rudraksh kahan se aur kaise prapt hota hain.  

rudraksh kahan se aur kaise prapt hota hai rudraksh multah ek jangli fal hai, iski paidavar samudra tal se lagabhag do hajar mitar tak ki unchai vale parvatiya v pathari kshetron men hoti hai. rudraksh ke mul fal ko prayog men lane ke lie pani men galakar saf karna parta hai. is alekh men bharat aur videshon men paye jane vale rudrakshon ki jankari di ja rahi hai.... rudraksh ke vriksh samanyatah am ke vrikshon ki tarah ghane evan unche hote hain. inki unchai 50 fut se 200 fut tak hoti hai. rudraksh vriksh ke patte lagabhag 3 se 6 inch tak lanbe hote hain. iske ful safed rang ke tatha fal golakar hari abhayukt nil varn ke adhe se ek inch vyas tak ke hote hain. rudraksh vriksh ke fal khane men kuch mithe v kuch kasaile, khatas bhare hote hain. jangal men paida hone vale is per par fal kartik mas ke ant men ya margashirsh men lagne lagte hanai. iske falon ko anek pakshi, visheshakar nilkanth, bare chav se khate hain. rudraksh ka vriksh barhon mas hara-bhara rahta hai. ismen hamesha ful aur fal lage rahte hain. iska fal 8-9 mas men sukhakar jab svatah prithvi par girta hai, tab iske upar chilke ka avaran charha rahta hai, jise ek vishesh prakriya dvara pani men galakar saf kiya jata hai aur isse majbut guthli ke rup men rudraksh prapt hota hai. rudraksh ke upri satah par prakritik rup se santre ke saman fanken bani hoti hain, jinhen adhyatmik bhasha men mukh kaha jata hai. kuch rudrakshon men prakritik rup se chidra pae jate hain, jo ki uttam kahlate hain. rudrakshon ka mulyankan unmen pae jane vale chidra, mukh, akar adi ke anurup kiya jata hai. rudraksh ki jati ke saman dusre fal hai- bhadraksh evan indraksh. bhadraksh men rudraksh ke saman mukhjnit dhariyan nahin hotin aur indraksh vartaman men luptapray ho chuka hai aur kahin dekhne ko nahin milta. iski paidavar hetu ushn v sam shitoshn jalvayu evan 25 se 30 digri selsiyas ka tapman anukul mana gaya hai. isi karanavash rudraksh ke vriksh samudra tal se 2000 mitar tak ki unchai par parvatiya v pathari kshetron tatha nadi ya samudra ke tatiya kshetron men pae jate hain. bharat men rudraksh mukhyatah himalay ke parvatiya kshetron, bangal, asam, bihar, madhyapradesh evan arunachal pradesh ke janglon, sikkim, uttaranchal men haridvar, garhval evan dehradun ke parvatiya kshetron tatha dakshin bharat ke nilgiri, maisur, aur annamlai kshetra men pae jate hanai. uttarakashi men gangotri-yamunotri kshetra men bhi rudraksh pae jate hanai. karnatak men pae jane vale rudraksh ko manyata prapt nahin hai, kyonki vanaspatik drishtikon se yahan pae jane vale per rudraksh ke vriksh ki jati se kuch alag hote hain tatha un par lagne vale fal par mukh janit dhariyan nahin pai jati hain. rameshvaram men ek mukhi se tin mukhi tak ke rudraksh paida hote hain. yahan ek mukhi chandrakar (jo ki kaju ke dane ke akar ka hota hai) rudraksh bari sankhya men prapt hote hain. golakar ekmukhi rudraksh ke aprapya hone ki vajah se vartaman bajar men chandrakar (kaju dana) ekmukhi rudraksh ka prachalan sarvadhik hai. himachal pradesh ke parvanu men rajkiya pushp udyan men karib 9-10 varsh pahle jo rudraksh ka per nepal se laya gaya tha, vah ab purn rup se viksit hokar karib 25-27 fut uncha ho gaya hai aur fal dene laga hai. nepal men sabse bare akar ka rudraksh paida hota hai tatha yahan ke rudraksh achchi kism ke hote hain. nepal men rudraksh himalay ke paharon par pae jate hanai. iske atirikt nepal men rudraksh ke per dharan, dhigla adi sthanon men bhi hain. sansar men sarvottam kism ka ekmukhi bare akar ka golakar rudraksh nepal men hi hota hai aur iska mulya lakhon men hota hai. rajya ke niyamanusar yahan jitne bhi ek mukhi rudraksh utpann hote hain, ve sab nepal naresh kosh (shahi khajane) men jama karvane parte hain, unke bajar men bikne par pratibandh hai. nepal ka ekmukhi golakar rudraksh ati durlabh hai. sansar men sarvadhik (karib 70 pratisht) rudraksh ke vriksh indoneshiya men pae jate hanai. jabki nepal aur bharat men lagabhag 25 pratishat tatha shesh sthanon men 5 pratishat hote hain. sansar men rudraksh sabse adhik bharat men bikte hanai jinmen se 60-70 pratishat keval haridvar men bikte hanai. bharat aur nepal men pae jane vale rudraksh akar men bare hote hain jabki malyeshiya aur indoneshiya men pae jane vale rudraksh matar ke dane ke akar ke hote hanai. inke vriksh baune, patte hare tatha fal bhure hote hain jo age sukhakar bhure, lal, kale adi rangon men badal jate hain. bina dhari vala sabse bare akar ka rudraksh java men paya gaya tha.