr! avasar kya hota hai? main svayam avasar banata hun.'' is sansar men jinhen mahan banna hai ve samay ka intjar nahin karte apitu nirantar apni unnati ki rah par age barhte chale jate hain. sikandar bahut mahatvakankshi the. vah yunan ke nivasi the tatha samast vishva par apna adhipatya jamana chahte the. unhonne apna samrajya yunan se uttar bharat tak failaya. bharat men uski raja poras se muthbher hui. poras har gaya lekin uski virta ko dekh sandhi ki evam mitra banaya. bharat se lautte hue bebilon men sikandar ki mrityu ho gai. sikandar ke janm ke samay raja filip ko jyotirvidon ne yah bhavishyavani ki thi ki yuddh bhumi men unka putra ajey hoga aur kalantar men yah bat satya siddh hui. sikandar 336 i.pu. men apne pita filip-pp ki hatya ho jane ke bad yunan men maisedoniya ka shasak bana. us samay uski ayu matra 20 varsh thi. sikandar ke guru eristotal the. sikandar sahsi aur vir the. vah buddhiman aur kutnitigya the. apne bachapan men sikandar vir purushon ki gathaen suna karta tha. sikandar ne bachapan men ek ghore ko apni virta aur kushlta se sadhakar vash men kar liya tha. bad men yahi ghora sikandar ke sabhi vijay abhiyanon men uska priya sathi bana. sikandar ek kushagra buddhi shasak tha. usne yurop, parsiya, dakshinpurva eshiya, mishra aur bharat men sindhu ghati tak anek deshon par vijay prapt ki. sikandar ne apne jivan men kadapi parajay ka munh nahin dekha aur matra 13 varshon men us samay ke lagabhag adhe vishva par vijay prapt kar li thi. 323 i. pu. men bebilon men sikandar ki achanak hi mrityu ho gai. sikandar ka koi putra nahin tha islie uska samrajya tutne aur bikhrne laga tatha uske vibhinn senaptiyon ke adhin hone laga. kuch log kahte hain ki use jahar diya gaya tha aur kuch ka kahna hai ki asne atmadah kiya tha aur kuch logon ke matanusar uski mrityu shit jvar ke karan hui thi. prastut hai is vishvaprasiddh yoddha ki janmakundli ka sankshipt vishleshan. sikandar ka janm mesh lagn men hua jo drirh lagn mana jata hai. lagnesh mangal parakram ke tritiya bhav men sthit hokar shubh grah guru se drisht hokar atyant bali hai. jahan tritiyasth mangal ne inhen mahan parakrami v mahan yoddha banaya. vahin chaturth bhav sthit tritiyesh budh ne v atmakarak shani ne inhen kutnitigya v rajnitivisharad banaya. mangal virta, bal, parakram, utsah tatha vyaktigat, samajik v rajnitik prabhav ka pratik hai. is mangal ka lagnesh hokar tritiya bhavasth hona is bat ka sanket deta hai ki jatak nishchit rup se parakrami hoga. lagn v lagnesh donon par shubh grah guru ki purn drishti hai. sikandar mahan ki kundli men amal, yog, parvat yog, vasumtiyog, gajkesri yog, mahabhagya yog v parijat yog virajman hain. bhagyesh guru chandrama se sanyukt hokar saptam bhav men gajkesri yog bana raha hai tatha bali lagn, lagnesh v ekadash bhav men sthit bali rahu par drishti dalakar inhen mahan bhagyashali bana rahe hain. bhagya bhav ke purn falibhut hone ke lie pancham bhav (navam se navm) ka bali hona avashyak hota hai. kyonki purvajanm ka vichar, arthat purva janmarjit punya v pap ka vichar isi bhav se kiya jata hai. is bhav ke shubh hone par jatak ke bhagya men rukavten nahin atin tatha bhagya nirantar sath deta rahta hai sath hi aisa jatak buddhiman bhi hota hai. sikandar ki kundli men navam v pancham donon ki sthiti shreshth hai sath hi lagnesh bhagva bhav ko v bhagyesh lagn ko dekhakar apurva bhagya yog bana rahe hain. yahi karan hai ki aj bhi yadi kisi vyakti ka bhagya prakhar ho to use mukaddar ka sikandar mana jata hai. sikandar ka panchmesh pancham bhav men svagrihi hokar dvitiyesh v ketu se sanyukt hai, jis karan yah kushagra buddhi sanpann hue, sath hi buddhi ke karak guru aur budh bhi kendra bhavon men sthit hain. panchmesh surya uchchanavansh men sthit hai. lagn men charrashi mesh (jo prabhav, shakti aur paurush ki pratik hai) ka hona tatha pancham bhav ki sthiti ka shreshth hona yah batata hai ki sikandar men turant nirnay lene ki purn kshamata thi. tritiya bhav v mangal ki uttam sthiti yah batati hai ki yah apne nirnay ko shighra hi karyanvit karne ki parakram shakti se sanpann the. pancham bhav men surya, shukra v ketu ki yuti ke falasvarup hi unhen rajkaryon men purn saflta mili. dashmesh v ekadshesh shani dhanbhav men sthit hai. labh bhav men rahu ki sthiti achanak dhan labh v saflta deti hai tatha chaturthesh v bhagyesh ki kendra men yuti ne inhen bhagyashali tatha aisi sthiti men balvan lagnesh ne inhen mahan parakrami v vishvavijeta banaya.
Kya aapko lekh pasand aaya?
Subscribe