mira kahti hai - main chakit hun ki parmatma sone ke pyale men amrit bhare lie baitha hai ! main chakit hun. hona to yahi chahie ki koi bhi ise inkar n kare. kaun ise nate ! lekin log nat rahe hain. log apni-apni naliyon ki taraf sarak rahe hain. ve kahte hain: ham to apni nali men pienge. log gobar ke kire hain; unhen apne gobar men maja a raha hai. sone ke katoron se logon ki pahchan nahin hai. amrit se logon ka koi sanbandh nahin hai. jahar hi pite rahe hain, jahar ka hi svad ata hai. jahar pite-pite jahrile hote gae hain. aur ab jahar ki pahchan hai; aur koi pahchan bhi nahin hai. mainne suna, ek stri machliyan bechne shahar ai. jab machliyan bechakar jati thi to use shahar men apni ek purani saheli mil gai. vah thi malin.
usne kaha- ‘aj mere ghar ruk jao, aj rat mere ghar ruk jao. janmon ke bad jaise milna hua ! kitne varsh bit gae ! rat khub baten karenge, bachapan ki yad karenge.’ to vah ruk gai. svabhavtah malin ne uski khat aisi jagah lagai, jahan bahar khile motie ke fulon ka bagicha tha, aur jahan se motie ke fulon ki gandh pratipal a rahi thi. usne aisi jagah khat lagai. malin thi; bagiche men achchi-se achchi jagah chuni. magar vah aurat n so sake. vah karvten badle. akhir malin ne pucha ki ‘bat kya hai, tu so nahin pa rahi; bar-bar karavat badal rahi hai.’ usne kaha- ‘main so n paungi. ye ful meri jan lie le rahe hain. tu to meri tokri le a, jismen main machliyan lai thi bechne.
aur vah tokri men jo kapra laga rakha hai us par thora pani chirak de, use main apne pas rakh lun to mujhe nind ae. machliyon ki gandh ke bina mujhe nind nahin aegi. machliyon ki tokri vapis lai gai. us par pani chirakakar uske pas rakh diya gaya. jab machliyon ki gandh ne use charon taraf se gher liya, aur motie ki gandh kat gai bahar, dur rah gai pari, dival khari ho gai machli ki gandh ki- tab vah nishnichat so gai, jaldi hi kharrate lene lagi. aisa admi hai. jiski hamen adat ho.... machliyon ki adat par jae to sugandh vahi hai. machli khane vale ko pata hi nahin chalta ki machli men durgandh hai; vah to nahin khane vale ko pata chalta hai. mans khane vale ko pata hi nahin chalta ki vah kya kar raha hai.
mere ek bangali daektar the; mere samne hi rahte the. kabhi mujhe unse jarurat hoti to ve dava-daru dete the. ek bar mainne unse pucha ki ‘dava to thik hai, ap kuch pathya nahin sujhate?’ unhonne kaha- ‘pathya ! ve bahut hansne lage ki ‘ap jo khate hain, vah pathya hi hai. vah to marijon ko khana hi chahie. ab apko aur kya sujhaen. ghaspat khane vale admi ko pathya kya?’ ‘ghaspat’ ! unhonne kaha - ‘bas shak-sabji - yah ghaspat. are machli khao, ande khao, mans khao, to kuch pathya ! kabhi bimar hoo to chor sakte ho. shakahar men yahi to ek kharabi hai ki bimar bhi ho jao to kuch chorne ko nahin hai.’ unki bat bhi mujhe janchi ki bat to thik hi kah rahe hain. unki machli se main pareshan tha aur ve bata rahe hain ki vahi asli bhojan hai. admi jo karta hai, uske adi ho jata hai. mera bhojan unke lie ghas-pat . ve bhi thik kah rahe hain.