mannat trayat iti mantrah, manan tran dharmano mantraah. man ko shakti pradan kar ke samast bhayon se raksha karne vale shabdon ko ‘mantra’ kahte hain. mana’shabd se man ko ekagra karna, ‘tra’ shabd se tran (raksha) karna jiska dharm hai, ve mantra kahe jate hain.
mantra hi samast jatkon ko mantrana pradan karta hai. mantra hi man ko samriddh evan shant banata hai. mantra ke abhimantran se kisi bhi vyakti, vastu, ya sthan ko surakshit rakha ja sakta hai. varnamala ke ‘a’ se le kar ‘ksha’ tak 50 aksharon ko matrika kaha gaya hai. matrika shabd ka arth mata, athva janni hota hai. atah samast vanmay ki yah janni hai. sansar ka vyavhar shabdon ke dvara hota hai. islie shabd shakti sarvopri mani gayi hai.
rigved ke anusar mantra ki parashravya dhvani vayu mandal ko bahut prabhavit karti hai. mantra shakti kriyatmak dhvani tarangon ka punj hai. mantra ki tarangen mastishk tatha brahmandiya vatavaran ko prabhavit karti hain.
mantron ki 3 jatiyan mani gayi hain: purush, stri evan napunsak. jin mantron ke ant men vashat, ya fat ka upyog hota hai, ve purushsangyak hain. svaha, athva vaushat hone par strisangyak tatha hun evan namah ant vale mantra ko napusanksangyak mana gaya hai. vashikaran, uchchatan evan stanbhan men purush mantra, kshudra karm evan rogon ke nash ke lie strisangyak mantra evan abhichar men napunsak mantron ka prayog siddhaprad hote hain.
1 akshar ke mantra ko ‘pind’ sangya, 2 akshar ko kartari, 3 se 9 aksharon tak ke mantra ko ‘bij’ mantra, 10 akshar se 20 akshar tak ko ‘mantra’, 20 se adhik akshar ke mantron ko sangya ‘mala’ mana gaya hai. inhin nad shaktiyon ke prithk-prithak prabhav se mantra ke japakarta ko labh hota hai. jis tarah kisi bij men sukshm rup se vriksh ka sarvang chipa hota hai, jise pratyaksh nahin dekha ja sakta hai, usi prakar chote se mantra men uske anek gun pratyaksh rup se nahin dekhe ja sakte hain.
abhisht siddhi ke lie samast mantron ko batayi gayi sankhya men jap, path adi karna labhaprad hota hai. yadi kisi mantra ke prati jatak ko sanshay, bhranti ho, to mantra ke shuruat men ‘hrin shrin klin’ laga kar jap-path adi karna chahie. iske atirikt kisi bhi mantra ke adi evan ant men pranav ‘˙’ laga kar jap-path adi karna siddhidayak hota hai. jin mantron ka jap kisi vishesh karyasiddhi ke lie hota hai, unke lie nyas, viniyog, sankalp, utkilan, shapoddhar adi avashyak hote hain, yadyapi nishkam bhavna ke jap men n hi vishesh niyam-sanyam ka pravdhan hai, n hi sankalpadi ki avashyakta; arthat nishkam bhavna se yathashakti yathasankhyatmak jap-path kiya jata hai.
samast mantron ke udbhavakatrta shiv ko mantron ka janak mana jata hai. atah kisi bhi mantra ka jap rudraksh ki mala par karen, to behatar parinam sammukh aenge. jyotish ke prangan men bhi mantron ka mahatva sarvopri hai. jab kisi jatak ki kundli men kisi aise grah ki kamjori dekhi jati hai, jis grah ka ratn dharan nahin ho sakta hai, to aisi sthiti men mantra jap hi labh pradan karta hai.
aushdhi mani mantranan grah-nakshatra tarika. bhagya kale bhavetsiddhiah, abhagyan nishfalan bhavet..
aushdhi, mani, ya mantra tab karya karte hain, jab grah-nakshatra adi shubh hote hain. ashubh kal men sabhi nishfal ho jate hain; arthat, yadi samay sahi chal raha ho, to mantra avashya shubh fal dete hain.
mantra chikitsa anek asadhya rogon ke lie bhi uchit mani gayi hai. jin rogon ka nidan durlabh hota hai, athva vishghti, gandmul, vish kanya tatha anek prakar ke doshon ka upay, anya upayon ki apeksha, mantra dvara uttam mana gaya hai.
dipavli, dashhra, shiv ratri, nav ratri, surya evan chandra grahan adi vishisht parvon men mantra jap ka mahatva evan fal adhik hota hai. mantra shakti ki vriddhi ke lie mantra ka purashcharan (niyamit evan nishchit sankhyatmak jap) karna chahie; arthat jab tak koi jatak amuk mantra ka nishchit purashcharan nahin karta hai, tab tak vah mantra use purn falibhut nahin hota hai. atah kisi mantra ka purashcharan kar lene se usmen asimit shakti jagrit ho jati hai.
pratyek akshar, athva shabd ka janm to hota hai, parantu uska vilay nahin hota hai. isi lie shabd ko brahm mana gaya hai. yadi yahi akshar shuddh satvik tatha dharm evan adhyatm se jure hon, to ye akshar, athva shabd ‘mantra’ ban kar, brahmand men amrta prapt kar ke, yugo-yugon paryant apna prabhav sanpurn vishva ko pradan karte rahte hain.
shabd ke isi prabhav ke karan mantron ko sarvopri mana gaya hai. shraddha evan vishvaspurvak kiya gaya mantra jap, athva mantra path jatak ko nishchay hi labh deta hai.